00:00:00 IGIHE NETWORK KN KINYARWANDA EN ENGLISH FR FRANCAIS

Ikizatuma abangavu batewe inda batinyuka gutamaza abagabo babasambanyije

Yanditswe na Prudence Kwizera
Kuya 4 Kamena 2021 saa 11:19
Yasuwe :
0 0

Bamwe mu bangavu batewe inda imburagihe bavuga ko kuba badatinyuka kuvuga abagabo babahohoteye babiterwa n’uko iyo babivuze abo bagabo bafatwa bagafungwa bikarangirira aho, bo bagasigara barera abana babyaranye bonyine nta n’ubufasha bundi bahabwa.

Ibi babivuze nyuma y’uko Leta y’u Rwanda ishyize ingufu mu gushakisha abagabo bateye inda abangavu bataruzuza imyaka y’ubukure kugira ngo babiryozwe kuko ari icyaha gihanwa n’amategeko bakoze.

Gusa abangavu bakunze gushinjwa gihishira abagabo babateye inda, hakibazwa impamvu badashaka kubavuga kandi barabahohoteye.

Umunyamakuru wa IGIHE, yegereye bamwe mu bangavu bo mu turere twa Nyamagabe na Huye batewe inda imburagihe aganira nabo barirekura bamubwira impamvu banga kugaragaza ababahohoteye.

Imibare igaragaza ko mu Karere ka Nyamagabe abangavu batewe inda imburagihe muri uyu mwaka gusa barenga 450.

Umwe wo mu Karere ka Nyamagabe watewe inda afite imyaka 16 y’amavuko, yavuze ko iyo umugabo wasambanyije umwangavu afuzwe, uwo mwangavu nta butabera bwuzuye aba abonye.

Ati “Njyewe impamvu ntashobora kumuvuga ni uko n’ababavuze ntacyo byabamariye. Hari umukobwa wamuvuze bituma uwo mugabo bahita bamufata baramufunga, bamukatiye imyaka 25. Ubu uwo mukobwa ari kurera umwana wenyine, n’amafaranga uwo mugabo yamuhaga ntakiyabona, yabaye umwanzi w’umuryango w’umugabo kandi abayeho nabi.”

“Gufungisha umugabo waguteye inda kandi mwaramaze kubyarana ntacyo bimaze, usibye kuguteza abantu ngo wabafungishirije umuntu kandi n’igikoma cy’umwana baguhaga ntube ukikibonye.”

Undi mwangavu wo mu Karere ka Nyamagabe na we watewe inda imburagihe afite imyaka 15 y’amavuko yiga mu mwaka wa gatanu w’amashuri abanza, avuga ko yahohotewe ariko adashobora kuvuga uwayimuteye kuko amufasha.

Ati “Yarampohoteye ariko kugeza ubu aramfasha kuko iwacu tutishoboye. Ubu se muvuze bakamufunga, ibyo yampaga abamufunze bajya babimpa? Njyewe icyo nakora ni ukwirinda ko hari uwakongera kuntera inda ariko kumuvuga byo sinabikora.”

Abangavu n’ababyeyi bifuza ko itegeko ryavugururwa

Bamwe mu bangavu baganiriye na IGIHE bifuza ko itegeko rihana abagabo basambanya abangavu ryavugururwa, ku gifungo bahabwa hakiyongeraho indishyi z’akababaro zihabwa uwahohotewe, bakemeza ko ari bwo yaba ahawe ubutabera bwuzuye.

Umwe wo mu Karere ka Huye yagize ati “Impamvu tutabavuga ni uko iyo tubavuze babafunga gusa, twe tugasigara mu bibazo twenyine. Ku gifungo bazongereho n’amafaranga azajya ahabwa uwahohotewe kuko uwagombye kumufasha aba afunzwe.”

Abangavu baganiriye na IGIHE bavuze ko itegeko riramutse rivuguruwe, umugabo wateye umwangavu inda agategekwa kumuha indishyi z’akababaro bajya batinyuka abakabavuga.

Bamwe mu bangavu bo mu Karere ka Nyamagabe batewe inda imburagihe mu mwaka wa 2021

Iki cyifuzo cyo ko kuvugura itegeko rihana umugabo wasambanyije umwangavu gishyigikiwe na bamwe mu babyeyi baganiriye na IGIHE.

Mukakabera Pascasie ati “Itegeko rikwiye kuvugururwa abo bagabo bakajya bategekwa gutanga indishyi z’akababaro ku mwana bahohoteye, kuko umugabo aguterera inda umwana bamufunga ugasigarana umutwaro wo kurera umwana we wenyine. Icyifuzo ni uko ku gifungo bahabwa hajya hiyongeraho n’amafaranga ahabwa wa mwana watewe inda buri kwezi yo kurera umwana.”

Undi mubyeyi witwa Ndabarinze François na we avuga ko kugira ngo umwana wasambanyijwe ahabwe ubutabera bwuzuye, uwamusambanyije adakwiye gufungwa gusa ahubwo agomba gutegekwa kugira indishyi ihamye amuha.

Ati “Umwana ni we uba yarahemukiwe, none bafashe uwamuhemukiye baramufunze, umwana asigaye aho nta ndishyi ahawe. Urumva se nyine aba ahawe ubutabera bwuzuye? Ababishinzwe bazabirebeho babikosore ni bwo n’abo bana bazajya bavuga ababasambanya.”

Ni icyifuzo gishyigikiwe na bamwe mu bayobozi

Umuyobozi wungirije ushinzwe imibereho myiza y’abaturage mu Karere ka Nyamagabe, Mujawayezu Prisca, avuga ko icyifuzo cy’abo bangavu gifite ishingiro.

Abishingira ku kuba abangavu bakomeza guhishira ababateye inda kuko bashobora kuba babona kubivuga nta nyungu bakuramo.

Ati “Ibyo byo rwose nanjye ndabishyigikiye gufungwa ntabwo ari cyo cyonyine gikwiye kuba igihano. Yagombye noneho no kurera, hari ukubyara ariko hagombye no kubaho kurera, umwana wavutse icya mbere agomba gukura, igihe amaze gukura agomba kubaza ngo Se ni nde kandi agomba kumumenya.”

“Noneho uwo mugabo wahemukiye umwana aba agomba gutangira kurera umwana akiri mutoya ni yo mpamvu dukangurira bariya bakobwa bahuye n’ibibazo ko bajya batubwiza ukuri ku buryo umwana yabona ubutabera, papa we akamurera kandi akanamenyekana noneho na wa mukobwa akumva ko uwamukoreye icyaha yabibajijwe akamufasha no kurera uwo mwana.”

Mporanyi Théobald, Umujyanama mu Kigo giharanira Uburenganzira no guteza imbere Ubuzima, HDI, akaba yarigeze no kuba Depite mu Nteko Ishinga Amategeko y’u Rwanda mu gihe cy’imyaka 10, asanga hakwiye ubusesenguzi kuri iyo ngingo kugira ngo uwakorewe icyaha na we ahabwe ubutabera bwuzuye afashwe kwisana.

Ati “Niba Leta y’u Rwanda yarashyizeho itegeko rihana icyaha cy’ihohotera ku buryo bw’umwihariko abana bari munsi y’imyaka18, uwabikoze akamenyakana akabihamywa n’urukiko arahanwa, icyo ni kimwe. Icya kabiri ni ukuvuga ngo abantu icyo bagasesenguye, nyuma y’igihano uwakoze icyaha iyo afunzwe nk’uko itegeko ribiteganya, wa wundi wakorewe icyaha aba ahawe ubutabera ku buryo bwuzuye? Cyangwa twashyize itegeko mu bikorwa uwakoze icyaha yahanwe ariko wa wundi wagikorewe we ntabwo yanyuzwe?”

“Uwakorewe icyaha yigaga none abaye umubyeyi imburagihe, icyo agomba gukorerwa ni iki? Hari ukubanza guhana nk’uko amategeko abiteganya, ariko umwangavu yagombye gusubizwa ka gaciro ke niba yigaga akiga, agafashwa kurera wa mwana akakirwa mu sosiyete akongera gusubira ku murongo.”

Mporanyi avuga ko ubusanzwe uwakorewe icyaha wese afite uburenganzira bwo kuregera indishyi, ariko agasanga nanone abangavu basambanywa bakwiye koroherezwa, hagateganywa indishyi uwabahohoteye yajya atanga batiriwe bajya kuyiregera kuko usanga hari n’abadafite ubushobozi bwo kubyikorera.

Ku bwe asanga hakwiye ubushakashatsi bwihariye ku kibazo cy’umubare w’abangavu baterwa inda imburagihe kuko bakomeje kwiyongera kandi harashyizweho ingamba zo kubikumira.

Ngo ubwo bushakashatsi buzagaragaza impamvu abangavu bakomeza gusambanywa ku bwinshi, impamvu hashyizweho ingamba zo kubikumira ariko bikaba bidahagarara, impamvu abenshi banga kuvuga ababateye inda, impamvu abagabo bakomeza kubasambanya kandi barashyiriweho ibihano bikakaye n’ibindi.

Buzagaragaza kandi niba ababyeyi barananiwe kurera nk’uko bikunze kuvugwa, niba abangavu barananiranye nk’uko babishinjwa cyangwa niba hari n’ibindi byihishe inyuma y’icyo kibazo cyo gutwita imburagihe.

Imibare yagaragajwe na Minisiteri y’Ubuzima mu Rwanda, yerekana ko mu mwaka wa 2016, abangavu basambanyijwe bagaterwa inda z’imburagihe mu gihugu hose bari 17.849, mu 2017 bari 17.337 naho mu 2018, bariyongereye bagera ku 19.832, mu gihe imibare y’abasambanyijwe bagaterwa inda hagati y’ukwezi kwa Mutarama na Kanama 2019 bari 15.656.

Mu bana bavutse umwaka ushize wa 2020, Raporo y’Imibare y’Ingenzi yasohowe n’Ikigo cy’Ibarurishamibare igaragaza ko harimo 13.185 bavutse ku bafite hagati y’imyaka 15 na 19.

Mporanyi Theobald yavuze ko hakenewe ubushakashatsi bwimbitse bugamije kumenya impamvu abangavu baterwa inda banga kuvuga abazibateye ngo bahanwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .