Kwamamaza

Kayonza: Umugore utazwi arakekwaho kwiba uruhinja mu bitaro bya Gahini

Yanditswe kuya 3-11-2016 saa 10:50' na Emma-Marie Umurerwa


Umubyeyi witwa Mukamazimpaka Gratia w’imyaka 26 y’amavuko, utuye mu Mudugudu wa Rucaca, Akagari ka Murundi, mu Karere ka Kayonza, yibwe umwana w’umukobwa wari umaze ukwezi kumwe avukiye mu bitaro bya Gahini biherereye muriko karere.

Dr Muvunyi Alphonse, Umuyobozi w’Ibitaro bya Gahini, yatangarije IGIHE ko Mukamazimpaka yari yarabyaye abazwe ariko aza kugira utubazo dutuma atinda kwa muganga.

Avuga ko uyu mwana yibwe tariki ya 1 Ugushyingo n’umuntu wari wigize umurwaza wa nyina.

Yagize ati “Ku wa Gatanu w’icyumweru gishize nibwo haje umugore afite ingemu (ibiribwa bagemurira umurwayi), ageze aho abagore babyaye baruhukira ‘ Maternité’, ahasanga igitanda kitariho umuntu ahita avuga ko ari we yari agemuriye none akaba asanze yatashye. Yahise afata ingemu ayihereza Mukamazimpaka, bahuza urugwiro amubaza niba afite umurwaza undi amubwira ko ntawe, ahita amwemerera kumurwaza.”

Dr Muvunyi yakomeje avuga ko Mukamazimpaka ndetse n’umugabo we bagiriye icyizere uyu mugore, kugeza ubwo bemera ingemu yabazaniraga ndetse ngo banamuha umwana wabo akamwitaho bazi ko ari umugiraneza.

Yakomeje agira ati “Mukamazimpaka yaje kubwira uriya mugore ko bari bumusezerere, undi ahengera bagiye kumupfuka, abwira undi murwaza wari hafi aho ngo najye kugura icyayi, na we ahita afata uruhinja arigendera.”

Uyu muyobozi yakomeje agira inama ababyeyi ati “Ntibyumvikana ukuntu umugore n’umugabo bagirira icyizere umuntu batazi kugeza ubwo bemera kwakira ingemu abazaniye, kumuha umwana wabo ngo amwiteho n’ibindi. Aha harimo ikintu cy’uburangare, akaba ari yo mpamvu dusaba ababyeyi kujya baba maso.”

Bikimara kumenyekana ko uyu mwana yibwe, ubuyobozi bw’Ibitaro bya Gahini ngo bwahise bubimenyesha Polisi, kuri ubu uyu mugore utazwi akaba akiri gushakishwa.

Twagerageje kuvugana n’umuvugizi wa Polisi mu Ntara y’I Burasirazuba ntibyadukundira.

Ibi bije bikurikira undi mwana wibwe muri Kanama mu bitaro bya Ruli biherereye mu Karere ka Gakenke, aho Umuforomokazi witwa Byukusenge Betty wakoreraga muri serivisi yo kwita ku bana bavutse batuzuye muri ibi bitaro, yibye umwana wari umaze kuvuka abwira nyira we ko yabyaye upfuye amuha igipupe amubeshya ko ari umurambo.

Ibitaro bya Gahini byibwemo umwana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved