Inzobere z’abaganga zatangiye kuvura abana n’abagore boherezwaga kwivuriza kure

Yanditswe na Evariste Nsengimana
Kuya 27 Ugushyingo 2017 saa 09:14
Yasuwe :
0 0

Inzobere z’abaganga b’indwara z’abana n’abagore zo mu bitaro bya leta n’ibyigenga, zatangiye gusanga abarwayi zikabavurira ku bitaro by’uturere, mu rwego rwo kuruhura aboherezwaga kuzivuriza ku bitaro by’icyitegererezo no guhangana n’ikibazo cy’inzobere zidahagije.

Atangiriza iki gikorwa ku bitaro bya Shyira by’Akarere ka Nyabihu, kuri uyu wa Mbere, Minisitiri w’Ubuzima,Dr Diane Gashumba, yavuze ko iki gikorwa kiri gukorwa n’inzobere z’abaganga zo mu bitaro bya leta n’ibyigenga.

Yagize ati "Cyakozwe ku bufatanye n’ abaganga bo mu bitaro bya leta ariko n’ibyigenga mwabonye ko hari abo twazanye harimo Dr. Nyirikwaya, hari abavuye mu bitaro bya Kanombe, ibya kaminuza bya Kigali n’ibya Butare kugira ngo dufashe bagenzi bacu bari mu bitaro biri mu cyaro cyangwa byakira abarwayi benshi mu rwego rwo kwihugura, kwiyungura mu bumenyi tunaganire turebe uburyo bakongeramo imbaraga, tugabanye impfu z’abana n’ababyeyi. "

Iki gikorwa cyo kwegereza abaturage ubu buvuzi cyakorewe hirya no hino ku bitaro bitandukanye birimo ibya Musanze, Nyamata, Rubavu, Bushenge n’ahandi, aho Minisiteri y’ubuzima ivuga ko bizakomeza, hakoherezwa n’inzobere mu kuvura izindi ndwara.

Dr. Nyirikwaya Jean, umuyobozi w’ibitaro byigenga bya la Croix du Sud, yavuze ko abaganga bo mu bitaro bya Leta n’ibyigenga bose bavura indwara zimwe bityo ko bakwiye gufatanya bakazamura urwego rw’ubuvuzi mu Rwanda.

Umuyobozi w’ibitaro bya Shyira byatangirijweho iyi gahunda, Dr. Theoneste Rubanzabigwi, yavuze ko ari igikorwa kije gikenewe ku bitaro by’uturere akenshi usanga bifite abaganga b’indwara rusange, bikaba ikibazo mu gihe umurwayi akeneye umuganga w’inzobere, aho yavuze ko byabaga ngombwa ko yoherezwa ku bitaro by’icyitererezo nka CHUK, CHUB, ibya Kanombe n’ibindi.

Dr. Theoneste yanavuze ko bari gutekereza uko ibitaro bizajya bifatanya n’izo nzobere bakajya gusuzuma abarwayi ku bigo nderabuzima, ukeneye ubuvuzi bwihariye akajyanwa ku bitaro by’uturere bifite ibikoresho.

Dr Nyirinkwaya Jean Asuzuma umubyeyi uri kunda
Dr Theoneste Rubanzabigwi uyobora ibitaro bya shyira
Dr Nyirinkwaya Jean Aganira n'itangazamakuru
Minisitir n'abandi baganga bareba mu gitabo abaza kwivuza biyandikamo, cyane cyane abafite indwara zikomeye
Minisitiri w'Ubuzima Dr. Diane Gashumba

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza