Miss Kalimpinya yatangije itsinda rihugurana ku buzima bw’imyororokere mu mashuri (Amafoto na Video)

Yanditswe na Dusabimana Aimable
Kuya 13 Nzeri 2017 saa 12:08
Yasuwe :
0 0

Igisonga cya gatatu cya Nyampinga w’u Rwanda, Kalimpinya Queen, yatangije itsinda rihugurana ku buzima bw’imyororokere mu bigo by’amashuri abanza n’ayisumbuye, mu gushyira mu bikorwa bimwe mu byo yiyemeje ubwo yiyamamazaga.

Miss Kalimpinya yiyamamariza kuba Nyampinga w’u Rwanda yavugaga ko afite umushinga wo gukora ubukangurambaga bugamije kugabanya impfu z’ababyeyi bapfa babyara ariko cyane cyane abakiri bato kubera ko akenshi ari bo baba bafite ibyago byo gupfa mu gihe bari kubyara.

Mu gitondo cyo kuri uyu wa Gatatu, tariki 13 Nzeri 2017, Miss Kalimpinya, yagendereye ishuri rya Groupe Scolaire Cyahafi yanizeho mu mashuri abanza, ryo mu Karere ka Nyarugenge, ahatangiriza itsinda yise "Bambe" ryo kungurana ubumenyi ku buzima bw’imyororokere, rihuriyemo abanyeshuri 40.

Biteganyijwe ko iri tsinda rizajya rikora ibiganiro rikungurwa ubumenyi butandukanye n’abakuze basanzwe bafite ubumenyi runaka ku buzima bw’imyororokere hanyuma abigishijwe na bo bagasakaza ubumenyi basaruye muri bagenzi babo.

Atangiza iki gikorwa, Miss Kalimpinya, yasabye abanyeshuri bose bo kuri icyo kigo kwita cyane ku ndangagaciro nziza zikwiye kubaranga no kumenya uko bitwara imbere ya buri muntu kuko bibubahisha. Yasobanuriye abanyeshuri ko iri tsinda rigamije kurushaho kwigisha ababyiruka kwimenya bakarushaho gusobanukirwa ubuzima bw’imyororokere mu rwego rwo kwirinda inda zitateganyijwe mu bakiri bato nk’umwihariko w’umushinga we.

Yavuze ko kuba mu Rwanda hari umubare uri hejuru w’abangavu batwara inda zitateganyijwe, ari ikibazo gikomeye kandi gihangayikishije. Uyu mukobwa yasobanuye ko itsinda "Bambe" [bishatse gusobanura amarangamutima y’impuhwe], aryitezeho kuzafasha mu kugabanya icyo kibazo binyuze mu kwigisha abanyeshuri bakiri urubyiruko ibijyanye n’ubuzima bw’imyororokere kugira ngo barusheho gukura biyizi.

Yagize ati "Mu bikorwa by’iri tsinda, tuzajya twigira hamwe ubuzima bw’imyororokere, duhugurane, mbazanire abafite ubuhanga runaka babahugure. Dutangiranye n’abanyeshuri 40 hanyuma abandi tuzagenda tubashyiramo buhoro buhoro ari na ko tujya mu bindi bigo by’amashuri bitandukanye."

Umuyobozi wa Groupe Scolaire Cyahafi, Rutembesa Faustin, aho uyu mukobwa yatangirije ibikorwa bye, yabwiye IGIHE ko ibyo Miss Kalimpinya yakoze ari intangarugero kuko kuba umwana waharerewe yiyumvamo ubutwari bwo kugaruka guhugura barumuna be bahari muri iki gihe ari ibyo gushimwa.

Kalimpinya watangije umushinga w’itsinda rifite intego yo guhugura urubyiruko kumenya ubuzima bwabo bw’imyororokere avuga ko ikibazo cy’abana babyarira mu ngo gishobora kuba amateka mu gihe ababyeyi b’u Rwanda babigiramo uruhare bagasobanurira abana b’abangavu n’ingimbi ndetse n’abakibyiruka bakarushaho kwimenya no kutagwa mu mitego y’ababashuka, ibyo bikajyana no gucyaha abakora ibikorwa byangiza urubyiruko kuko ngo iyo bibaye bigira ingaruka mbi kuri ejo hazaza h’igihugu.

Ubushakashatsi bwakozwe n’Ikigo cy’Ibarurishamibare mu Rwanda bwerekanye ko kuva mu Gushyingo 2014 kugeza muri Mata 2015 mu gihugu hose abana b’abakobwa bari hagati y’imyaka 15 - 19 bari ku kigereranyo cya 7% batwaye inda zitateguwe.

Naho ubwakozwe n’Impuzamiryango Iharanira uburenganzira bwa muntu (CLADHO), bugaragaza ko abana b’abakobwa bagera kuri 818 bo mu mirenge 52 yo mu turere 10 tw’igihugu batewe inda bakiri bato.

Kalimpinya na bamwe mu banyeshuri bazajya bamufasha muri ibi bikorwa
Uyu mukobwa yasize hashyizweho komite izamufasha mu bikorwa yatangije

Umuyobozi wa Groupe Scolaire Cyahafi, aho Kalimpinya yatangirije umushinga we, yamushimiye avuga ko yatekereje igikorwa cyiza
Abanyeshuri basabwe kurangwa n'ubupfura bigishijwe na mukuru wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza