Minisante yinjiye mu bufatanye na Living Goods bwo kwimakaza ikoranabuhanga mu bajyanama b’ubuzima

Yanditswe na IGIHE
Kuya 12 Gashyantare 2020 saa 08:08
Yasuwe :
0 0

Minisiteri y’Ubuzima kuri uyu wa Kabiri yatangaje ubufatanye n’umuryango utegamiye kuri leta witwa Living Goods bugamije kunoza imikorere y’abajyanama b’ubuzima hifashishwa ikoranabuhanga.

Ubwo bufatanye kandi bwagaragajwe n’amasezerano y’imikoranire hagati y’inzego zombi yashyizweho umukono n’Umunyamabanga wa Leta muri Minisiteri y’Ubuzima Dr Patrick Ndimubanzi n’Umuyobozi Mukuru (CEO) wa Living Goods Liz Jarman.

Kuva yatangizwa mu 1995, gahunda y’abajyanama b’ubuzima yabaye inkingi ya mwamba y’izindi gahunda zose z’ubuzima mu Rwanda.

Kuri ubu abajyanama b’ubuzima bagera ku 58,445 mu gihugu hose batanga serivisi zo kwirinda indwara, gusuzuma, kuvura ndetse no kohereza abakeneye ubufashe bwisumbuyeho ku bigo nderabuzima. Binyuze muri ubu bufatanye rero, abajyanama b’ubuzima bazarushaho kunoza serivisi batanga binyuze mu gukoresha ikoranabuhanga.

Ubu bufatanye kandi buzatuma amakuru atangwa n’abajyanama b’ubuzima azajya agera ahabugenewe mu buryo bwihuse, hagamijwe ko ibyemezo bigomba kuyashingiraho na byo byihutishwa bityo ubuzima bw’abanyarwanda bukarushaho gusigasirwa.

Umunyamabanga wa Leta muri Minisiteri y’Ubuzima Dr Ndimubanzi, yavuze ko abajyanama b’ubuzima bafatiye runini gahunda z’ubuzima mu Rwanda. Yatanze urugero rw’aho u Rwanda rwarabashije kugabanya imfu z’ababyeyi ku gipimo cya 80% hagati ya 2005 na 2010 rubikesha abajyanama b’ubuzima.

Yakomeje agira ati “Ubu rero, turasanga bikwiye ko gahunda yabo yongererwa ubushobozi kuko imirimo bakora usanga ibasaba kuzuza ibitabo byinshi n’ikaramu kandi buri munsi. Ibyo rero tukaba twarasanze ari akazi kavunanye cyane cyane ku mukorerabushake. Niyo mpamvu twahisemo kuvugurura gahunda y’abajyanama b’ubuzima bakazajya bakoresha ikoranabuhanga mu kazi kabo ka buri munsi.”

Amasezerano y’ubu bufatanye ateganya ko Living Goods izashyigikira Minisiteri y’Ubuzima n’abafatanyabikorwa bayo mu gushyiraho gahunda y’ikoranabuhanga ibi bikazaborohereza akazi ndetse bikanarushaho kunoza umusaruro ukavamo.

Umuyobozi Mukuru wa Living Goods Liz Jarman yagize ati “Ibi turabifata nk’amahirwe ahambaye yo gukorana na Minisiteri y’Ubuzima ku cyerekezo ifite cyo gushyira ikoranabuhanga muri gahunda y’abajyanama b’ubuzima. Twizeye cyane ko muri ubu bufatanye hazavamo umusaruro mwinshi kuko u Rwanda ari igihugu cy’icyitegererezo mu kuzamura, mu kubaka gahunda zihamye z’ubuzima zishingiyye ku bajyanama b’ubuzima”.

Akomeza agira ati “Gahunda yacu muri Living Goods ni ugushyiraho uburyo bw’ikoranabuhanga bugamije korohereza abajyanama b’ubuzima gutunganya neza inshingano bashinzwe.”

By’umwihariko, umuryango Living Goods uzakorana na Minisiteri y’Ubuzima ndetse n’abafatanyabikorwa bayo mu gukora inyigo igamije guhuza servisi z’abajyanama b’ubuzima n’uburyo bwo kuzitanga hifashishijwe ikoranabuhanga hagamijwe inyungu z’umugenerwabikorwa.

Biteganyijwe ko hazabanza gukorwa imbanzirizamushinga izatangirana n’abajyanama b’ubuzima bakorera mu turere tubiri, nyuma ubwo buryo bukazakwirakwizwa no mu bandi bajyanama mu gihugu cyose.

Umunyamabanga wa Leta muri Minisante, Dr Ndimubanzi avuga ko abajyanama b'ubuzima bafite uruhare runini mu iterambere ry'urwego rw'ubuzima mu Rwanda
Umuyobozi Mukuru wa Living Goods Liz Jarman avuga ko ari amahirwe gukorana na Minisiteri y'Ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza