00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Hateguwe ibikorwa byo gupima Diabète mu buryo bwa rusange

Yanditswe na IGIHE
Kuya 12 Ugushyingo 2021 saa 10:39
Yasuwe :
0 0

Muri gare ya Kicukiro iherereye i Nyanza, hagiye kubera ibikorwa byo gupima Diabète ndetse hanakorwe ubukangurambaga ku bijyanye n’uburyo umuntu ashobora kwirinda iyi ndwara.

Iki gikorwa kizaba kuva ku wa 13-14 Ugushyingo 2021. Cyateguwe n’Ihuriro rishinzwe kurwanya no gufasha abarwayi ba Diabète, Rwanda Diabetes Association (RDA) ku bufatanye na Kaminuza ya Mount Kenya n’Ikigo cy’Igihugu cy’Ubuzima (RBC).

Uretse gupima diabète ku buntu, muri iki gikorwa hazanatangirwa ubujyanama ku buryo butandukanye bwo kwirinda iyi ndwara no kwimakaza ubuzima bwiza. Bizakorwa n’abanyeshuri biga ubuvuzi muri Mount Kenya University Rwanda.

Umuyobozi wa RDA, Uwingabire Etienne, yavuze ko ari ishema kuba bagiye gukorana n’abanyeshuri ba Mount Kenya University muri ubu bukangurambaga.

Yavuze ko bahisemo gukorana n’abanyeshuri b’iyi kaminuza kuko bizeye ubumenyi bwabo.

Ati “Twahisemo gutumira iyi kaminuza kubera ko bigisha abakora mu nzego z’ubuzima, bashobora gutanga umusanzu wabo kugira ngo tugere ku ntego yacu yo kurinda no gutanga ubuvuzi ku barwayi ba diabète mu gihugu.”

Muri iki gikorwa, aba banyeshuri bazigisha abaturage uburyo bwiza bwo gufatamo umurwayi wa diabète ndetse banabereke uburyo bwo kwirinda umubyibuho ukabije cyane cyane mu rubyiruko.

Umuyobozi wa Mount Kenya University Rwanda, Prof Edwin Odhuno, yavuze ko iyi kaminuza yiteguye gutanga umusanzu wayo mu kubaka urwego rw’ubuzima, binyuze mu guha ubumenyi buhagije abanyeshuri bayigana.

Ati “Tuzi uburyo iyi ndwara ari umutwaro ku bantu bayifite ndetse n’imiryango yabo. Tugomba guharanira gushaka uburyo bushya bwo kurenga inzitizi duhura na zo mu bijyanye no gutanga ndetse no kugera kuri serivisi z’ibanze z’ubuvuzi.”

Umuyobozi w’ishami rishinzwe ubuvuzi muri iyi kaminuza, Dr. Connie Mureith, yavuze ko biteguye gukorana na Guverinoma y’u Rwanda mu bikorwa byo kurwanya indwara zitandukanye.

Iki gikorwa cyateguwe mu rwego rwo kwizihiza umunsi mpuzamahanga wo kurwanya diabète uteganyijwe ku wa 14 Ugushyingo 2021.

Indwara zitandura zirimo na Diabète ziri mu zihitana Abanyarwanda benshi cyane ko imibare ya Minisiteri y’Ubuzima igaragaza ko nibura 40% by’abapfa mu Rwanda bahitanwa na zo.

Igiteye impungenge kuri izi ndwara zitandura ni uko nubwo ziri hose, Abanyarwanda mu ngeri zose bakaba bazirwaye, abenshi ntibabizi.

Mu guhangana n’izi ndwara zitandura kandi Guverinoma y’u Rwanda yagiye ishyiraho uburyo bwo guhugura abaganga, aho muri raporo ya 2019/2020, nibura Ibigo Nderabuzima 97 byo mu turere dutanu byahuguwe.

Ni amahugurwa bahabwa ndetse n’ibikoresho bibafasha kuba bapima bakanakurukirana umuvuduko mwinshi w’amaraso, diabète n’izindi ndwara zitandura.

Muri gare ya Kicukiro hagiye kubera ibikorwa byo gupima Diabète mu buryo bwa rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .