Nyamasheke: Ibitaro bya Kibogora byabonye imashini igezweho yifashishwa mu kubaga

Yanditswe na Sitio Ndoli
Kuya 27 Ugushyingo 2017 saa 01:17
Yasuwe :
3 0

Ibitaro bya Kibogora biherereye mu karere ka Nyamasheke byahawe imashini izajya ifasha abaganga kubona amafoto y’agace k’igufa bashaka kubaga kuko mbere byabagoraga bigatuma babaga abarwayi bake.

Iyi mashini (C-arm) igura asaga miliyoni 75 z’amafaranga y’u Rwanda, yatanzwe ku nkunga ya Rotary Club ya Kigali; iyo mu Budage na Rotary Club International.

Umuyobozi w’Agateganyo w’Ibitaro bya Kibogora, Dr Nsengiyumva Nathanael, avuga ko ubundi bari basanzwe bakoresha uburyo bwa kera butuma bamara igihe kinini babaga igufa ry’umurwayi ku buryo basubiragmo inshuro nyinshi kubera kutabona neza aho babaga.

Ati “Twabagaga umuntu tukazana umusumari tugashyiramo ubundi tukajyana ifoto mu cyuma, twabona bitameze neza n’ubundi tukongera tukawushyiramo bundi bushya, tugafata ifoto byaba bitameze neza n’ubundi ukongera kugeza igihe biri buze kumerera neza. Urumva ushyiramo umusumari utaharuzi neza usa n’ukabakaba, icya kabiri bitwara igihe.”

Izi mbogamizi ni zo abaganga b’amagufa bo mu Budage bahuye na zo ubwo bajyaga kwitangira kubaga mu bitaro bya Kibogora maze bafata umwanzuro wo gukora ubuvugizi ngo haboneke iyi mashini nk’uko bisobanurwa na Ndoba Mugunga ukuriye Rotary Club International mu Rwanda.

Ati “Iki cyuma kizenguruka umurwayi gifata amafoto aho abaganga bakeneye, impamvu cyaje ku bitaro bya Kibogora ni uko hari abaganga dukorana basanzwe baza hano mu bukorerabushake, byarabagoraga cyane ni bwo bagize igitekerezo cyo gushaka kiriya cyuma.”

Dr Nsengiyumva avuga ko iyi mashini igiye gutuma babaga abarwayi neza kubera ko bazajya bareba buri gace bagiye kubaga bigatuma babasha kugeza ku mubare w’abarwayi biyemeje kubaga ku munsi.

Ati “Niba byafataga umwanya mu kubaga abantu batanu baziyongera babe nka barindwi; byatunaniraga no kurangiza abantu bari bapanzwe ku munsi. Ubundi kubaga byashoboraga kumara amasaha atatu ariko ubu ngubu izajya imara isaha imwe.”

Ubuyobozi bw’Akarere buvuga ko iyi mashini igomba gucungwa neza kugira ngo ikoreshwe mu kwita ku bagana ibi ibitaro bya Kibogora.

Iyi mashini yitezweho gufasha abaganga kubona neza igice cy'igufa bagiye kubaga
Abayobozi barimo aba Rotary Club n'ibitaro bya Kibogora nyuma yo kwakira iyi mashini

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza