Imiterere y’aho umugore abyarira ishobora gutuma umugabo we atemererwa kuhagera

Yanditswe na Kanamugire Emmanuel
Kuya 6 Nzeri 2016 saa 01:28
Yasuwe :
0 0

Amategeko yemerera umugabo kugera aho umugore we ari kubyarira agakurikirana uburyo abaganga bamwitaho, ariko habanje kureba uko aho umugore abyarira hameze.

Ni mu gihe hari abagabo bashyira mu majwi abaganga bavuga ko bagize uburangare mu kwita ku bagore mu gihe cyo kubyara, ku buryo ngo bagiye bakurikirana uko bitabwaho bishobora gukuraho ibibazo bivuka.

Urugero ni nk’umubyeyi wabyariye ku bitaro bya Ruli mu kwezi gushize akabeshywa ko yabyaye umwana upfuye maze bakamuha ikarito irimo igipupe n’amabuye bamubwira ko ari umurambo w’umwana we.

Mu kiganiro na IGIHE Umuyobozi w’Ibitaro bya Kaminuza bya Kigali(CHUK), Dr.Théobald Hategekimana yavuze ko mu bitaro bimwe na bimwe usanga aho abagore babyarira hashobora kudatuma abagabo bemererwa kuhagera.

Ibi ngo bibaho mu gihe abagore benshi bari mu cyumba kimwe mu gihe cyo kubyara nk’aho baba batandandukanyijwe na ‘rideau’, ndetse bakurikiranwa n’abaganga bamwe.

Dr Hategekimana yagize ati “Kuba umugabo yagera aho umugore we abyarira ntabwo bibujijwe, ariko njye nsanga bitakorohera abagabo kuza kureba aho abagore babo babyarira kuko kubemerera hari igihe biba bidakwiye.”

Dr.Hategekimana akomeza avuga mu gihe umugore uri kubyara yaba afite icyumba cye wenyine (Private room),ari bwo byakorohera umugabo we kuhagera.

Yagize ati “Umugabo yemererwa kujya muri icyo cyumba akaba ari kumwe n’umugore we hanyuma umuganga akamukurikirana kugeza igihe abyariye, gusa ni ibitaro bimwe na bimwe bifite ibyo byumba.”

Yatanze urugero ku bitaro ayobora avuga ko bemerera abagabo gukurikirana abagore babo babyara bakaba bagera no mu byumba babagirwamo.

Nubwo hari abagabo babisaba hari n’abo usanga bitabashishikaje kubera urwego rw’imyumvire rwa buri muntu.

Dr.Théobald Hategekimana, Umuyobozi w'Ibitaro bya Kaminuza bya Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244