Kwamamaza

Nkombo: Ababyeyi bahangayikishijwe n’abakobwa barongorwa bafite imyaka 16

Yanditswe kuya 3-11-2016 saa 11:38' na Sitio Ndoli


Bamwe mu babyeyi bo ku birwa bigize Umurenge wa Nkombo uri hagati mu kiyaga cya Kivu mu karere ka Rusizi, bavuga ko bahangayishishijwe n’abana b’abakobwa bashaka abagabo bakiri bato, guhera ku myaka 16.

Mu gihe amategeko y’u Rwanda agena ko umuntu ashaka yujuje imyaka 21, muri uyu murenge haracyagaragara abashaka bafite imyaka 16, cyane cyane abakobwa.

Imwe mu mpamvu yaba yihishe inyuma y’uyu muco ufite imizi mu gihe cyo hambere, ngo ni udufaranga abarobyi bashukisha abakobwa, ahanini bo mu miryango itishoboye.

Nyiransekanabanga Domithila ati “Ushatse ari muto aba afite 16, akenshi biterwa n’ubukene bw’abakobwa kandi abadashakanye biciye mu mategeko bagenda nijoro. Ni ikibazo kidukomereye rwose, ntabwo umwana w’umukobwa wa hano wamutegerezaho ibyiza ejo hazaza.”

Bamwe mu babyeyi ariko bavuga ko na kera kose abakobwa bo muri aka gace bashakaga abagabo bakiri bato, akaba ari ho ab’ubu babikomora.

Nyabyenda Florence ati “Ni byo koko natwe twashatswe tukiri bato ariko ugereranyije n’igihe cyacu byari bikwiye, ubu ntibikwiye ko umwana yata amashuri akajya gushaka, akenshi biterwa n’udufaranga bashukishwa n’abasore baroba isambaza.”

Mukabaruta Felecité uri mu kigero cy’imyaka 70 avuga ko yashatse afite imyaka 18 , akemeza ko uyu muco ari karande kuri iki kirwa ariko ko bitagikabije nko mu gihe cyabo kuko ngo bigenda bishira.

Abakobwa baganiriye na IGIHE bavuga ko uyu muco usigaye mu bana b’abakobwa batabashije kujya mu ishuri.

Jeannette Uwabahungu ati “Dushaka turi bato, ni wo muco twasanganye ba mama, abenshi bashaka bafite 16 kuzamura.”

Niwemugore Appoline ati “Akenshi bikorwa n’abana b’abakobwa batize ni bo baba bumva badafite icyizere, bagashukwa n’abarobyi.”

Umunyamabanga Nshingwabikorwa w’Umurenge wa Nkombo, Rwango Jean de Dieu yavuze ko barwanya ko abantu bashakana igihe kitageze ndetse ko iyo basanze uwashakanye n’umukobwa muto we ari mukuru ahanwa n’amategeko nk’uwakoze ihohotera ariko iyo bashakanye bose ari abana, barabatandukanya.

Ati “Keretse iyo bishyingiye, na ho ubundi turabirwanya kuko ntibyemewe.Uwabikoze ari mukuru aba yakoze ihohotera, amategeko aramuhana. Iyo ari abana duhita tubatandukanya tugahuza imiryango yabo tukaganira ku ngaruka mbi bigira ndetse mu nama dukora tubigarukaho, tugaragaza ibibi byabyo.”

Ibirwa bigize umurenge wa Nkombo bituwe n’abaturage bagera mu bihumbi 18, abenshi muri bo bakaba ari urubyiruko nk’uko ubuyobozi bw’uyu murenge bubitangaza.

Ibiro by'Umurenge wa Nkombo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved