00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwasinye amasezerano yo kubaka uruganda rwa mbere rukora inkingo

Yanditswe na Ferdinand Maniraguha
Kuya 26 Ukwakira 2021 saa 02:33
Yasuwe :
0 0

U Rwanda na Senegal byasinye amasezerano y’ubufatanye na Banki y’u Burayi ishinzwe Ishoramari (EIB) n’uruganda rukora inkingo rwa BioNTech, agamije koroshya ishyirwaho ry’inganda zikora inkingo n’imiti muri ibi bihugu.

Intego nyamukuru y’aya masezerano ni ukubakira Afurika ubushobozi mu rwego rw’Ubuzima, kugira ngo ibashe guhangana n’indwara z’ibyorezo byibasira Isi, no gutuma uwo mugabane uva ku kwikorera 1 % by’inkingo ukenera nibura bikagera kuri 60%.

Aya masezerano yasinyiwe i Kigali muri Kigali Convention Centre ahari kubera inama ihuza abaminisitiri b’ububanyi n’amahanga mu bihugu bigize Umuryango wa Afurika Yunze Ubumwe n’ab’Umuryango w’Ubumwe bw’u Burayi.

Biteganyijwe ko izi nganda z’inkingo zizaba zatangiye kubakwa guhera muri Kamena 2022. Inkingo z’ingenzi zizaherwaho ni iza Covid-19 na malaria ariko mu gihe kirambye hazakorwa n’izindi nkingo ku ndwara zitandukanye.

Minisitiri w’Ubuzima mu Rwanda, Dr Ngamije Daniel yashimiye abagize uruhare ngo aya masezerano asinywe, avuga ko u Rwanda rwiteguye gukorana n’abafatanyabikorwa bose kugira ngo amasezerano ashyirwe mu bikorwa.

Ngamije yavuze ko uruganda ruzubakwa mu Rwanda biteganyijwe ko ruzatwara asaga miliyoni 100 z’amayero (asaga miliyari 100 Frw), rukazaba rukoresha ikoranabuhanga rigezweho rya (mRNA) ari naryo ryifashishwa mu gukora inkingo za Pfizer zikorwa na BioNTech.

Messenger RNA (mRNA) ni uburyo bushya buri kwifashishwa mu ikorwa ry’inkingo z’indwara zandura zirimo na COVID-19.

Uburyo bwa mRNA bwari bwaratekerejweho mbere hakorwa inkingo za Zika, ibicurane n’izindi, ariko abashakashatsi batangira kubukoresha hamaze kuvumburwa virusi ya SARS-COV2 itera COVID-19.

Minisitiri Ngamije yavuze ko uruganda ruzubakwa mu cyanya cyahariwe inganda i Masoro mu karere ka Gasabo hafi y’ahubatse Carnegie Mellon University, u Rwanda rukaba ruzatanga ikibanza cy’aho ruzubakwa.

Ati “Uruganda rukora izo nkingo ruzatangira kubakwa muri Kamena 2022, rukazaba rwuzuye mu myaka ibiri, rugatangira gukora inkingo. Dufite ibyo tuzatanga nk’igihugu, aho uruganda ruzubakwa, ibizashyirwamo byose ngo habe hujuje ibyangombwa. Umufatanyabikorwa BioNTech azaza arwubake, mu minsi ya mbere habeho no gutanga abakozi bakorana n’abakozi bacu mu kubaka ubushobozi n’ubumenyi, hazakurikiraho igice cyo gushyira izo nkingo mu macupa amwe mujya mubona dukunda kuvomamo dukingira abantu.”

Banki y’u Burayi ishinzwe Ishoramari izaba ifite inshingano zo gutanga amafaranga azifashishwa mu ishyirwa mu bikorwa ry’uyu mushinga.

Umuyobozi Mukuru akaba n’umwe mu bashinzwe BioNtech, Ugur Sahin yavuze ko bizeye umusaruro muri izi nganda za mbere zigezweho zigiye kubakwa muri Afurika.

Yagize ati “Intego yacu ni ugukorera inkingo muri Afurika no kubaka inganda byose bigamije kongera ireme ry’ubuvuzi muri Afurika. Hari iby’ibanze tumaze iminsi dukora bizadufasha gushyira izi ngamba mu ngiro.”

Sierk Poetting ushinzwe ibikorwa muri BioNTech yavuze ko ibikorwa byo kubaka izi nganda bizatangira umwaka utaha rwagati kandi ko inyigo zarangiye kandi ibikoresho byamaze gutumizwa.

Biteganyijwe ko izi nganda zizajya zikora miliyoni z’inkingo buri mwaka, zifasha umugabane wa Afurika guhangana n’indwara ziwugarije zirimo Covid-19, malaria, igituntu n’izindi.

Minisitiri Ngamije yavuze ko uru ruganda ruzuzura rutwaye asaga miliyari 100 Frw
Ubwo Ngamije yerekaga itangazamakuru amasezerano nyuma yo gusinya
Minisitiri w'Ubabanyi n'amahanga wa Senegal, Aïssata Tall Sall yerekana amasezerano yo gushinga uruganda rw'inkingo mu gihugu cye
Umuhango wo gusinya amasezerano witabiriwe n'abayobozi batandukanye
Dr Ngamije yavuze ko uru ruganda nirumara kubakwa, ari amahirwe akomeye ku mugabane wa Afurika mu guteza imbere urwego rw'ubuzima
U Rwanda, Senegal na Afurika y'Epfo nibyo bihugu BioNTech izaheraho muri Afurika yubaka inganda zikora inkingo
Abayobozi bafata ifoto y'urwibutso nyuma yo gusinya amasezerano agamije gufasha Afurika kugira inganda zikomeye zikora imiti n'inkingo

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .