Impamvu zirindwi zituma indwara z’ibyorezo zikomeza kwiyongera ku isi

Yanditswe na Ishimwe Daniel
Kuya 18 Mata 2017 saa 09:48
Yasuwe :
0 0

Byagusaba gukorora rimwe,gusomana rimwe,gukorwaho rimwe cyangwa kurumwa rimwe gusa kugira ngo uretse ubuzima bwawe ahubwo n’ubw’abagukikije bujye mu kaga kandi k’igihe kirekire.

Inzobere mu by’ubuzima bw’abantu zigaragaza ko muri iki gihe abatuye isi bugarijwe n’ibyago bikomeye byo guhura n’indwara z’ibyorezo kuruta mu gihe kinini gishize, zirimo nka Zika,ibicurane by’ibiguruka,ebola,ibicurane by’ingurube n’izindi.

Ibihe byose indwara y’icyorezo iza ntawe uyiteze ari nako ifata ahantu hanini bigatuma isi isigara mu bibazo bikomeye, ari yo mpamvu abahanga mu buzima basaba abantu guhora biteguye.

Umwarimu muri kaminuza yigisha iby’isuku n’ubuvuzi i Londres mu Bwongereza, Jimmy Whitworth yavuze ku bigendanye n’indwara z’ibyorezo ati ”Isi ifite umutekano ungana nk’uw’igihugu gifite intege nke, indwara z’ibyorezo ntizikangwa n’imipaka.”

Yakomeje ati”Byinshi mu biranga imibereho igezweho tubamo idushyira mu byago byinshi, gusa turiteguye kuruta mbere.”

Uyu mugabo yashyize ahagaragara impamvu zishobora gutuma indwara z’ibyorezo zikomeza kwiyongera.

1. Gukura kw’imijyi no kwiyongera kw’abaturage

Uyu mugabo avuga ko uko abantu bagenda biyongera ari nako ibyago byo kwandura indwara z’ibyorezo bizamuka bitewe n’uko abantu baba begeranye cyane cyangwa se abandi ugasanga begeranye n’imirima n’amatungo ku buryo izo ndwara zoroherwa no kubibasira harimo nk’igituntu, ibicurane by’ibiguruka n’izindi.

2. Gutura ahantu hashya

Abahanga mu by’ubuzima bavuga ko uko abantu bagenda biyongera, bakenera ubutaka bwo guturaho, ibituma bajya mu bice bitari bisanzwe bituwe birimo n’amashyamba ku buryo ibyorezo byoroherwa no kubafata kuko hari ibyo baba basanzeyo batamenyereye.

3. Ihindagurika ry’ibihe

Ibimenyetso bikomeza kugaragara ko ihinduka ry’ibihe ritera imyuzure n’ubushyuhe bwinshi bituma ibyorezo bishamikiye ku isuku nke nka Cholera byiyongera cyane.

Ishami ry’Umuryango w’Abibumbye ryita ku buzima ritangaza ko mu 2030 no mu 2050 ihinduka ry’ibihe biteganyijwe ko rizatera impfu 250,000 ku mwaka ziturutse ku bushyuhe,imirire mibi no gukwirakwira kw’indwara z’ibyorezo nka Malariya.

4.Ingendo zikorwa kw’isi

Whitworth avuga ko uko imyaka yiyongera ari nako abantu basura ibice bitandukanye biyongera, ku buryo uko uwo mubare uzamuka ari nako ibyago byo kwandura indwara z’ibyorezo bizamuka bitewe n’uko hari ababa bazirwaye batanabizi bakora izo ngendo bakanduza abo bahuriyeyo.

Agaragaza ko mu 2015, umubare wa ba mukerarugendo wageze kuri miliyari 1.2 wiyongereho miliyoni 50 ugereranyije n’imibare y’umuryango mpuzamahanga ushinzwe iby’ubukerarugendo yo mu 2014, ibyo yemeza ko bishobora kongera ibyago byo gukwirakwiza indwara z’ibyorezo.

5. Amakimbirane mu baturage

Heyman avuga ko ibihugu birimo ibibazo by’amakimbirane bikunda kwibasirwa n’indwara z’ibyorezo bitewe n’uko nta mwanya uboneka wo guhangana nabyo ndetse n’ibikorwa remezo byangirizwa muri izo mvururu bituma izo ndwara zihagera ku bwinshi ndetse n’abahageze baturutse ahandi bakazandura.

6. Abaganga badahagije mu duce twagezemo icyorezo

Mu bihugu aho ibyorezo byageze cyane ibikiri mu nzira y’amajyambere, usanga baba bafite abaganga n’abaforomo bake bita ku barwayi bituma izi ndwara zikomeza gukwirakwira ndetse zikoreka imbaga. Abahanga mu by’ubuzima batanga inama z’uko hakwiye kujya hubakwa inzego zikomeye mu nzego zose ku buryo ikiza kije gisanga hari uburyo bwo kukirwanya.

7. Ukwihuta kw’amakuru

Abahanga mu by’ubuzima bemeza ko uko iterambere ry’ikoranabuhanga rigenda rizamuka ari nako ihererekanywa ry’amakuru naryo ryihuta ku buryo kuri ubu abakoresha imbuga nkoranyambaga bahindura ukuri kw’amakuru ku buryo icyorezo cyakwirakwira bitewe n’uko amakuru yatanzwe nabi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244