U Rwanda rwatangiye gahunda idasanzwe yo kwica imibu itera malaria

Yanditswe na Evariste Nsengimana
Kuya 28 Kamena 2018 saa 05:58
Yasuwe :
0 0

Guverinoma y’u Rwanda yatangije guhunda yo gutera imiti n’ibiti byica imibu itera malaria, uyisanze mu ndiri yayo nko mu bihuru, mu bishanga, mu mibande, ahari ibidendezi by’amazi n’ahandi, hakoreshejwe imiti ikorerwa mu Rwanda mu gihingwa cy’Ibireti.

Ni igikorwa cyatangirijwe mu gishanga gihingwamo umuceri i Musambira mu Karere ka Kamonyi kuri uyu wa Kane, ku bufatanya bw’inzego zitandukanye zirimo Minisiteri y’Ubuzima, Ingabo na Polisi.

Minisitiri w’Ubuzima, Dr. Diane Gashumba, yavuze ko kurwanya malaria ari urugamba rukomeye, kuko kubona Abanyarwanda barenga miliyoni enye barwara malaria ndetse n’aho iri ari nke nko mu Majyaruguru igakomeza kwica abantu, byerekana ko ari ikibazo gikomeye.

Yakomeje agira ati “Tugomba gutera uyu muti, umubu tukawusanga aho wororokera, ntuze mu nzu zanyu. Kandi ni ubufatanye, mwese mugomba kubigiramo uruhare, ari abahinzi b’umuceri, abaturiye aho uhingwa, twese tugahaguruka amagi tukayica.”

“Umubu ukiri muto tukawica ariko n’uwaducitse wageze mu rugo murabizi ko Leta y’u Rwannda itanga inzitiramubu [...] niturwanya umubu hano mu bishanga n’uwaducitse tugasanga mu nzu murara mu nzitiramubu, ntaho malaria izabaturuka.”

Yakomeje anenga abagurisha inzitiramubu bataziraramo, abazubakishiriza inkoko, abazubakisha inzu, abazirobesha amafi n’abandi avuga ko ari ingeso mbi idakwiye.

Minisitiri w’Ingabo, Gen. James Kabarebe, yavuze ko Ingabo z’u Rwanda zishinzwe umutekano w’igihugu kandi ko utabaho abaturage b’icyo gihugu barwaye malaria.

Yagize ati “Umutekano usesuye ni uko n’umuturage aba ameze neza, afite ubuzima bwiza, aguwe neza, abana biga, abakora akazi bagakora neza, batanarwaye n’izi ndwara za malaria. Ni wo mutekano usesuye kugira ngo abaturage bakorere igihugu cyabo.”

“Niyo mpamvu rero Ingabo z’igihugu zashyize imbaraga mu guhinga no kubungabunga igihingwa cy’ibireti kivamo iyi miti iterwa hano ikica imibu n’amagi yayo.”

Umuyobozi wungirije w’uruganda Agropy, rukora iyo miti yica Malaria, rwanahuguye abayitera n’abajyanama b’ubuzima, Uzamugura Jean Marie Vianney, yijeje ko nta ngaruka n’imwe ishobora kugira ku bindi binyabuzima.

Yagize ati “Imiti turimo gutera mu gishanga, ni ibiryo by’imibu, irabirya igapfa [...] Twahereye mu gishanga, tugiye ku nkuka zacyo, tuzajya noneho mu nzu, iyabashije gukuka tuyihereho, nyuma iyamenye ubwenge yabuze aho ihagarara mu nzu ikajya mu matungo, indi ngamba ni ukurwanya malaria tuyitera ku matungo.”

Iyi gahunda yo gutera imiti irwanya malaria izahera mu turere ikunda kwibasira cyane turimo Kamonyi, Nyamasheke, Nyarugenge, Gasabo, Kicukiro, nyuma bikazakomereza mu tundi twose.

Guverinoma ikomeza gukangurira abaturage kurara mu nzitiramubu ikoranye umuti, gutema ibihuru no gusiba ibinogo birekamo amazi.

Muri Mata 2018 nibwo u Rwanda rwiyunze muri gahunda y’ibihugu bikoresha Ururimi rw’Icyongereza, Commonwealth, rwo kugabanya ibibazo bishingiye kuri malaria mo kabiri mu myaka itanu iri imbere, kugeza mu 2023.

Minisitiri w’Ingabo, Gen. James Kabarebe, yitabiriye gahunda yo kurwanya imibu itera malaria
Ingabo z'u Rwanda ziri gutera umuti wica imibu itera malaria mu gishanga no mu bihuru
Polisi ni yo ntiyatanzwe mu rugamba rwo kurwanya imibu
Minisitiri w’Ubuzima, Dr. Gashumba Diane, n'abandi bayobozi mu gutera umuti wica imibu
Minisitiri w’Ingabo, Gen. James Kabarebe
Minisitiri w’Ubuzima, Dr. Gashumba Diane

Amafoto: Andre Rugema/RBC


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza