Kandamutsa yavuze uko ushaka kubyibuha cyangwa guta ibiro yabigenza bitamugizeho ingaruka

Yanditswe na Habimana James
Kuya 24 Kamena 2019 saa 08:13
Yasuwe :
0 0

Kandamutsa Solange utuye muri Canada wize ibijyanye n’imirire (Nutrition), yavuze ko muri iki gihe hari umubyibuho udasanzwe uterwa n’ibyo abantu barya n’indwara zibikomokaho zikaba zariyongereye.

Ibi nibyo byatumye azana uburyo bufasha guhangana n’ibi bibazo byose kuri buri muntu wese, aho yigisha abantu ibijyanye n’imirire kuri babandi bashaka kubyibuha n’abashaka guta ibiro.

Mu kiganiro yagiranye na IGIHE, Kandamutsa yavuze ko ubu ari uburyo buzwi nka ‘Equilibre Alimentaire’, aho umuntu avuga ngo ni gute nshobora kurya bitewe n’intego afite yaba iyo kongera ibiro cyangwa kubigabanya ariko atiyicishije inzara.

Ubu buryo bureba umuntu uwo ariwe wese guhera ku mwana kugera ku muntu mukuru.

Kandamutsa avuga ko ubu buryo yabumenye amaze kubyara kuko yari afite ibiro 82, amaze kubukoresha butuma atakaza ibiro 15 mu gihe cy’amezi atatu gusa kuko ubu afite ibiro 67.

Mbere yari asanzwe akoresha kwigomwa amafunguro runaka (regime) kugira ngo ate ibiro, ugasanga biragiye ariko bikongera bikagaruka.

Ati“Nageze aho ndibwira nti ariko byanze bikunze hari uburyo nshobora gukoresha ibiro nkabita kandi ntibyongere kugaruka, nahise nkora ubushakashatsi menya ko ubwo buryo buhari (Equilibre Alimentaire), ndabwiga nyuma nza guta ibiro neza kandi ntishwe n’inzara”.

Akomeza agira ati “Nahise mbona ko ari uburyo bwiza abanyarwanda benshi bakeneye kandi batazi, ndavuga nti reka mbwige mu buryo burambuye noneho mbashe no kugera ku bantu benshi no mu byiciro byinshi bitandukanye bibukeneye.”

Yavuze ko ubu buryo bugendera ku byiciro by’ibiryo bitandukanye; imboga (Dodo, imiteja, karoti, inyanya…) proteines (inkoko, inyama y’inka, yogurt,…), Hydrates de carbones (ibintu byose bibamo isukali aribyo ibirayi, ibishyimbo, umuceri, imbuto) n’ibindi by’inyongera nk’amavuta, mayonnaise, isukali, ubuki, avocat...).

Kandamutsa avuga ko muri iki gihe hari umubyibuho udasanzwe uterwa n’ibyo abantu barya, indwara nka diabetes n’umuvuduko w’amaraso zikaba zariyongereye byose bikaba biterwa no kugira ubumenyi buke mu mirire.

Akomeza avuga ko muri iyi minsi usanga inganda zitunganya ibyo kurya zarabaye nyinshi bigatuma ku isoko hari ibiribwa by’amoko atandukanye kandi byose biganisha mu gutera umubyibuho ukabije.

Yagize ati “Icyo iyi gahunda nigisha ifasha abantu ni ukumenya akamaro ka buri kintu turya n’ingano umubiri wacu ukeneye gufata ngo tutazamura ibiro igihe tutabyifuza. Usanga itandukanye na ‘Regime alimentaire’, aho yo bigusaba kwiyima ibyo ukunda cyangwa kwiyicisha inzara ngo ubashe kunanuka.”

Kandamutsa yavuze ko ubu ibiro bye byagabanyutse kandi bigahora aho biri

Uburyo Kandamutsa yigishamo

Kandamutsa yavuze ko afasha abantu bifuza ubumenyi mu mirire, abashaka guta ibiro akabereka uko bateka ibiryo biryoshye bakagera no ku ntego yabo.

Ati “Ni ukuvuga ko hari ibiryo turya umubiri wacu uba ukeneye bitewe n’umuntu n’akazi akora. Buri muntu abasha kwikorera gahunda y’umunsi akurikije ibyo akunda kurya ariko kuko aba afite ubumenyi ibiro bibasha kugabanuka kugera ku kiro kimwe mu cyumweru cyangwa ibiro bine mu kwezi”.

Ku bagore batwite, Kandamutsa yavuze ko mu gihe cyo gutwita kingana n’amezi icyenda hari ibiro umugore agomba gufata kugira ngo umwana we akure neza, ibyo biro biri hagati ya 11 na 12 habariwemo n’ibiro by’umwana.

Yagaragaje ko akenshi umuntu iyo afashe ibiro bigera kuri 30 bimuviramo uburwayi igihe atwise cyangwa kuzabikuraho bikagorana.

Muri icyo gihe cyo gutwita, Kandamutsa yereka ababyeyi ibyo umubiri wabo ukeneye, ibyo umwana akeneye, kuko impamvu bafata ibiro byinshi cyane ari ukutamenya ibyo umubiri ukeneye.

Ku bagore bonsa, Kandamutsa avuga ko iki gihe abenshi bafata ibiryo byinshi cyane kubera ko baba bagomba gutunga umwana uri ku ibere, ariko iyo umugore yize ibyo agomba gufata bifite intungamubiri kandi bigatanga ibitunga umwana bimurinda gufata ibiro byinshi, ahubwo iyo arangije konsa ahita ata bya biro byose yari yarafashe.

Ku bifuza kubyibuha muri rusange tuzi ko kubyibuha ari ukurya ibiryo bifite amavuta menshi n’isukari, aho umuntu wari muto iyo abashije kubyibuha usanga bimuviramo uburwayi. Ku bantu bifuza gufata ibiro biga uburyo bahindura indyo basanzwe bafata ariko badashyizemo ibibatera indwara ahubwo bagafata umubiri mwiza.

Ku bafite abana babyibushye, Kandamutsa yavuze ko iyi ari gahunda ashyiramo imbaraga nyinshi kuko ababyeyi bafite umubyibuho usanga n’abana babo akenshi babyibushye.

Ati “Nkanjye ufite abana, nigisha ko iyo mu rugo indyo ari nziza n’abana bayikurikiza kandi ntago umwana bamuhatira ngo ananuke ahubwo bahindura imirire mu rugo kuko amwana aba akura agenda ata ibiro, ariko cyane cyane ni uguhindura ibiribwa mu rugo".

Kandamutsa avuga kandi ko ushaka no kubyibuha bishoboka ukoresheje ubu buryo yigisha

Imirire mu kazi

Ibijyanye n’imirire mu kazi, Kandamutsa avuga ko yabyongeyemo mu byo yigisha kubera ko ahantu abantu bamara amasaha menshi ari mu kazi, aho usanga abakoresha bifuza ko abakozi babo bamererwa neza bakaba bafite aho barira mu kigo.

Aho barira usanga hacuruza ibiribwa bitandukanye ariko ibyinshi ni amandazi, capati, fanta n’ibindi, rero umukozi ukora yicaye akanywa fanta ebyiri ku munsi, akarya izo capati buri munsi, akarya muri restaurant saa sita ibiryo byuzuye amavuta nk’ifiriti, ibyo bintu nibyo bimutera kubyibuha.

Kandamutsa avuga ko nubwo abakozi bishyurirwa aho gukorera siporo yewe bakanayikora, icy’ibanze cyo gukosora ari imirire kuko aho kurira hazagumaho, ahubwo hakigwa uburyo abakozi barya indyo nziza itazabatera indwara.

Yavuze ko usanga umuntu uko yatangiye akazi angana nyuma y’umwaka muhura ukamuyoberwa kubera umubyibuho, bikaba ari muri urwo rwego hakenewe ubumenyi mu bijyanye n’imirire mu kazi.

Kandamutsa uburyo agezaho abantu iyi gahunda ni uko abikora mu buryo bw’ikoranabuhanga aho umuntu ari hose kandi bidasaba ko muba muri ku masaha amwe.

Ati “Mbaha amasomo bagasoma, bakareba amashusho y’amasomo hanyuma nkakora urubuga rwa WhatsApp kuko akenshi iyo abantu bakoreye hamwe baterana imbaraga, hari abifuza kwiga ku giti cyabo nabo ndabigisha nkoresheje skype na whatsapp video”.

Yavuze ko hari urubuga rwitwa nutritionpourtous.ca arimo gukoraho, aho umuntu azajya agura porogaramu akajya ahagenewe umukuriya agafungura konti akiyigisha kandi mu minsi ya vuba ruzaba rwasohotse.

Iyi gahunda imara iminsi 30 ya mbere yo gufata ubumenyi no gukosora imirire, hanyuma amezi asigaye umuntu akaba yakora gahunda akurikiza ari nako harebwa ko intego ye akiyikomeje kugeza aho azaba ageze ku biro yifuza, akanafashwa kwiga kubigumaho.

Yavuze ko mu gihe waba uwifuza gusura urubuga rwe ari nutritionpourtous.ca cyangwa Facebook kuri Solange kandamutsa for Nutrition, ukabikunda ‘like’ bityo ukazajya ubona amakuru ajyanye n’imirire.

Hari kandi kumukurikira no kuri Instagram kuri Solange kandamutsa, mu Rwanda akaba yahamagarwa cyangwa akandikirwa ubutumwa bugufi kuri WhatsApp kuri nimero ya +250 784235443, hanze y’ u Rwanda kuri whatsApp ni + 1- 514-963-6540, Email: [email protected]

Ubutuma bugufi kuri kuri paji ya facebook bunyura kuri Solange kandamutsa for Nutrition.

Ubu buryo bugenedera ku cyiciro cy'ibiribwa bitandukanye
Gutegura amafunguro meza ntiwiyicishe inzara byagufasha kugena imiterere y'umubiri wawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza