Ibihe by’ubushyuhe bishobora kongera ibyago byo kuba umugore yabyara umwana utagejeje igihe

Yanditswe na Iradukunda Serge
Kuya 4 Ukuboza 2019 saa 10:45
Yasuwe :
0 0

Ubushakashatsi bwagaragaje ko ubushyuhe bwinshi buturaka ku ihinduka ry’ibihe bwongera ibyago byo kuba umugore yabyara igihe kitageze.

Ni ubushakashatsi bwakozwe n’abarimu babiri bo muri kaminuza zo muri leta Zunze Ubumwe za Amerika Alan Barreca na Jessamyn Schaller aho bakoze ubusesenguzi ku makuru y’abana miliyoni 56 bavutse muri Amerika hagati yo mu 1969 na 1988.

Ubu bushakashatsi bwagiye hanze ku wa Mbere bugaragaza ko igihe muri Leta Zunze Ubumwe za Amerika ubushyuhe bwari kuri 32°C umubare w’abana bavuka wazamutse ku kigero cya 5%, ndetse bigakomeza kwiyongera no mu minsi yakurikiyeho, gusa ubushyuhe bumaze kugabanuka n’umubare w’abana bavuka nawo waramanutse.

N’ubwo 5% bishobora kumvikana nk’umubare muto, ubu bushakashatsi bugaragaza ko mu gihe cy’imyaka 20, kubera ubushyuhe muri Leta Zunze Ubumwe za Amerika buri mwaka havuka abana 25 000 batagejeje igihe.

Muri ubu bushakashatsi abagore benshi bagiye babyara mbere y’iminsi itandatu ku gihe cyari giteganyijwe abandi babyara mbere ho ibyumweru bibiri.

Umwe mu bakoze ubu bushakashatsi Alan Barreca, avuga ko hari impungege z’uko iyi mibare izagenda yiyongera kuko ubushyuhe nabwo bukomeje kwiyongera.

Ati “Tubona hari ibyago ko mu mpera z’ikinyejana umwana umwe mu bana ijana muri Leta Zunze Ubumwe za Amerika azajya avuga atagejeje igihe, iyi mibare ishobora kugaragara nk’aho ari mito ariko irenze ibyago umuntu aba afite byo kuba yakora impanuka mu modoka”.

N’ubwo ubu bushakashatsi butagaragaza neza isano iri hagati yo kwiyongera k’ubushyuhe no kubyara igihe kitaragera, buvuga ko ubushyuhe bushyira igitutu ku mikorere y’umutima ndetse no kwiyongera ku musemburo wa Oxytocin, ibi byose bikaba byatuma umugore abyara igihe kitageze.

Bivugwa ko umugore yabyaye igihe kitageze, igihe yabyaye ku cyumweru cya 37 cyangwa mbere yaho, ndetse umwana wavutse iyo abashije kubaho aba afite ibyago byinshi byo guhura n’ibibazo by’uburwayi birimo kwangirika kw’ibihaha, ibibazo by’umutima, ibibazo by’igogora ndetse n’ibibazo mu mikorere y’ubwonko ugereranyije n’umwana wavukiye igihe.

Ubushakashatsi bwagaragaje ko ubushyuhe bwinshi buturaka ku ihinduka ry’ibihe bwongera ibyago byo kuba umugore yabyara igihe kitageze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza