U Rwanda ruzaba rwagabanyije abicwa n’igituntu kuri 80% mu 2035

Yanditswe na Mukwaya olivier
Kuya 6 Mata 2018 saa 01:30
Yasuwe :
0 1

Ubuyobozi bw’Ikigo cy’Igihugu Gishinzwe Ubuzima (RBC), buvuga ko mu mwaka wa2035 kizaba kimaze kugabanya umubare w’abanyarwanda bicwa n’igituntu ku gipimo cya 80%, nyuma y’intambwe u Rwanda rwateye mu kugabanya umubare w’abicwa n’iyi ndwara mu myaka itatu ishize.

Ibi byatangajwe ubwo hizihizwaga umunsi mpuzamahanga wahariwe kurwanya indwara y’igituntu, mu muhango wabereye Iwawa mu Karere ka Rutsiro, ahatangijwe ubukangurambaga mu rubyiruko rugororerwayo, rukangurirwa kwipimisha hakiri kare no gufata imiti neza.

Umuyobozi w’ishami rishinzwe serivisi z’ubuvuzi muri RBC, Dr. Mazarati Jean Baptiste, yatangaje ko bishoboka kurandura indwara y’igituntu mu Rwanda kuko imiti yayo ihari ariko asaba abayirwaye kunoza imirire.

Ati “Birashoboka kurandura indwara y’igituntu mu Rwanda, gusa turasaba ko abarwaye bafata imiti bazamura imirire kuko bituma bakira vuba kandi birashoboka kuko u Rwanda rugenda rutera imbere; imiti irahari inatangirwa ubuntu.’’
Dr Migambi Patrick ukuriye ishami rishinzwe igituntu mu Ikigo cy’Igihugu gishinzwe Ubuzima, yavuze ko bihaye intego yo kugabanya igituntu ku kigero cya 80% kandi ko bishoboka urebye aho bavuye.

Yagize ati “Dufite intego yo kugabanya igituntu ku kigero cya 80% mu mwaka wa 2035 kandi birashoboka urebye uko twagabanyije imibare y’abarwayi.”

Dr Migambi yavuze ko mu 2014 mu barwayi b’igituntu abapfuye ari 9% mu gihe mu 2016 hapfuye 3% biragaragara ko igihugu cyashyize imbaraga mu kurwanya iyi ndwara.

“Dusigaranye ikibazo cy’ibihugu duturanye (Tanzania,Uganda na Congo)bikiri mu bihugu 30 bya mbere ku isi bifite umubare munini w’abarwayi b’igituntu akaba ariyo mpamvu dusabwa kutirara.’’

Ngabonziza Shema ugororerwa Iwawa watanze ubuhamya bw’uburyo yazahajwe n’igituntu kubera kwanga gufata imiti nk’uko biteganyijwe, yakanguriye abantu kumvira amabwiriza ya muganga.

Ati “Narakororaga cyane nuko umujyanama w’ubuzima anjyana ku kigo nderabuzima cya Masaka bansangamo igituntu bampa imiti ariko nkakomeza kwinywera inzoga n’itabi ndanayihagarika kugeza ubwo nazanywe hano. Ikigo cy’Igihugu gishinzwe Ubuzima cyamfashe ibizamini bantangiza imiti kuburyo nyuma y’amezi abiri natangiye kugarura ibiro. Ndagira inama bagenzi banjye kumvira abaganga kuko iyo ntabagira nari ngiye.’’

Ubwo hatangizwaga ubukangurambaga bwo kurwanya igituntu ku wa 2 Mata 2018 mu rubyiruko rugororerwa mu kigo cya Iwawa rungana na 3983, ibipimo byerekanye ko 285 bafite ibimenyetso by’igituntu. Babiri bari basanganywe iyi ndwara bakaba barahise batangizwa imiti.

Umunsi Mpuzamahanga wahariwe kurwanya indwara y’igituntu wizihizwa buri tariki ya 24 Werurwe.

Nubwo ibihugu byagiye bishyira imbaraga mu kurwanya indwara y’igituntu kugeza ubu iracyahitana abagera kuri 4500 buri munsi ku isi ikaba iri mu bihitana abantu benshi ku isi. Umwaka ushize OMS yagaragaje ko abagera kuri miliyoni 10.4 bari bafite igituntu ; mu 2016 yahitanye abagera kuri miliyoni 1.8.

Dr Migambi Patrick ukuriye ishami rishinzwe igituntu mu Ikigo cy’Igihugu gishinzwe Ubuzima, yavuze ko bihaye intego yo kugabanya igituntu ku kigero cya 80% kandi ko bishoboka urebye aho bavuye
Umuyobozi w’ishami rishinzwe serivisi z’ubuvuzi muri RBC, Dr. Mazarati Jean Baptiste, yatangaje ko bishoboka kurandura indwara y’igituntu mu Rwanda
Urubyiruko rugororerwa Iwawa ahizihirijwe Umunsi Mpuzamahanga wo kurwanya igituntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza