SFH ihangayikishijwe n’abana bagwingira batarageza ku myaka itanu

Yanditswe na Jean Pierre Tuyisenge
Kuya 18 Gashyantare 2017 saa 01:26
Yasuwe :
0 0

Ubushakashatsi ku buzima n’uburumbuke bw’Abanyarwanda(Rwanda Demographic and Health Survey (RDHS) bwakozwe mu 2015, bwagaragaje ko 38% by’abana bagwingiye bataruzuza imyaka itanu.

Ni ikibazo umuryango wita ku buzima mu Rwanda, SFH Rwanda uvuga ko gishingiye ahanini ku myumvire, kugira amakuru make no kudahuza mu mikoranire hagati ya Sosiyete civile n’iznzego zishinzwe kurwanya imirire mibi bigatuma harushaho kugagaraga icyo kibazo.

Ubwo bushakashatsi bwanagaragaje ko abana 7.7% bafite ikibazo cy’umubyibuho ukabije mu Rwanda hose mu gihe Umujyi wa Kigali wonyine wihariye 9.9%.

Umuyobozi mukuru wa SFH Rwanda, Manasseh Gihana Wandera avuga ko ari ikibazo gikwiye gufatirwa ingamba ndetse buri wese akakigiramo uruhare ari nayo mpamvu SFH Rwanda yo yahisemo kuba Umunyamuryango w’Ihuriro ry’imiryango itegamiye kuri Leta irwanya imirire mibi mu Rwanda (Sun Alliance).

Yagize ati “Ibi ni ibibazo bikomeye,kandi bikenewe ko abantu bose babimenya ndetse bakanahuza mu gushaka icyo bakora, niyo mpamvu dutanga igisubizo ku bantu tubigisha, tubahugura.”

Yongeyeho ati “ Burya imirire mibi iri mu buryo butandukanye: kubura ibyo kurya umuntu akagwingira ariko no kubyibuha cyane na yo ni imirire mibi; niwo uvamo indwara za diyabete.”

Avuga ko hari ubwo umuntu afata ibiryo byuzuye isahani adasobanukiwe n’amoko y’ibiribwa ngo amenye ibitera imbaraga, ibyongera amaraso, ibirinda indwara cyangwa ibyubaka umubiri ibyo ari byo.

Ati “Abantu bakeneye kubimenya bakabisobanukirwa ni yo mpamvu twe nka SFH dufite uruhare rukomeye kugira ngo twigishe abantu ariko tunafite ubufasha mu buryo bw’imirire.”

Ubwo bufasha SFH yabutekerejeho mu rwego rwo guhangana n’ikibazo cy’imirire mibi hitabwa ku bana n’abagore batwite bakeneye kongererwa intungamubiri, hifashishijwe ifu yitwa Kuza Neza, ifasha mu kongera intungamubiri, ariko igatuma habaho no gukura neza ku bana.

SFH itangaza ko kugeza ubu Kuza Neza batangiye kuyitanga mu Ntara y’Uburasirazuba.

Ni agafu baminjira mu biryo kagatuma umwana muto cyangwa umugore utwite abasha kugira ubuzima bwiza ndetse n’abana bagwingiye kakabasha kubasubiza ubuzima.

Umuyobozi mukuru wa SFH Rwanda, Manasseh Gihana Wandera avuga ko ikibazo cy'imirire mibi gikwiye gufatirwa ingamba ndetse buri wese akakigiramo uruhare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza