RBC yafunguye Ikigo kizajya gitanga amahugurwa ku gufata no gutanga amaraso

Yanditswe na Mukaneza M.Ange
Kuya 10 Gashyantare 2017 saa 12:18
Yasuwe :
0 0

Ikigo cy’Igihugu gishinzwe Ubuzima, RBC cyafunguye Ikigo cyo ku rwego rwa Afurika kizajya gihugura abantu mu bijyanye no gufata, gutunganya no gutanga amaraso.

Iki kigo cyafunguwe kuri uyu wa 10 Gashyantare 2017, ku bufatanye bwa RBC n’Ihuriro Nyafurika riteza imbere ubuvuzi bukoresha amaraso (AfSBT), kikaba kizakorera i Remera mu mujyi wa Kigali.

Kizajya kiberamo amahugurwa n’inama ku gufata no gutanga amaraso ku rwego rwa Afurika.

U Rwanda kandi rwahawe icyemezo cyo ku rwego rwa gatatu (Level 3 Accreditation) kigaragaza ko rufite ibikoresho bihagije n’inzobere mu kwakira no gutunganya amaraso ku buryo ubuziranenge bwayo buba bwizewe.

Iki cyemezo kiri ku rwego rwo hejuru muri Afurika na mpuzamahanga u Rwanda rwakibonye nyuma y’ubugenzuzi bwakozwe na AfSBT. U Rwanda na Namibia nibyo bihugu byonyine byo muri Afurika bifite iki cyemezo.

Minisitiri w’Ubuzima, Dr Diane Gashumba yavuze ko kuba iki kigo gifunguwe mu Rwanda bizagira uruhare mu gutuma abantu bitabira gutanga amaraso n’atangwa akarushaho kugira ubuziranenge biturutse ku bumenyi buzajya buhatangirwa.

Ati” Ntabwo twahawe iki cyemezo kubera ko u Rwanda ari igihugu kigira indwara nyinshi zikenera amaraso. Impamvu twahawe iki cyemezo n’uko u Rwanda rwakorewe isuzuma basanga twujuje ibisabwa kugira ngo igihugu gihabwe icyemezo cy’ubuziranenge bwa serivisi zitanga amaraso.”

Yakomeje avuga ko u Rwanda rusanzwe rwaratangiye gukoresha uburyo bugezweho mu kuvangura nibice bigize amaraso kugira ngo umurwayi ahabwe arimo ibyo akeneye, uburyo bwo kuyitaho kugeza ageze kuyakeneye.

Umuyobozi wa AfSBT, Gabriel Muyimba yavuze ko mu myaka ine ishize aribwo batangiye gushyiraho inzego z’ubuziranenge bw’amaraso kandi ibihugu akaba aribyo bisaba gukorerwa ubugenzuzi.

Yakomeje kandi avuga ko babonye ikimenyetso ko ubuyobozi bwiza ntacyo butageraho kuko ari bwo bwatumye u Rwanda rutanga ibikoresho n’ahantu ho gushyira ikigo kizajya gikorerwamo amahugurwa ku bijyanye no gukusanya amaraso, kuyatunganya no kuyabika neza.

Umuyobozi w’Ikigo cy’igihugu gishinzwe gutanga amaraso, Dr Kitare Swaibu yavuze ko u Rwanda ruza mu bihugu bike bifite abaganga b’inzobere mu bijyanye no gutanga amaraso, bityo bakaba bazoroherwa no guhugura abazajya babagana.

Imibare itangwa na Minisiteri y’ubuzima igaragaza ko mu Rwanda abagera ku bihumbi 25 biganjemo abanyarwanda aribo bahora batanga amaraso.

Ibikorwa byo gutanga amaraso ariko bigenda birushaho kwiyongera aho nko mu 2000 hari hatanzwe udushashi tugera ku 22 970, mu 2016 tukagera ku 61 109. Amaraso atangwa abasha guhaza ibitaro biyakeneye ku kigero kiri hejuru ya 90%.

[email protected]

Iki kigo kizajya gikorera muri RBC i Remera mu Mujyi wa Kigali
Ubwo iki kigo cyafungurwaga ku mugaragaro
Umuyobozi wa AfSBT,Gabriel Muyimba n'Umuyobozi wa RBC, Jeanine Condo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza