00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Hatanzwe imashini 16 zipima ubuzima bw’umubyeyi n’umwana atwite

Yanditswe na Claude Bazatsinda
Kuya 2 Nzeri 2021 saa 07:53
Yasuwe :
0 0

Umuryango utari uwa Leta wita ku buzima, Health Builders, wahaye imashini zifashishwa mu gusuzuma ubuzima bw’ababyeyi n’abo batwite ibigo nderabuzima byose byo mu Karere ka Nyabihu.

Izi mashini 16 zitezweho gutanga umusanzu mu gukumira no kugabanya ibyago by’impfu z’abana n’ababyeyi.

Zitezweho kandi gufasha ababyeyi baganaga ibi bigo nderabuzima bakeneye iyi serivisi ariko bakayibona ari uko boherejwe mu bitaro bifite ubushobozi bwisumbuyeho kuko itari isanzwe itangirwa mu bigo nderabuzima.

Bamwe mu baturage bafite aho bahurira n’ibikorwa by’ubuzima mu Karere ka Nyabihu, bavuze guhabwa izi mashini babyishimiye cyane kuko bajyaga bagorwa no kubona serivisi ya Echographie bikabasaba kujya kuzishakira kure abandi bakajya kubyara batazi uko ubuzima bwabo n’ubw’abana bumeze, rimwe na rimwe bikabagiraho ingaruka.

Habiyambere Emmanuel, umwe mu bajyanama b’ubuzima wo mu Murenge wa Shyira, yagize ati "Twahawe amahugurwa mu gukurikirana ubuzima bw’ababyeyi n’abana none duhawe n’imashini yo gupima ababyeyi batwite.”

“Ubu tugiye kubibwira abaturage bamenye ko ubu iyi serivisi igiye kujya itangirwa ku Kigo Nderabuzima kuko mbere uwayikeneraga yajyaga ku Bitaro bya Shyira cyangwa akajya mu yandi mavuriro yigenga mu mijyi iteye imbere bikamuhenda cyane."

Mugenzi we, Muteteri Collette, yavuze ko bajyaga bahura n’ikibazo cy’aho umubyeyi yajyaga ajya kubyara atazi ubuzima bw’umwana uri mu nda.

Ati “Umubyeyi yajyaga kubyara atazi neza uko umwana ameze munda, kandi hari igihe biba bishoboka ko umwana cyangwa umubyeyi batameze neza bikaba byamugiraho ingaruka zirimo n’urupfu cyanga ubumuga, ubu tugiye kujya tubakurikirana neza nta mpungenge ndetse n’ahari ikibazo kibe kizwi umubyeyi afashwe."

Umukozi ushinzwe guhuza ibikorwa by’abajyanama b’ubuzima n’isuku mu Kigo Nderabuzima cya Shyira, Uwamahoro Marie Rose, yavuze ko kuri ubu bagiye kurushaho gukorana n’abajyanama b’ubuzima begera abaturage kandi ko nta kabuza bizeye ko iyi gahunda izagabanya ingorane zabagaho ziturutse ku babyeyi bari bakibyarira mu ngo.

Ati "Tugiye gukorana n’abajyanama b’ubuzima nabo babigeze ku baturage kandi bazayitabira nta kabuza kuko nabo bari bayikeneye, turizera ko bizagabanya ingaruka z’impfu z’ababyeyi n’abana ndetse n’abajyaga babyarira mu ngo turizera ko bazagabanyuka kuko noneho umubyeyi azaba azi neza igihe nyacyo ashobora kubyariraho."

Umuyobozi w’Ibitaro bya Shyira Dr Mukantwaza Pierrette yavuze ko izo mashini zipima abagore batwite zije zikenewe kuko akenshi abaturage bajyaga bazikenera ariko bakagorwa no kuzibona bitaboroheraga agasaba ibigo nderabuzima kuzifata neza no kuzibyaza umusaruro zitezweho.

Umukozi wa Health Builders, Elias Sebutare yavuze ko ibikorwa nk’ibi biri mu murongo mugari w’uyu muryango n’uwa Leta wo guteza imbere ireme rya serivisi z’ubuzima muri ako karere kagizwe ahanini n’icyaro.

Ati " Iki gikorwa kiri mu murongo mugari wa Health Builders n’uwa Leta y’u Rwanda wo guteza imbere ubuzima bw’umubyeyi n’umwana. Byagaragaye ko izi mashini ababyeyi bazikeneye hafi yabo, none turazibegereje. Turabasaba rero kuzibyaza umusaruro zigakoreshwa icyo zaguriwe kuko nk’akarere kagizwe n’ibice byinshi by’icyaro wasangaga iyi serivisi abaturage batayibonaga, izi mashini nicyo zije gukemura."

Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal, yashimiye abafatanyabikorwa b’Akarere asaba abakora mu buzima kurushaho gutanga serivisi nziza no kwita ku buzima bw’ababyeyi n’abana cyane ko imbogamizi bahuraga nazo ziri kugenda zikemuka.

Muri aka karere kandi, Health Builders ifatanyije na Minisante/RBC, yahuguye abajyanama b’ubuzima 938 ku buvuzi bukomatanyije bw’abana bari munsi y’imyaka itanu. Mu bindi kikorwa bya Health Builders mu karere ka Nyabihu harimo amahugurwa, ubujyanama no gutanga ibikoresho uyu muryango usanzwe ufatanya n’Akarere ka Nyabihu.

Izi mashini zitezweho kugabanya umubare w'abana bapfa bavuga n'uw'ababyeyi bapfa babyara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .