Ubushakashatsi bwagaragaje ingaruka zo kuba telefone yarabaye nk’ikiyobyabwenge ku rubyiruko

Yanditswe na Ferdinand Maniraguha
Kuya 1 Ukuboza 2019 saa 12:30
Yasuwe :
0 0

Ubushakashatsi bushya bwagaragaje ko kimwe cya kane cy’urubyiruko cyabaswe cyane na telefone zigezweho ku buryo byahindutse nk’ikiyobyabwenge kuri bo.

Ubu bushakashatsi bwakorewe muri King’s College London, buvuga ko kubera uko kubatwa, urubyiruko ruta umutwe iyo hagize igituma bamburwa uburenganzira bwo kuba bafite telefone.

Abakoze ubwo bushakashatsi bavuze ko bigeze aho urubyiruko rudashobora kumenya no kugenzura amasaha rumara ruri kuri telefone, nkuko BBC yabitangaje.

Ubushakashatsi bwaburiye abantu ko iyo myitwarire ifite ingaruka zikomeye ku buzima bwo mu mutwe mu rubyiruko.

Ubwo bushakashatsi bwatangajwe mu kinyamakuru BMC Psychiatry, bwakoze inyigo 42 zirimo urubyiruko 42 000, harebwa ibijyanye n’imikoreshereze ya telefone zigezweho.

Mu bakoreweho ubushakashatsi, 23 % basanze bafite imyitwarire imeze nk’iy’abakoresha ibiyobyabwenge iyo habayeho kubima umwanya wo gukoresha telefone zabo. Basanze ko abo bantu batabasha kwihanganira kubaho badafite telefone zabo ku buryo bigira ingaruka no ku bindi bikorwa bakabaye bakora.

Umwe mu bakoze ubushakashatsi, Nicola Kalk yavuze ko abantu bakwiriye kumenya ingaruka zo gukoresha telefone cyane.

Yavuze ko kugeza ubu bataramenya niba telefone igezweho ubwayo ariyo ntandaro yo kuba imbata z’abayikoresha cyangwa niba ari porogaramu zibamo abantu bakoresha.

Yagiriye inama ababyeyi n’urubyiruko by’umwihariko, kumenya neza uburyo abana bakoresha telefone, igihe gikwiriye bagombva kuba bari kumwe nazo n’ingaruka bishobora kubakururira.

Samantha Sohn na we wagize uruhare mu bushakashatsi, yavuze ko gukoresha telefone zigezweho cyane bishobora guteza ikibazo cyo mu mutwe, bityo ko hakwiriye ubushakashatsi bwimbitse.

Ubushakashatsi bushya bwagaragaje ko kimwe cya kane cy’urubyiruko cyabaswe cyane na telefone zigezweho ku buryo byahindutse nk’ikiyobyabwenge kuri bo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza