Kwamamaza

U Rwanda ku isonga mu kugabanya impfu zituruka ku ndwara z’ubuhumekero

Yanditswe kuya 10-10-2016 saa 22:08' na Philbert Hagengimana


Ubushakashatsi bwakozwe ku ndwara zigera kuri 300 mu bihugu 195 ku Isi, bwagaragaje ko hari intambwe imaze guterwa mu kugabanya impfu zishamikiye ku ndwara zitandukanye, ndetse ko muri Afurika yo munsi y’ubutayu bwa Sahara, u Rwanda rufite umubare muto w’abahitanwa n’indwara z’ubuhumekero.

Raporo y’Ubushakashatsi bukorwa buri mwaka “Global Burden of Diseases, Injuries, and Risk Factors Study (GBD)” yatangajwe muri Lancet, ikinyamakuru cyandika inkuru z’ubuzima mu Bwongereza, yagaragaje ko ibihugu byinshi bya Afurika y’u Burasirazuba byakoze iyo bwabaga mu kugabanya impfu ziterwa n’indwara z’ubuhumekero.

Ubwo bushakashatsi bwakozwe ku nkunga ya Banki y’Isi, bugaragaza ko abantu 58231 muri Ethiopia bahitanwe n’indwara z’ubuhumekero, mu gihe mu Rwanda ho ari 8 181 mu 2015.

Muri Kenya, ubwandu bw’agakoko gatera SIDA ni bwo buza ku isonga mu kugarika ingogo, aho indwara zibushamikiyeho zahitanye abagera ku 46 577 mu 2015.

Umwarimu mu ishami ry’Ubuvuzi muri Kaminuza ya Stellenbosch mu Mujyi wa Cape Town, muri Afurika y’Epfo, akaba umwe mu bantu 1800 ku Isi bafasha mu bushakashatsi bwa GBD, Dr. Charles Shey Wiysonge, yatangaje ko hari intambwe yatewe mu kugabanya impfu mu bihugu byinshi, ariko ngo hari n’ibindi bikiri kure.

Ati “Ibihugu byinshi bifite imbogamizi zo kurengera ubuzima nubwo hari iterambere ry’ubukungu, uburezi no kuringaniza imbyaro, mu gihe ibindi bihugu byitwa ko bikiri inyuma mu iterambere byagaragaje impinduka.”

Iyi raporo kandi yerekana ko impfu z’abana mu bihugu byinshi byo munsi y’ubutayu bwa Sahara zagabanutse kimwe n’izishamikiye ku ndwara zandura.

Iyo raporo igaragaza ko mu bihugu byo mu Burasirazuba bwa Afurika yo munsi y’Ubutayu bwa Sahara, u Rwanda rufite umubare muto w’abana bapfa batarageza imyaka itanu, aho mu mwaka wa 2015 hapfuye abagera ku 23768, mu gihe ibindi bihugu nka Kenya hapfuye abagera ku 79 236 na 189 636 muri Ethiopia, mu gihe ku Isi hose hapfuye abana 5 800 000.

Hanagaragaye igabanuka ry’umubare w’ababyeyi bapfa babyara muri icyo gice, aho nko mu Rwanda, bavuye ku 2 142 babarurwaga mu 1990, bagera ku 1 353 mu 2015. Muri Tanzania ho ikigereranyo cy’izo mpfu cyavuye kuri 544 mu 100,000 (544/100.000) kigera kuri 338 hagati ya 1990 na 2015.

Ku rwego rw’Isi, icyizere cyo kubaho cyavuye ku myaka 62 mu 1980 kigera ku myaka 72 mu 2015. Mu myaka 25 ishize, kubaho igihe kirekire byagiye byiyongera bitewe na buri karere, aho mu 2015, muri Tanzania igihe cyo kubaho cyari kigeze ku myaka 64, 61 muri Uganda, 57 muri Zambia, 54 muri Somalia, mu gihe mu Rwanda byari imyaka 64.

Ubu bushakashatsi bwatangiye gukorwa mu 1990, muri uyu mwaka abashakashatsi babukoze ahanini bashingiye ku bipimo by’imibereho y’ingo, uburezi, ibyo abaturage binjiza n’ibindi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved