Mutesi Jolly ajyanye amatsiko mu Budage ku ikorwa ry’amavuta ya Sebamed arinda gusaza

Yanditswe na Kanamugire Emmanuel
Kuya 16 Nzeri 2016 saa 09:27
Yasuwe :
0 0

Nyampinga w’u Rwanda 2016, Miss Mutesi Jolly ugiye gutemberezwa mu Budage azasura uruganda Sebapharma rukora amoko y’amavuta atadukanye harimo n’arinda gusaza yatangaje ko ikimuteye amatsiko cyane ari ukureba uburyo ayo mavuta akorwa ndetse n’icyo akorwamo.

Ubwo yasuraga farumasi nshya ya Unipharma ifitwe na Kipharma, iherereye ku muhanda wa Poids Lourd,mu mujyi wa Kigali, aho yifurizwaga kuzagira urugendo rwiza yerekeza mu Budage, Mutesi Jolly yabwiye IGIHE ko amavuta ya Sebamed ari meza nk’umuntu uyakoresha, gusa ngo ikimuteye amatsiko cyane ni ukureba uburyo amavuta arinda gusaza akorwa n’ibyo akorwamo.

Uruganda Sebapharma ni rwo rwamuhaye igihembo cyo kujya kurusura akerekwa imikorere yarwo.

Ati”Ndishimye kuko ngiye gusura uruganda Sebapharma ruhagarariwe na Kipharma mu Rwanda akaba ari na rwo rwampaye iki gihembo. Sebapharma bakora ibintu byiza,amavuta n’amasabune yabo ndabikoresha kuko ari mu bihembo bampaye. Rero ndi umuhamya wabyo ko bakora amavuta n’amasabune meza adafite ingaruka ku ruhu.”

Abajijwe ikintu kimuteye amatsiko cyane azihutira kureba muri urwo ruganda mpuzamahanga, Mutesi Jolly yatangaje ko afite amatsiko yo kureba uko bakora amavuta arinda gusaza (Anti-Ageing) ndetse n’icyo bayakoramo kuko yumva ari ibintu bitangaje.

Ati” Ni byinshi nifuza kubona ku mikorere y’uruganda nka ruriya mpuzahamga , gusa ndifuza kubona uko amavuta arinda gusaza akorwa kugeza abonetse, icyo akorwamo n’uburyo yavumbuwe.”

Mutesi Jolly ngo si uruganda rwamuhaye ibihembo azasura gusa kuko azanasura Ambasade y’u Rwanda mu Budage,agasura intara ya Rhenanie Palatinat ifitanye ubufatanye n’uturere two mu Rwanda ndetse azanahura n’abanyawanda baba mu Budage abaganirize ku mushinga we yise ’Agaciro Kanjye Campaign.’

Ati “ Nzagenda ejo tariki ya 17 Nzeri 2016, nzagaruka tariki ya 4 Ukwakira ariko nzaba ndi mu bikorwa bitandukanye nzagirira mu Bufaransa,u Bubiligi n’ahandi. Ibijyanye na Sebamed nzaba ndi kumwe na bo iminsi itatu gusa.”

Ku ruhande rwa Kipharma ari na yo ihagarariye uruganda Sebapharma mu Rwanda, Kadende Lambert ushinzwe ubucuruzi yatangaje ko wari umunsi wo kumwifuriza urugendo rwiza kandi ko Sebapharma yubahirije amasezerano yagiranye n’abashinzwe gutegura irushanwa rya Miss Rwanda.

Ati” Kwari ukumwifuriza urugendo rwiza, Sebamed yubahirije amasezerano yo gutera inkunga Miss mu kugira ingendo zo hanze, kumva no kwibonera imikorere y’inganda n’amasosiyete akomeye yo ku Isi.Inkunga ya Sebapharma na Kipharma mu bikorwa bya Miss Rwanda byose, ihagaze hafi miliyoni 10 z’amafaranga y’u Rwanda”.

Kadende yakomeje avuga ko impamvu bahisemo gusezerera Miss Rwanda 2016, kuri Pharmacie nshya mu zifitwe na Kipharma, ari ukugira ngo abantu bamenye ko ibikoresho byose bya Sebamed bashobora kubihabonera , nkuko babiboneraga mu zindi Pharmacie zifitwe na Kipharma, ndetse no mu yandi mafarumasi n’amasoko manini (Super markets) hirya no hino mu gihugu.

Sebapharma ikora amavuta n’amasabune atandukanye y’abato n’abakuru afite umwihariko wo kugira PH 5,5, ariyo y’uruhu rumeze neza; hari atuma uruhu rworohera neza, atuma izuba ritarwangiza, akuraho amaribori, amasabune, imibavu n’ibindi bituma umuntu akomeza kumera neza, agafasha no kwirinda indwara z’uruhu.

Kipharma ihagariye uruganda Sebapharma mu Rwanda ifite farumasi enye ; hari farumasi yo mu mujyi rwagati ku kicaro gikuru, iya Remera Giporoso izwi kugeza ubu ku izina rya Speranza, Gisimenti ndetse na farumasi nshya bafunguye ku muhanda wa Poids Lourd ahateganya neza n’aho Hyundai ikorera.

Ni ku nshuro ya kabiri Sebapharma yakira Miss Rwanda ku ruganda rwayo.

Miss Mutesi agiye gutemberezwa mu Budage
Mutesi Jolly yeretswe amoko atandukanye ya Sebamed

Amafoto:Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza