Minisitiri Ngamije yasabye Abanyarwanda gukaza ingamba zo kwirinda COVID-19 mu bihe bya Pasika

Yanditswe na Iradukunda Serge
Kuya 2 Mata 2021 saa 10:55
Yasuwe :
0 0

Minisitiri w’Ubuzima, Dr Daniel Ngamije, yasabye Abanyarwanda kutirara ngo ibihe by’umunsi mukuru wa Pasika cyangwa ibiruhuko abanyeshuri barimo bibe intandaro yo kwiyongera k’ubwandu bwa COVID-19.

Ibi Minisitiri w’Ubuzima yabigarutseho mu butumwa yageneye Abanyarwanda ngo bubibutse gukomeza kwirinda icyorezo cya COVID-19.

Muri ubu butumwa Minisitiri Ngamije yasabye abizihiza Pasika ku bikora birinda gutegura ibirori bishobora kuba intandaro yo kwandura COVID-19 kuri benshi.

Ati “Turi mu bihe byo kwizihiza Pasika ku bayemera, ntitudohoke ngo twirare dutegura ibirori n’iminsi mikuru mu ngo kuko bikwirakwiza ubwandu bwa COVID-19 kandi kwirengagiza ingamba zo kwirinda uyu munsi ni ugutanga icyuho cyo kwiyongera kw’abandura COVID-19 bikatuganisha ku gufata ibyemezo bikarishye birimo na Guma mu rugo.”

Yakomeje asaba ababyeyi b’abanyeshuri bari mu biruhuko kubafasha kwirinda kwandura COVID-19, anibutsa ko ibihe byo kwibuka abazize Jenoside yakorewe Abatutsi mu 1994 u Rwanda rwitegura kwinjiramo bikwiye gukorwa hubahirizwa ingamba zo kwirinda iki cyorezo.

Ati “Ababyeyi ntitudohoke, dufashe abanyeshuri baje mu biruhuko kwirinda, ibiruhuko ntibihinduke umuyoboro wo kwandura no gukwirakwiza COVID-19.”

“Mu bihe byo kwibuka Jenoside yakorewe Abatutsi tuzirikane kwibuka abacu ariko dukomeza kwirinda COVID-19, inzego z’ubuzima zegerejwe abaturage zizadufasha kwita ku bagira ikibazo cy’ihungabana ari nako dukorana n’inzego z’ibanze kugira ngo hose igikorwa cyo kwibuka kigende neza.”

Yamaze impungenge abatarabona urukingo

Muri ubu butumwa, Minisitiri Ngamije yashimiye Abanyarwanda bitabiriye gahunda yo guhabwa urukingo rwa COVID-19, anahumuriza abatararubona abizeza ko nabo bazaruhabwa vuba.

Ati “Turashimira Abanyarwanda bose bitabiriye gahunda yo gufata urukingo rwa COVID-19, abatarabona urukingo ntimugire impungenge kuko iyi gahunda igikomeje namwe urukingo ruzabageraho. Twiyemeje gukingira 60% by’abaturarwanda bose mbere y’uko umwaka wa 2022 urangira.”

Yakomeje asaba abahawe dose ya mbere kwitabira gufata iya kabiri kandi bagakomeza kubahiriza amabwiriza yo kwirinda COVID-19.

Ati “Minisiteri y’Ubuzima irashishikariza ababonye inkingo mu cyiciro cya mbere kwitabira gufata n’urukingo rwa kabiri kuko aribwo umuntu aba akingiwe neza. Urukingo rwa kabiri rufatwa mu minsi 28 nyuma yo gufata urwa mbere ku batewe urukingo rwa Pfizer, naho abatewe urukingo rwa AstraZeneca bazaterwa urukingo rwa kabiri nibura nyuma y’ibyumweru umunani.”

Abaruhawe baributswa ko ari ngombwa gukomeza gukurikiza n’izindi ngamba zo gukomeza kwirinda COVID-19. Izo zirimo kwambara neza agapfukamunwa, kwirinda kujya ahateranira abantu benshi kandi hafunganye, gukaraba intoki n’amazi cyangwa umuti wabugenewe no gusiga intera hagati y’umuntu n’undi.

Yakomeje ati “Igihe cyo guhagarika izi ngamba nikigera Minisiteri y’Ubuzima izabibamenyesha.”

Nubwo ibikorwa byo gukingira Coronavirus byatangiye haherewe ku bari mu byago byo kuyandura haracyakomeza kugaragara umubare munini w’abandura COVID-19

Kubera ubwandu bukomeje kwiyongera cyane mu Ntara y’Amajyepfo ku wa 1 Mata, Minisiteri y’Ubuzima yafashe icyemezo cyo koherezayo itsinda ry’abaganga bazafasha mu guhashya COVID-19.

Umuvugizi wa Minisiteri y’Ubuzima, Julien Mahoro Niyingabira, yabwiye IGIHE ko impamvu hoherejwe iri tsinda, ari mu rwego rwo gukumira ngo hadakomeza kugaragara abarwayi benshi.

Ati “Mu mibare dutangaza urebye neza usanga haragiye hagaragaramo abarwayi b’Intara y’Amajyepfo cyane, kenshi ugasanga muri buri karere mu tugize iyo ntara hagiye hagaragara abarwayi. Ariko ni uburyo bwo gukumira ngo hatabamo gutumbagira kw’imibare y’abarwayi ngo usange hari abarwayi benshi.”

Kugeza ubu mu Rwanda abamaze kwandura COVID-19 barenga ibihumbi 21 mu gihe abo kimaze guhitana ari 308.

Minisitiri Ngamije yasabye Abanyarwanda kutirara ngo Pasika ibabere icyuho cyo kwandura COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .