Imiryango irwanya Sida ihangayikishijwe no kuba 75% by’abayirwaye munsi ya Sahara ari abana

Yanditswe na Evariste Nsengimana
Kuya 27 Gashyantare 2017 saa 08:47
Yasuwe :
0 0

Ubushakashatsi bwakozwe n’ikigo AAI (AIDS Accountability International) mu 2015, bugaragaza ko 75% by’abafite ubwandu bwa Sida bo muri Afurika yo munsi y’ubutayu bwa Sahara ari abana b’abakobwa bari hagati y’imyaka 15 na 24.

Ibi ni bimwe mu bihangayikishije imiryango itari iya Leta yita ku buzima ikanarwanya SIDA yo mu bihugu 27 bya Afurika, bivuga ururimi rw’Icyongereza aho iri kurebera hamwe icyakorwa ngo ubwandu bukumirwe n’ubufasha bugere kuri buri wese.

Mu nama y’iminsi ibiri yahuje imiryango idaharanira inyungu yo mu bihugu bivuga ururimi rw’Icyongereza, igamije gufatira hamwe ingamba zo gukumira iki cyorezo, Felecité Rwemarika, Umuyobozi Mukuru w’impuzamiryango ishinzwe kurwanya Sida, igituntu na malaria, yavuze ko bagiye kurebera hamwe uko inkunga zibonetse zizajya zigezwa ku bo zigenewe.

Yagize ati “Tugiye kurebera hamwe uburyo CCM yagira uruhare mu kurandura icyorezo cya Sida gikomeza gukwirakwira. Tugiye kurebera hamwe ibitagenda neza, uburyo amafaranga abonetse azajya agezwa ku bo agenewe.”

Yakomeje avuga ko hari abantu bagihisha ko bafite ubwandu, iyi nama ikazafatirwamo ingamba z’uko hazakorwa ubukangurambaga bw’umwihariko n’ubujyanama bifasha kwigirira icyizere.

Olive Mumba, Umuyobozi w’impuzamiryango idaharanira inyungu irwanya SIDA muri EAC (EANNASO), ifite ikicyaro Arusha muri Tanzania avuga ko uyu ari umwanya mwiza wo kurebera hamwe ibitagenda no kubifatira ingamba.

Yagize ati “Tugiye kungurana ibitekerezo, tureba ibigenda neza n’ibitagenda neza tunashake uko twabivugurura.”

Abakora umwuga w’uburaya ni kimwe mu byiciro bikwirakwiza ubwandu kizibandwaho, harebwa uburyo cyafashwa kuva muri uwo mwuga bakikteza imbere.

Phillipa Turcker, umwe mu bashinze AAI (AIDS Accountability International), akaba ashinzwe ishami ry’ubushakashatsi n’itumanaho avuga ko gushyingira abana batarakura ari kimwe mu bibazo bikomeye ibihugu byinshi bya Afurika bihura na byo kandi ko byerekeza ku byago byo kwandura Virus ya Sida.

Iyi nama yateguwe n’ihuriro ry’imiryango nyarwanda idaharara inyungu igamije kurwanya Virus ya Sida no kwita ku buzima (RNGOF: Rwanda Non Government Organization Forum on AIDS and Health Organization) ku bufatanye n’ihuriro ry’iyo miryango muri Afurika y’i Burasirazuba (EANNASO).

Imibare yatangajwe na RBC Kanama 2015, yagaragaje ko abantu ibihumbi 12 bandura Vurusi itera Sida buri mwaka. Ku Isi, abagera kuri miliyoni 36.7 bari bafite ubwandu bwa Virusi itera SIDA mu 2015, muri bo miliyoni 1.8 bari abana.

Ababana n’ubwandu bw’agakoko gatera SIDA biyongera cyane mu mijyi mu Rwanda, kuko bari ku kigero cya 5.6%, mu gihe mu cyaro ari 2.6%. Mu baryamana bahuje ibitsina, ubwandu buri kuri 3.3%, mu gihe 11,1% bo ari abashakanye batandukanye.

Abitabiriye inama bungurana ibitekerezo
Felecité Rwemarika, Umuyobozi Mukuru w’impuzamiryango ishinzwe kurwanya Sida, igituntu na malaria
Olive Mumba, Umuyobozi w’impuzamiryango idaharanira inyungu irwanya SIDA muri EAC (EANNASO)
Phillipa Turcker, umwe mu bashinze AAI (AIDS Accountability International), akaba ashinzwe ishami ry’ubushakashatsi n’itumanaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza