Imikorere ya bimwe mu byuma bikoreshwa kwa muganga hasuzumwa indwara zitandukanye

Yanditswe na Jean Pierre Tuyisenge
Kuya 7 Werurwe 2017 saa 05:39
Yasuwe :
0 0

Abantu bamwe bakunze kugana abaganga mu gihe bakomeretse cyangwa bafite ubundi burwayi bikaba ngombwa ko bacishwa mu byuma byifashishwa mu kubasuzuma, nyamara uburyo bikorwamo ntibabashe kubusobanukirwa.

Ibyuma bipima abantu kwa muganga birimo ingeri zitandukanye ndetse n’indwara bipima ziratandukanye. Mu Rwanda ibikunze kugaragara birimo Radiographie isuzuma amagufwa igihe umuntu yagize impanuka, gupima cancer, ibihaha, igituntu n’umusonga.

Mamographie ipima indwara zo mu mabere, na Scaneur igaragaza utuntu duto mu mubiri, Fluoroscopie na Ecographie ikoresha umuti.

Ibijyanye no gusuzuma abarwayi hifashishijwe ibyuma bitandukanye bikorerwa muri serivisi izwi ku izina rya Radiologie.

Iki cyuma gikoresha imirasire bita ’rayons X’ , gikoresha ikayinjiza mu mubiri yageramo igafata ifoto kugeza no ku kantu gato kaba kadasanzwe mu mubiri bikorohera abaganga kumenya iyo bakurikirana.

Ni icyuma kiba gifite uburiri baryamishaho umuntu, kikagira ikindi gice hejuru gifite ijisho rifata ifoto ry’aharwaye. Kiba gifite insinga zicometse kuri mudasobwa ari na yo ireberwamo umuntu aho aba aryamye. Ifite kandi ahantu hashyirwa ikarita izabikwaho amafoto yafashwe, na yo izashyirwa mu yindi iyasohora.

Mammographie icyuma cyifashishwa gu gusuzuma indwara zifata amabere

Iyi kandi ni ya yindi abantu bakunze kuvamo bagahabwa ikintu kimeze nk’urupapuro rubonerana ruriho imiterere y’ibice byo mu mubiri bafotoye cyane cyane amagufa n’imbavu.

Iyitwa fluoroscopie yo ifite ubushobozi bwo gusuzuma indwara zigera kuri 30 mu mubiri aho mu kuyikoresha hifashishwa umuti bita Contrast baha umuntu, uko umanuka mu mubiri ukagenda uhindura ibara hakurikijwe indwara uhuye na yo, maze ayo mabara abaganga bakayaheraho bamenya indwara runaka afite. Ikoreshwa mu kureba indwara zishobora kwibasira ibice birimo igifu, amara, impyiko, inzira itwara inkari n’izindi.

Mu bitaro byo mu Rwanda kandi hakoreshwa Scanneur, yo ikaba ikoreshwa mu kureba mu mubiri ariko ifite ubushobozi bwo kugaragaza indwara nubwo yaba yigarazaga mu ishusho nto cyane.

Scanneur na yo ikoresha ’rayons X’ yinjira mu mubiri ikabasha gufata amafoto y’akantu ako ariko kose bitewe n’aho bashaka kureba.

Igira uruhare mu gusuzuma indwara zifata imiyoboro y’amaraso, ubwonko, umutima, ibihaha, inyama zo mu nda n’amagufwa.

Mamographie yo ikoreshwa mu gusuzuma cancer yo mu mabere. Ni icyuma gihagaze, ariko cyagera hejuru kikagira igice cyinjizwamo ibere, ifite kandi ikindi gice kiba gicometseho mudasobwa ireberwamo ikibazo kiri mu ibere.

Wilhelm Röntgen, umuhanga muri Siyansi akaba Umudage ni we wavumbuye ’rayons X’ mu 1895, akaba ari na ho yatangiye gukoreshwa mu byuma bitandukanye.

Kunyura muri izi mashini mu gihe kinini bishobora kugira ingaruka

Mu kiganiro cyihariye IGIHE yagiranye na Dr Louise Kalisa ukuriye ishami rya Radiologie mu bitaro bya Kaminuza bya Kigali, CHUK, yadutangarije ko hari ingaruka zitari nziza ziterwa no kunyura muri ibi byuma inshuro nyinshi bitewe n’imitere y’umubiri w’umuntu zimo na Cancer.

Avuga kandi ko hari abantu batemerewe guca mu byuma birekura urumuri (X-Rays) barimo abagore batwite n’abana bari munsi y’imyaka itanu kuko bagirwaho ingaruka na byo bitewe n’imiterere y’umubiri wabo.

Ahakorera izi mashini hagomba kuba hubatse ku buryo butuma urumuri rutabasha kurenga igikuta ngo rube rwagira ingaruka ku bandi bantu, ni na yo mpamvu abaganga bakorera ahari ibi byuma bagomba kuba bambaye akuma gapima ingano y’uru rumuri (dozemetre) gatuma zitabagiraho ingaruka.

Izi mashini zigiye zitandukanye bitewe n’ibyo zipima ndetse mu bushobozi zirarutana ni yo mpamvu zitanagura kimwe; nka Scanneur igura miliyoni y’amadolari mu gihe ikiguzi cy’izindi kiri munsi yayo.

Radiographie, icyuma cyifashishwa mu gusuzuma indwara zitandukanye hakoreshejwe Rayon X, (urumuri) ruhinguranya umubiri w'umuntu
Scanner yifashishwa mu gupima indwara ziri mu mubiri w'umuntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza