Imashini u Rwanda rwakiriye mu 2017 zizafasha mu gutanga ubuvuzi bwihuse

Yanditswe na Evariste Nsengimana
Kuya 9 Mutarama 2018 saa 08:16
Yasuwe :
0 0

Mu mwaka ushize wa 2017, u Rwanda rwiyubatse mu nzego zitandukanye zibumbatiye iterambere rusange n’urw’ubuzima rudasigaye inyuma kuko rwashyizwemo ingufu nyinshi, cyane cyane zishingiye ku kwimakaza ikoranabuhanga muri serivisi zirutangirwamo.

Muri uku kwiyubaka, rwakiriye ibikoresho bitandukanye, birimo imashini zifashisha ikoranabuhanga rihambaye mu buvuzi bw’indwara z’umutima, impyiko, kanseri n’izindi, hagamijwe kwihutisha serivisi no kuruhura abarushywaga no kwivuza.

Bimwe mu bibazo bikomeye zaje gukemura bibangamiye urwego rw’ubuvuzi birimo icy’abarwayi bajya kwivuza mu mahanga, umubare udahagije w’inzobere z’abaganga n’ibindi.

Ibitaro bya Gisirikari bya Kanombe byahawe Scanner yo ku rwego rwo hejuru (RMH), ifasha mu gusuzuma indwara hakoreshejwe amafoto (medical Imaging), ifite ubushobozi burenze izari ziri mu gihugu zindi kuko yo yihuta cyane.

Ibi bitaro kandi byahawe imashini 10 zifashishwa mu kuvura impyiko, zatanzwe na Misiri mu Ukwakira 2017.

Imashini zifashishwa mu kuyungurura amaraso zahawe Ibitaro bya Gisirikare i Kanombe zaje mu gihe zari zikenewe cyane mu gihugu

Ubwo yatahaga ishami ry’Ibitaro bya Kanombe izo mashini zizakoreramo, ku wa 21 Ukwakira 2017, Minisitiri w’Ubuzima, Dr. Diane Gashumba, yashimiye Misiri avuga ko izo mashini zizagabanya amafaranga u Rwanda rwatangaga rujya kuvuza abarwaye impyiko mu mahanga.

Ushinzwe itumanaho mu bitaro bya Gisirikare bya Kanombe, Sonia Iribagiza, yabwiye IGIHE ko mbere yo guhabwa izo mashini zifashishwa mu kuvura impyiko, abarwayi basanganaga ibimenyetso byazo baboherezaga ku bindi bitaro bibifitiye ubushobozi, birimo ibya CHUK n’ibya Faisal.

Ibitaro bitandatu by’Uturere byahawe radiographie

Ministeri y’Ubuzima ibinyujije mu Kigo cy’Igihugu gishinzwe ubuzima (RBC), yaguze imashini esheshatu, zishyirwa mu bitaro by’Uturere, birimo ibya Kabutare, Kaduha, Mugonero, Shyira, Kibirizi na Kigeme, zikaba zizunganira izari zishaje.

Minisante ivuga bizatuma abarwayi barushaho kwitabwaho kurushaho n’ingendo bakoraga bajya gushaka serivisi z’ubuvuzi zizagabanuka.

Hagamijwe kurwanya impfu z’abana bavuka no kugabanya urugendo ababyeyi bakora bajya kwivuza, Ministeri y’Ubuzima ifatanyije na RBC, mu 2017, yubatse inzu zirindwi mu bitaro by’uturere birimo ibya Nyanza, Kabutare, Gihundwe, Gisenyi, Rutongo, Gahini na Rwamagana.

Buri nyubako ifite ubushobozi bwo kwakira ababyeyi bagera kuri 70, ibyumba bibiri byo kubagiramo, ibyumba bitanu byo kubyarizamo icyarimwe ndetse n’icyumba kigari cy’abana bavukanye uburwayi cyangwa bavutse igihe kitaragera n’ibindi byumba byo kurwarizamo ababyeyi.

Hanaguzwe ibikoresho byo kwa muganga byose bizakenerwa muri izo nyubako nk’ibitanda, kugeza ku mashini zitera ikinya ndetse n’izisukura ibyuma bakoresha babaga.

Hari kandi imashini izajya ifasha abaganga kubona amafoto y’agace k’igufa bashaka kubaga, Ibitaro bya Kibogora biherereye mu Karere ka Nyamasheke byahawe. Iyi mashini (C-arm) igura asaga miliyoni 75 z’amafaranga y’u Rwanda, yatanzwe ku nkunga ya Rotary Club ya Kigali, Rotary Club yo mu Budage na Rotary Club International.

Mu bikorwa remezo byubatswe mu mwaka ushize, harimo kandi ibitaro bya Shyira biri mu Karere ka Nyabihugu byatashwe n’Umukuru w’Igihugu ku wa 04 Nyakanga 2017 nyuma yo kuzura bitwaye asaga miliyari eshanu z’amafaranga y’u Rwanda. Ni bimwe mu bikoresha ikoranabuhanga mu kuvura rizwi nka Telemedicine.

Hari ibihanzwe amaso

Nubwo hari bimwe mu byatangiye mu gusigasira ubuzima bw’Abanyarwanda, hari n’ibindi byitezwe birimo Radiotherapy Center, yifashishwa mu kuvura kanseri, ibitaro bya gisirikare byitegura kwakira.

Muri gahunda yo kuvura kanseri, ibitaro bya gisirikari biri gutunganya no kwitegura kwakira imashini zizavura kanseri hakoreshejwe uburyo bwa rayon x.

Inyubako y’umwihariko yabugenewe izakira izo mashini igiye kuzura, imashini na zo zageze mu gihugu, mu gihe gito zizaba zimaze gutunganywa no gushyirwa mu myanya yazo mbere.

Umuvugizi wa Minisiteri y’Ubuzima, Malick Kayumba, yabwiye IGIHE ko intego ari uko abanyarwanda babona ubuvuzi bakeneye kandi hafi y’aho batuye.

Ati “yego ibi bikoresho birahenze cyane ariko nkuko mubizi leta yacu ishyira inyungu z’umunyarwanda imbere y’ibindi byose. Niyo mpamvu urwego rw’ubuzima ruzakomeza kwiyubaka no gushyira imbaraga mu kwita ku banyarwanda bafite uburwayi bukomeye ngo babone uko bakwivuriza mu gihugu ndetse by’akarusho hafi y’aho batuye.”

Iyi scanner ifasha mu gusuzuma umuntu hagendewe ku byo amafoto yagaragaje
Ibitaro bya Shyira byafunguwe na Perezida Kagame umwaka ushize ni bimwe mu byitezweho gufasha abaturage b'Akarere ka Nyabihu n'inkengero zako

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza