U Rwanda rwasinyanye amasezerano mu by’ubuhinzi n’imigenderanire na São Tomé et Príncipe

Yanditswe na Cyprien Niyomwungeri
Kuya 11 Werurwe 2017 saa 08:30
Yasuwe :
0 0

Umubano w’u Rwanda na São Tomé et Príncipe ukomeje gufata indi ntera, aho itsinda ryo muri icyo gihugu riyobowe na Minisitiri w’Ububanyi n’Amahanga, Urbino Botelho, ryasuye u Rwanda, hagashyirwa umukono ku masezerano yo guteza imbere ubuhinzi, ubucuruzi n’imigenderanire hagati y’ibihugu byombi.

Itsinda ryo muri São Tomé et Príncipe ryabanje gusura urwibutso rwa Jenoside yakorewe Abatutsi rwa Kigali ruri ku Gisozi, ryunamira inzirakarengane zirushyinguyemo. Ryasuye igice cyahariwe inganda cya Kigali, rinasobanurirwa imikorere y’ikigo cy’igihugu gishinzwe iterambere, RDB, icyerekezo cyacyo n’ibyo kimaze kugeraho.

Urubuga rwa Twitter rwa Minisiteri y’Ububanyi n’Amahanga y’u Rwanda, ruvuga ko hanagaragajwe amahirwe ari mu buhinzi mu Rwanda, cyane cyane ubw’ikawa nka kimwe mu nkingi y’ubukungu bw’ibihugu byombi.

Ibihugu byombi byasinyanye amasezerano atanu mu by’ubuhinzi, ubukerarugendo, ubucuruzi, gukuraho viza n’ubwikorezi bw’indege.

Mu mpera z’umwaka ushize Minisitiri w’Intebe wa São Tomé et Príncipe, Emery Travoada, yazanye n’umuryango we basura ahantu hatandukanye mu Rwanda ndetse banakirwa n’Umukuru w’igihugu baganira uburyo bwo gushyiraho ubufatanye hagati y’ibihugu byombi.

Bidatinze itsinda ry’Abanyarwanda riyobowe na Minisitiri w’Ububanyi n’Amahanga n’ubutwererane, Louise Mushikiwabo, bagiriye uruzinduko muri São Tomé et Príncipe ikirwa giherereye mu kigobe cya Guinea mu Nyanja ya Atlantic, bagirana ibiganiro na bagenzi babo, bigamije guteza imbere umubano w’ibihugu byombi.

Ni ibiganiro byibanze ku gusuzuma umubano usanzwe hagati y’ibihugu byombi yaba mu bya politiki, ubukungu no gushyiraho uburyo bw’ubufatanye mu bya dipolomasi, politiki n’amategeko.

Ingingo ijyanye n’ubufatanye mu ishoramari n’ubukerarugendo yibanzweho, impande zombi zemeza ko buzashingira ku gutangiza ibikorwa bya Sosiyete Nyarwanda y’indege, RwandAir muri São Tomé et Príncipe.

Hemejwe imishinga y’ishoramari rihuriweho nk’ iy’ubuhinzi no gutunganya ikawa muri São Tomé et Príncipe, aho hazahingwa ikawa yo mu misozi ku buso bwa hegitari 500 ndetse mu myaka iri imbere u Rwanda rukazagirana ishoramari na São Tomé et Príncipe mu bijyanye na Peteroli na Gaz.

U Rwanda ruri mu bihugu bike byoroheje imigenderanire ku Banyafurika, impande zombi zemeranyijwe guhana ubunararibonye mu bijyanye na Viza, uburyo bwo gucunga imipaka, guhuza impapuro z’inzira na Viza, guhana amakuru, kubakirana ubushobozi n’ibindi.

Uruzinduko rw’iminsi itatu kuva kuwa 5 kugeza kuwa 7 Mutarama 2017, rwasize Minisitiri Mushikiwabo na mugenzi we Urbino Botelho, basinyanye amasezerano mu bijyanye no kwagura ubufatanye no guhana ubujyanama mu bya dipolomasi na politiki.

Minisitiri w’Ububanyi n’Amahanga, Urbino Botelho wa São Tomé et Príncipe ahererekanya amasezerano na mugenzi we Louise Mushikiwabo
Ba Minisitiri b'Ububanyi n'Amahanga b'ibihugu byombi bashyira umukono ku masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza