00:00:00 IGIHE NETWORK KN KINYARWANDA EN ENGLISH FR FRANCAIS

Ibitaro bya Munini Perezida Kagame yemereye abaturage byaruzuye, hategerejwe ibikoresho

Yanditswe na Prudence Kwizera
Kuya 18 Gicurasi 2021 saa 08:04
Yasuwe :
0 0

Ibitaro bya Munini Perezida Kagame Paul yemereye abaturage bo mu Karere ka Nyaruguru byamaze kuzura, hategerejwe ibikoresho kugira ngo bitangire gutanga serivisi z’ubuvuzi.

Imirimo yo kubaka Ibitaro bya Munini yatangiye muri Werurwe 2018, icyiciro cya mbere kigizwe n’ibyumba 160 ni cyo cyamaze kuzura, kikaba kigizwe n’inzu ebyiri z’amagorofa atatu agerekeranye, ariko hakazakurikiraho kubaka icyiciro cya kabiri kigizwe n’inzu imwe nini ifite ibyumba 140.

Mutsinzi Divine ushinzwe Imirimo y’inyubako nshya y’Ibitaro bya Munini, avuga ko hashize ibyumweru bibiri yuzuye kandi imirimo yoroheje bari kuhakora itabangamira serivisi mu gihe ibyo bitaro byaba bitangiye gukora.

Ati “Ubu turi gukosora utuntu duto duto ariko ibyangombwa byose byararangiye. Ubu dutegereje ko bazana ibikoresho kuko no mu gihe cyo gushyiramo ibikoresho hari utuntu duke tugenda dusenyuka, dutegereje ko babizana natwo tugasiga tutwubatse hanyuma bikarangira.”

Ku Munini hasanzwe ibitaro ariko abaturage bifuje ko byavugururwa bagahabwa ibiri ku rwego rwo hejuru, Umukuru w’Igihugu abibemerera mu 2015.

Bamwe mu baturage twasanze baje gusaba serivisi kuri ibyo bitaro bihasanzwe bishimira ko imirimo yo kubaka iby’icyitegererezo yamaze kurangira, gusa bagasaba ko igikorwa cyo kubishyiramo ibikoresho cyakwihutishwa kugira ngo bitangire kubaha serivise bisanzuye.

Uwimana Donatha ati “Icyo dusaba ni ukugira ngo n’ibyo bikoresho bibura biboneke vuba, ibitaro bibe byatangira tubone aho tuzajya twivuriza hafi kandi heza.”

Umuyobozi Mukuru w’Ibitaro bya Munini, Dr Nteziryayo Philippe, avuga ko inyubako nshya zije gukemura ikibazo cy’ubucukike bahuraga nacyo ndetse no gutanga serivisi z’ubuzima zisumbuyeho ku zo bari basanzwe baha ababagana.

Ati “Inzu zari zisanzwe zikorerwamo zari nto ari na nkeya, ariko nk’uko mwabibonye ni ibitaro byubatse mu buryo bugezweho bujyanye n’igihe. Bizakemura ikibazo rero cy’inzu twakoreragamo zitujuje ubuziranenge ugereranyije na serivisi zitangwa muri iki gihe.”

Avuga ko hatabayeho imbogamizi, mu mezi abiri ari imbere ibikoresho byaba byagezemo bagatangira kubikoreramo.

Umuyobozi w’Agateganyo w’Akarere ka Nyaruguru, Gashema Janvier, avuga ko ukwezi kwa Kamena 2021 kutazashira ibikoresho bitahageze kuko isoko ryo kubigura ryatanzwe.

Ati “Ibikoresho, isoko ryaratanzwe, RBC yararitanze kandi nk’uko mwabibonye byo [ibitaro] byarangiye ibyo bikoresho nabyo bigiye kuboneka ku buryo mu gihe kitarambiranye bitangira gukora.”

Yakomeje avuga ko mu minsi ya vuba hazakorwa ihererekanyabubasha ry’ibanze kugira ngo bitegure kwakira ibikoresho no gushyiramo ibindi bikenewe nka internet.

Ubusanzwe ibitaro bya Munini byakira abarwayi bagera ku 100 ku munsi. Bisanganywe ibitanda bigera kuri 60 byo kuryamishaho abarwayi. Ibitaro bishya byo bizashyirwamo ibitanda 300.

Dr Nteziryayo avuga ko indwara ziganje mu Karere ka Nyaruguru zirimo izo mu mubiri, iz’abana nk’umusonga ndetse n’izikomoka ku mwanda.

Gashema Janvier yavuze ko ikijyanye no kubiha umwihariko wo kuvura indwara runaka zitavurirwa ahandi mu Rwanda bizakomeza kuganirwaho harebwa niba bishoboka.

Byari biteganyijwe ko Ibitaro bishya bya Munini bizuzura bitwaye miliyari 7 Frw ariko byuzuye bitwaye miliyari 9 Frw bitewe n’uko bimwe mu bikoresho byagiye bihenda kandi hari n’ibyongewemo bitari mu igenabikorwa rya mbere.

Abaturage bifuza ko ibikoresho byazanwa vuba kugira ngo batangire guhabwa serivisi
Aha ni hamwe mu cyumba ahazashyira ibitanda
Imbere mu bitaro bishya bya Munini ni uku hagaragara
Inyubako yaruzuye hasigaye gushyiramo ibikoresho gusa ngo abaturage batangire kuhivuriza
Imirimo yo kubaka ibi bitaro yarasojwe
Ibitaro bya Munini Perezida Kagame yemereye abaturage byamaze kuzura ndetse hategerejwe ibikoresho kugira ngo bitangire gukora
Icyiciro cya mbere cy'ibi bitaro kigizwe n'ibyumba 160
Imirimo yo kubaka Ibitaro bya Munini yatangiye muri Werurwe 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .