U Rwanda ruri hafi kwesa umuhigo wo kurwanya Sida muri 2020

Yanditswe na IGIHE
Kuya 5 Werurwe 2018 saa 10:06
Yasuwe :
0 0

Nk’uko byagaragajwe n’ubushakashatsi ku mibereho y’abaturage bwakozwe muri 2015, umubare w’abantu babana na virusi itera Sida mu Rwanda uri kuri 3% , igipimo kitigeze gihinduka kuva muri 2005 kugeza ubu kubera ingamba nyinshi zafashwe mu kurwanya iki cyorezo.

Nkuko intego za UNAIDS zibisaba u Rwanda na rwo rwiyemeje ko mu cyerekezo 2020 abantu bagera kuri 90% bagomba kuba bazi uko bahagaze.

Muri uwo mwaka wa 2020 kandi 90% y’abazaba bafite virusi itera Sida bazaba barashyizwe ku miti igabanya ubukana bwa Sida. Muri uwo mwaka abantu bari ku miti igabanya ubukana bwa Sida 90% bazaba bafite virusi nke cyane mu mubiri (<1000copies/ml.)

Aho u Rwanda ruhagaze ugereranyije n’iyi ntego ya 90-90-90

Muri 2013-2014 ubushakashatsi kuri Virusi itera Sida mu Rwanda bwerekanye ko abantu 90.4% babana na virusi itera Sida bazi uko bahagaze. Imibare itangazwa na Ministeri y’ Ubuzima hamwe n’ ishami ry’ Umuryango w’ Abibubumbye rishinzwe kurwanya Sida , yerekana ko 93% y’abantu bafite virusi itera Sida bazi uko bahagaze ubu bari ku miti. Mu barwayi bose bari ku miti igabanya ubukana bwa Virusi itera Sida , 88.04% bafite virusi nke cyane mu mubiri (<1000/ml). Iyi mibare igaragaza ko intego ya kabiri ijyanye n’umubare w’abantu bari ku miti ugereranyije n’abakwiye kuba bayiriho u Rwanda rwamaze kuyirenza.

Ibyo byose u Rwanda rubigeraho kubera ingamba zirimo gupima virusi itera Sida ku bantu benshi hibanzwe ku bantu bafite ibyago byinshi byo kwandura nk’abakora umwuga w’uburaya, gupima imiryango y’ abantu bose bafite virusi itera Sida.

Iyo urebye imibare y’abitabira kwipimisha virusi itera Sida usanga ishimishije ku buryo mu mwaka wa 2016-2017 hipimishije abantu 3 107 717, muri bo abasanze baranduye bari 0.71% gusa. Ibyo byagezweho kubera ko hashyizweho ingamba zitandukanye harimo gukwirakwiza udukingirizo, mu minsi ishize hanashyizweho utuzu batangiramo udukingirizo ku buntu ahantu bigaragara ko hakorerwa ubusambanyi cyane, gushyiraho uburyo bwo kwipima na byo bifasha u Rwanda mu kongera umubare w’abamenya uko bahagaze bityo ntibanduze abandi.

Kuba Abanyarwanda basobanukiwe vuba kandi bitabira gahunda yo gukeba/gusiramura abagabo byatumye u Rwanda rugabanya ubwandu bushya bwa virusi itera Sida. Igipimo cy’abagabo basiramuwe cyageze kuri 30% muri 2015 kivuye kuri 13% muri 2010 kandi buri muntu wese usiramuwe asabwa kwipimisha ku bushake bwe.

Indi ngamba yatangiye muri Kamena 2016 ni ijyanye n’uburyo bwiswe “bavurwe bose” cyangwa “ treat all” aho bapima abantu virusi itera Sida maze abagaragaweho ko bayanduye bagahita bashyirwa ku miti igabanya ubukana.

Ubwo buryo bwatumye abantu bashyirwa ku miti biyongera bava kuri 164,252 muri Kamena- 2016 bagera kuri 185,746 muri Ukuboza 2017.

U Rwanda kandi rwafashijwe no kwita ku byiciro byugarijwe kurusha ibindi harimo abakora umwuga w’uburaya, abaryamana bahuje ibitsina, abagabo cyangwa abagore bakora imirimo ituma baba kure y’ingo zabo abo twavuga nk’abakora ingendo zambukiranya imipaka, abarobyi, urubyiruko. Ibindi byiciro twitaho birimo abanyeshuri n’abagororwa bashishikarizwa kwirinda Sida n’izindi ndwara zandurira mu mibonano mpuzabitsina.

U Rwanda rwashyize imbaraga mu kurwanya SIDA mu bagore bakora umwuga w’uburaya rubakangurira gukoresha agakingirizo no kwibumbira mu mashyirahamwe azabafasha kuva mu mwuga w’ uburaya.

U Rwanda rwongereye ubushobozi bwa Laboratwari zishobora gupima amaraso , rukaba rugeze mu rwego rwo kubasha kubona virusi itera SIDA mu maraso , hatarinzwe gushakisha abasirikare barinda umubiri.

Uyu mwaka, hanatangijwe uburyo bwo kwipimisha virusi itera SIDA mu kanwa (Oral self testing).

Intego u Rwanda rufite, ni uko buri wese utarandura agakoko gatera sida yakwirinda ntihagire abandura bashya, ariko n’abagize ibyago byo kwandura bagahabwa amahirwe yose yo kubimenya no kuvurwa.

Isuzuma ryakozwe n’abafatanyabikorwa ba Ministeri y’Ubuzima mu mezi abiri ashize, ryagaragaje ko u Rwanda ruri mu bihugu bike bizagera ku ntego za 90/90/90 mu minsi ya vuba.

Minisiteri y'Ubuzima itangaza ko imibare y’abitabira kwipimisha virusi itera Sida ishimishije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza