Kwamamaza

U Rwanda ntirutewe impungenge no guhagarara k’umushinga urwanya Sida mu bashoferi

Yanditswe kuya 23-09-2016 saa 14:32' na Philbert Hagengimana


Nubwo Umushinga ‘Fhi Roads Rwanda’ wa Fhi 360 uhagaritse ibikorwa, ngo nta mpungenge icyo cyuho giteye kuko abagenerwabikorwa basigaranye ubushobozi bwo kwikorera ibyo uwo mushinga wabafashagamo.

Abashoferi b’amakamyo ni bamwe mu bibasirwa cyane n’ubwandu bw’agakoko gatera Sida, bakura ahanini mu nzira banyuramo iyo bambukiranya imipaka, bakaba kandi no mu ba mbere bakwirakwiza ubwo bwandu.

Abo kimwe n’abarobyi mu kiyaga cya Kivu ndetse n’abakora umwuga w’uburaya mu bice bihagararamo amakamyo, ni bo Umushinga ‘Fhi Roads’ washyiriweho mu mwaka wa 2006, ngo ubakoremo ubukangurambaga bushingiye ku kurwanya icyorezo cya SIDA, ufashe ababana n’ubwandu kubona imiti.

Uwo mushinga wasojwe ku mugaragaro kuri uyu wa 23 Nzeri 2016, watewe inkunga na USAID yawushoyemo akayabo ka miliyoni 24 z’amadolari ya Amerika.

Guhagarara kwawo ngo nta mpungenge biteye Leta y’u Rwanda, kuko urwego wari ugejejeho abafatanyabikorwa bawo, Minisiteri y’Ubuzima hamwe n’abafatanyabikorwa bayo, bazakomerezaho nk’uko bitangazwa na Dr Turate Innocent, Umuyobozi mukuru ushinzwe kurwanya Sida n’izindi ndwara muri RBC.

Dr Turate yagize ati “Ikigaragara, basize ayo matsinda y’abagenerwabikorwa yihagije ngo abe yakomeza ibikorwa, byaba ibibyara inyungu, gupima no kwita ku bafite ubwandu, Ministeri y’Ubuzima izahita ikomerezaho, biciye mu bafashamyumvire (Clinical Mentors) bo mu Turere.”

Mu myaka 10 uyu mushinga umaze, wakoze byinshi nk’uko bigaragazwa na Dorothy Muroki, Umuyobozi w’umushinga Roads muri Fhi 360.

Muroki yagize ati “Uyu mushinga wibanze cyane ku cyorezo cya Sida n’izindi serivisi z’ubuzima. Twanabafashije kubaka ubushobozi bwo kurwanya ubukene, kuko ari kimwe mu bibongerera ibyago byo kwandura Sida, tubahugurira kwibumbira mu makoperative no kwizigama, ndetse no kuba babasha gukorana n’ibigo by’imari.”

Mu bagenerwabikorwa b’uwo mushinga hari harimo n’abakora uburaya mu bice bihagararamo amakamyo, ahari udusanteri tw’uburobyi ndetse n’ahandi hari ibyago byinshi byo gukwirakwiza ubwandu bwa Sida cyane kurusha ahandi.

Umwe mu bakoraga uburaya mu Karere ka Rubavu yatangaje ko urwego amaze kugeraho mu myaka itandatu amaze ari umugenerwabikorwa w’umushinga Roads wa Fhi 360, byamugaruriye icyizere cy’ejo hazaza nk’umuntu ubana n’ubwandu bw’agakoko ka Sida, ndetse ngo mu 2020 arateganya kuzaba afite iguriro rigezweho (Supermarket).

Ati “Tutarinjira muri uyu mushinga nta cyizere cy’ejo hazaza twari dufite, twanywaga ibiyobyabwenge, ntacyo twari tuzi ku kuboneza urubyaro, tugakora imibonano mpuzabitsina idakingiye ntacyo twikanga kuko twumvaga ubuzima bwacu bwararangiye.”

Akomeza avuga ko uwo mushinga waje ubasubiza intege mu bugingo, ati “Aho uyu mushinga uziye, baradufashe turi abakobwa 456 mu Karere ka Rubavu, bakuramo abakangurambaga 46, baraduhugura,… dufata iya mbere mu kwipimisha, bakadusuzuma buri mezi atatu, abanduye bakabaha imiti.”

Guhagarara k’umushinga ngo nta mpungenge bibateye, kuko wabahuguye mu kuzigama no kugurizanya, ndetse ngo ubushobozi bafite buzatuma bakomeza gutera imbere.

Mugabekazi akomeza agira ati “Baduhuguye no kuzigama no kugurizanya, dutangirira ku mafaranga 100, uyu munsi tugeze ku mafaranga 1000. Buri wese abasha gukoresha amaboko ye, twabashije kwigurira mitiweli buri wese n’umuryango we, mbese badusigiye icyizere cy’ejo hazaza.”

Umushinga Roads Rwanda wa FHI 360 watangiye mu 2005, muri iyi myaka 10 ukaba warakozwe mu byiciro, aho icya gatatu (Roads III Rwanda) ari cyo cyanawushoje ku mugaragaro kuri uyu wa 23 Nzeri, cyatangiye mu 2013.

Roads III Rwanda, Fhi 360 yabashije kugeza ubutumwa bwo kurwanya Sida ku bantu b’ibanze 17.736, mu gihe abandi 32.126 bapimwe ubwandu bw’ako gakoko kandi bagahabwa ibisubizo.

Abashoferi 1.906 bahawe serivisi z’ubuzima zirimo n’izihabwa abafite ubwandu bw’agakoko gatera SIDA, kimwe n’abarobyi mu Kiyaga cya Kivu bagera ku 1.776, bo banatewe inkunga zatuma barushaho gutera imbere mu bukungu.

Umushinga FHI Roads, wakoreraga mu bihugu umunani muri Afurika n’u Rwanda rurimo, ukaba wibanda ku bashobora kugira ibyago byo kwandura no gukwirakwiza vuba virusi itera SIDA, nk’abakora uburaya, abashoferi batwara amakamyo manini, abapolisi,abasirikare n’abandi.

Bamwe mu bagenerwabikorwa ba Roads-Rwanda
Dorothy Muroki, Umuyobozi w'Umushinga Roads wa Fhi 360
Anastase Nzeyimana, Umuyobozi wa ROADS III Rwanda
Umuyobozi wungirije wa USAID Rwanda, Lars Klassen n'Umuyobozi wa Roads Rwanda muri Fhi 360, Dorothy Muroki

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 24 September 2016
Copyright © 2009 -2014 - IGIHE Ltd - All Rights Reserved