Kwamamaza

Inzego eshatu zasabwe gufatanya kurandura imirire mibi

Yanditswe kuya 2-11-2016 saa 09:31' na Mukaneza M.Ange


Bamwe mu bagize itsinda ryaje gusangira ubumenyi n’abanyarwanda ku bijyanye no kurandura imirire mibi, bagaragaje ko kugira ngo bigerweho bisaba guhuriza hamwe imbaraga za leta, abikorera na sosiyete sivile.

Kuva ku itariki ya 31 Ukwakira 2016, nibwo itsinda ry’abantu 35 bahagarariye Imiryango igamije kurwanya imirire mibi mu bihugu 11 by’amahanga birimo umunani byo muri Afurika, batangiye kwerekwa bimwe mu bikorwa byakozwe mu Rwanda mu rwego rwo kurandura burundu icyo kibazo (Learning Route Exchange Program).

Ubwo kuri uyu wa Kabiri basobanurirwaga bimwe mu bikorwa byakozwe ku bufatanye bwa leta n’Umuryango Duhamic-Adri uharanira amajyambere y’icyaro no gusura uruganda rwa SOSOMA rukora amafu atandukanye, aba banyamahanga bagaragaje ko ubufatanye bw’inzego zitandukanye aribwo bwonyine bushobora gutuma kurandura imirire mibi bigerwaho.

George Odhiambo Ogola uturuka muri Kenya, yavuze ko asanga Leta zitandukanye zagakwiye gushyiraho ingengo y’imari yagenewe ibikorwa byo kurandura imirire mibi ndetse n’uburyo bwo kubikurikirana.

Ati "Ibihugu byacu biracyafite imibare myinshi y’abana bagwingiye. Kurandura iki kibazo bisaba guhuza imbaraga hagati ya leta, abikorera na Sosiyete Sivile. Leta zacu zikwiye gushyiraho ingengo y’imari yihariye igenewe kurandura imirire mibi.”

Yakomeje avuga ko nk’uko SOSOMA ikoresha umusaruro w’abaturage mu kubategurira amafu yuzuyemo intungamubiri ndetse itibagiwe no kubateza imbere, ngo nagera mu gihugu cye azagerageza gushyira mu bikorwa ibyo yigiye mu Rwanda binyuze mu bukangurambaga.

Daniel Mtweve waturutse muri Tanzania, yagaragaje ko usanga ari gake cyane leta ishobora gukorana n’abikorera mu kurwanya imirire mibi, avuga ko nyuma y’uru rugendo icy’ibanze azashyiramo imbere ari ubukangurambaga buhereye hasi mu miryango no kwerekana ko ubufatanye ari ingenzi.

Umuyobozi wa Duhamic-Adri, Benineza Innocent, yavuze ko uretse kuba bakora ubucuruzi binyuze muri SOSOMA bafite n’imishinga myinshi bafatanyamo na leta mu rwego rwo kurandura imirire mibi aho bakorera mu turere umunani tw’igihugu.

Uretse gusobanurirwa imikorere ya SOSOMA na Duhamic-Adri, abitabiriye iki gikorwa cyateguwe ku bufatanye n’ihuriro ry’imiryango igamije kurwanya imirire mibi SUN Alliance, banagaragarijwe akamaro k’Ikinamico Urunana mu guhindura imyumvire y’abanyarwanda ku bijyanye no kurya indyo yuzuye.

Biteganyijwe ko muri iki gikorwa kizasozwa ku itariki 5 Ugushyingo 2016, iri tsinda rizanasura ibikorwa bitandukanye byakozwe hagamijwe kurwanya imirire mibi, biherereye mu turere twa Nyanza na Gisagara, twombi two mu Ntara y’Amajyepfo.

Ikibazo cy’imirire mibi ni ikibazo gihangayikishije Leta y’u Rwanda, dore ko imibare itangwa n’Ikigo cy’Igihugu cy’Ibarurishamibare, kigaragaza ko abana 38% bari munsi y’imyaka itanu bagaragarwaho ikibazo cy’imirire mibi.

Abanyamahanga basogongejwe ku gikoma cya SOSOMA kigira uruhare mu kurwanya imirire mibi
Basobanuriwe uko SOSOMA ifasha abanyarwanda kurwanya imirire mibi
Aba banyamahanga basuye u Rwanda bavuga ko ubufatanye hagati ya Leta, Abikorera na Sosiyete Sivile ari bwo bwarandura ikibazo cy'imirire mibi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved