Perezida Kagame yanenze uburyo ibihugu bikize biri kwikubira inkingo za Covid-19

Yanditswe na IGIHE
Kuya 23 Gashyantare 2021 saa 10:27
Yasuwe :
0 0

Perezida Paul Kagame yanenze uburyo ibihugu bikize bikomeje kwikubira inkingo za Covid-19, mu gihe hari ibihugu bikiri mu nzira y’Amajyambere bitarazibona kandi isi ikwiriye gufatanya kurwanya icyo cyorezo kugira ngo gicike burundu.

Perezida Kagame yabitangaje kuri uyu wa Kabiri nyuma y’ubusabe bw’Umuyobozi Mukuru w’Umuryango Mpuzamahanga wita ku buzima (OMS), Dr Tedros Adhanom Ghebreyesus, wavuze ko icyorezo kitahashywa nta bufatanye.

Mu nkuru yatambutse kuri Aljazeera, Dr Tedros yavuze ko ubwumvikane bimwe mu bihugu bikize byagiranye n’inganda ziri gukora inkingo za Covid-19, buri kudindiza gahunda ya Covax yo kugeza inkingo kuri bose.

Yavuze ko ubwo bwumvikane buri gutuma inkingo zijya muri ibyo bihugu bikize gusa hanyuma izagombaga kugurwa muri Covax zikaba nke.

Ibihugu bikize byamaze gutumiza miliyoni z’inkingo ndetse hari ibyamaze gutumiza inkingo zirenze izikenewe ngo bikingire abaturage babyo, mu gihe ibihugu bikiri mu nzira y’Amajyambere ibyinshi nta nkingo na nke birabona.

Umuyobozi Mukuru wa OMS, Tedros Adhanom Ghebreyesus yavuze ko ubwo bwumvikane ibihugu bikize bikomeje kugirana n’inganda zikora inkingo za Covid-19 “buri kugira ingaruka kuro COVAX ku buryo n’ingano y’izari zagenewe COVAX yagabanyutse kubera iyo mpamvu.”

COVAX ifite intego yo kuzageza inkingo 20% mu bihugu binyamuryango bitarenze uyu mwaka, bityo ibyiciro by’abantu bikunze kwibasirwa n’iki cyorezo, birimo abakora mu nzego z’ubuzima, abakuze n’ababana n’indwara karande, bagakingirwa maze ibyo bikaba umusingi wo guhashya Coronavirus.

Nubwo Tedros atigeze avuga ibihugu biri kwikubira inkingo, yavuze ko nta cyizere cyo kurandura Covid-19 cyabaho hatabayeho ubufatanye no gusaranganya.

Yagize ati “uburyo bwiza bwo kwirinda si ukwikingira wenyine ahubwo ni ugukingira bose, mugasangira inkingo n’abandi. Iyi virusi ntabwo yatsindwa tudafatanyije. Bizatuma yihisha ku buryo yakongera ikabyutsa umutwe.”

Perezida Kagame abinyujije kuri Twitter, yunze mu rya Tedros avuga ko ibiri gukorwa n’ibihugu bikize bidakwiriye.

Yagize “Ibi ni uburyarya kandi ntibikwiriye nkuko twakunze kubivugaho. Uru ni rumwe mu ngero nyinshi zigaragara.”

Mu nyandiko aherutse kunyuza mu kinyamakuru The Guardian cyo mu Bwongereza, Perezida Kagame yavuze ko kwikubira inkingo ku bihugu bikize biteye inkeke.

Yagize ati “Hari ibimenyetso biteye inkeke ku kwikubira inkingo mu Burayi no mu Majyaruguru ya Amerika. Igitutu kiri ku banyepolitiki cyo gukingira abaturage babo bose mbere yo gusangira inkingo n’abandi kirumvikana ariko kumvisha ibihugu bikennye ko bigomba gutegereza ngo buri wese mu majyaruguru akingirwe ni ukutareba kure.”

“Gutinza kugeza inkingo ku baturage b’ibihugu bikiri mu nzira y’iterambere bifite ikiguzi kinini cyane. Icyorezo kizakomeza kwerekana ubukana no guhungabanya ubukungu bw’Isi.”

Perezida Kagame yavuze ko gusaranganya inkingo mu bihugu bikize n’ibikennye ari yo ntango yo kuba ubucuruzi mpuzamahanga bwakongera gufungurwa, ubuhahirane bugashoboka.

Icyo gihe Perezida Kagame yavuze ko hari igihugu cya Afurika cyagiye kugura inkingo za Covid-19, gisabwa kwishyura igiciro gikubye kabiri icyo Umuryango w’Ubumwe bw’u Burayi wahereweho urukingo nk’urwo.

Yavuze ko ubusanzwe kongera ibiciro by’ibikoresho by’ingenzi byongeye bigakorwa mu bihe by’amage, bihabanye n’amategeko, asaba ko byahinduka.

Kugeza ubu ibihugu bike ku Mugabane wa Afurika nibyo byatangiye ibikorwa byo gukingira COVID-19 kandi ibyinshi muri ibi birimo n’u Rwanda byatangaje ko umubare w’inkingo byabonye ari muto cyane ku buryo zizakingira abaturage bake.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .