U Rwanda ku mwanya wa mbere ku isi mu kugira ababyeyi benshi bonsa amezi atandatu nta mfashabere

Yanditswe na Mukaneza M.Ange
Kuya 1 Kanama 2017 saa 05:57
Yasuwe :
0 0

Ubushakashatsi bwakozwe n’Umuryango Global Breastfeeding Collective, ku bufatanye n’Umuryango w’Abibumbye bwagaragaje ko u Rwanda ruza ku mwanya wa mbere mu kugira umubare munini w’ababyeyi bonsa abana babo amezi atandatu ya mbere badahabwa imfashabere.

Ubu bushakashatsi bwagaragaje ko mu Rwanda ababyeyi bitabira konsa nta mfashabere mu mezi atandatu bari ku kigero cya 87%, bagakurikirwa n’u Burundi buri kuri 83%, mu gihe Chad na Djibouti biza mu myanya ya nyuma aho biri kuri 0 na 1%.

Nubwo u Rwanda ruri imbere ariko, ubu bushakashatsi bwashyizwe hanzwe kuri uyu wa Kabiri bwasanze byinshi mu bihugu byaba ibikize cyangwa ibikennye, bidashyiraho uburyo bunoze bwatuma ababyeyi bitabira konsa.

Reuters dukesha iyi nkuru ivuga ko ubu bushakashatsi bwagaragaje ko 40% by’abana bato aribo bonkejwe amezi atandatu nta mfashabere bahabwa nk’uko bitangwamo inama n’Ishami ry’Umuryango w’Abibumbye ryita ku buzima (OMS).

Uyu mubare uramutse ugeze kuri 50% mu 2025 ngo byagira uruhare mu kurokora ubuzima bw’abana basaga ibihumbi 520 no kwinjiza mu bukungu asaga miliyari 300 z’amadolari mu gihe cy’imyaka 10.

Mu bihugu byateye imbere nka Leta Zunze Ubumwe za Amerika usanga konsa bititabirwa aho ¼ cy’abana bari munsi y’amezi atandatu aribo bonka nta kindi bavangiwe, mu gihe mu Bushinwa honka umwana umwe muri batanu.

Aya mafaranga yakwinjizwa binyuze mu kugabanuka kw’indwara, ikiguzi cya serivisi z’ubuzima, no kuba abantu barushaho gukora no gutanga umusaruro mwiza.
Umuyobozi w’Ishami rya Loni ryita ku bana, UNICEF, Anthony Lake yatangaje ko kuba nta mbaraga zishyirwa mu konsa, bikomeje kugira ingaruka zikomeye ku buzima bw’abana n’ababyeyi.

Umuryango Global Breastfeeding Collective uhuriwemo n’amatsinda agera kuri 20 uhamagarira ibihugu gushyiraho uburyo bworohereza ababyeyi konsa igihe bari mu kazi ndetse no kurushaho kugenzura imenyekanisha ry’ibisimbura amashereka kuko nubwo bifite intungamubiri zituma umwana akura, bidafite ubushobozi bwo kumurinda indwara.

Umuyobozi mukuru wa OMS, Tedros Adhanom Ghebreyesus yasobanuye ko amashereka nk’urukingo rwa mbere rurinda umwana kwibasirwa n’indwara z’ibyorezo bishobora kumuhitana.

Konsa umwana mu mezi atandatu ya mbere nta kindi umuvangiye bimurinda indwara zirimo umusonga, impiswi, ndetse bikanatuma arushaho gukura neza haba mu bwenge no mu gihagararo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza