Ibibera muri ‘Salle d’Op’, icyumba gitinywa na benshi mu bitaro

Yanditswe na David Eugène Marshall
Kuya 4 Nzeri 2018 saa 12:52
Yasuwe :
0 0

Hari ubwo ugera ku bitaro ukabona ahanditse ngo Ibagiro, Theatre cyangwa ‘Salle d’Opération’, icyumba kivurirwamo indwara zinyuranye mu buryo bwo kubaga cyangwa gukosora ahari ubusembwa mu yandi magambo.

Hari ubona iyo nyito umutima ugasimbuka bitewe n’uko ahazi cyangwa bamwe tukahabona twihitira tutazi ibiberamo.

Kuri iyi nshuro IGIHE yasuye iki cyumba mu Bitaro bya Kaminuza bya Kigali, CHUK.

Dr Faustin Ntirenganya ukuriye serivisi zo kubaga muri ibyo bitaro, avuga ko kuba hitwa mu ibagiro bituma abantu batinya iyi serivisi, agasanga hakenewe inyito ikwiye.

Ati “Rwose byaba byiza abantu bavuze ngo hariya havurirwa indwara bakoresheje uburyo bwo kubaga aharwaye, cyangwa gukosora ahari ubusembwa.”

CHUK izwi nka bimwe mu bitaro byakira abafite uburwayi bukomeye cyangwa abakoze impanuka, barimo abakeneye guhura n’inzobere.

Muri Salle d’Op niho haba hakoraniye itsinda ry’abagomba kubaga uburwayi rigizwe n’inzobere, abaganga, abaforomo n’abatera ikinya, buri wese afite inshingano ze ariko zose zuzuzanya.

Muri Salle d’Op amategeko arusha ibuye kuremera!

Mbere yo kwinjira muri iki cyumba, yaba umuganga cyangwa undi wahawe uburenganzira bwo kuhinjira, itegeko rya mbere ni ukwiyambura imyenda ugahabwa indi, ukambara inkweto zabigenewe.

Nta mirimbo yemerwa uwo waba uriwe wese, muri Salle d’Op itegeko ni itegeko!

Ibyo biri mu buryo bwo gukumira microbe aho zava hose, hirindwa icyahungabanya igikorwa kigomba kuramira ubuzima bw’ubagwa.

Ubwo nasuraga iki cyumba, hari hagiye kubagwa abantu batatu barimo ufite uburwayi bw’igifu, ufite ikibazo cy’ubusembwa ku munwa n’umusore wavukanye intoki zifatanye wari ukeneye ko zitandukanywa.

Muri Salle d’Op hasaba umutima ukomeye

Ucyinjira muri iki cyumba ufatwa n’igihunga nyamara abakoreramo ugasanga bamwenyura, kuko ari ibikorwa bamaramo amasaha menshi hafi ya buri munsi.

Wakirwa n’imashini zaka amatara y’amabara yose n’utwuma tujwigira, tumwe twitsa utundi dutsikimba, ugahita wambaza Nyagasani ukeka uti ‘aba bantu wabona bankurikijeho!’

Mbere yo gutangira kubaga, ikipe ibanza gusesengura niba amakuru yose arebana n’uburwayi ahari, kandi ay’ingenzi akandikwa ku kibaho gihari, hagakurikiraho kurebera hamwe ibikoresho biri bwifashishwe.

Usanga bafite ibikoresho byinshi byagenewe kubaga, ibyongera umwuka n’ibindi, ku buryo uko iminota igenda yigira imbere ubwoba bugutaha kandi atari wowe ugiye kuvurwa.

Ibyo bikoresho birimo utwuma dukoreshwa mu gusatura umubiri bakaducomeka ku birindi byatwo, imikasi mito n’iminini bakayegeranya, yaba ikata n’iyifashishwa mu gufunga imitsi ngo amaraso atava igihe batarahadoda.

Babanza kwivuga n’amazina kuri buri wese n’icyo aza kuba ashinzwe muri Opération, ntawitwaje ko we na mugenzi we basanzwe baziranye, itegeko ni itegeko!

Ibyo byose birangiye habaho gusoma mu ncamake igikorwa gikurikiyeho, ijambo rya nyuma risoza imyiteguro rikavugwa na muganga uyoboye abandi.

Kuri iyi nshuro yari Dr Ntirenganya, aterura agira ati “Hari uwumva afite ikibazo ku gikorwa tugiye gutangira?”

Ibi kandi ntibabikora nk’urwiyerurutso, kuko Opérations ishobora gusubikwa kubera impungenge umwe agaragaje, umurwayi n’abamurwaje bagahabwa ibisobanuro.

Nk’urugero, ubwo nasuraga iki cyumba, abaganga basubitse kubaga umusore wari urwaye igifu kandi yari amaze kugera ku gitanda.

Basanze afite ikibazo cy’amaraso make bagira impungenge z’uko abazwe ashobora kugira ibindi bibazo by’ubuzima banzura ko igikorwa gisubikwa, bakazabanza kuzamura ibipimo bikenewe n’ibindi bijyanye n’ubuzima bwe.

Iri tsinda rirubahana bidasanzwe, waba inzobere, waba muganga usanzwe, abatera ikinya n’abaforomo ndetse n’abanyeshuri kandi igitekerezo cy’umwe gihabwa uburemere n’ikipe yose ijana ku rindi.

Igikorwa nyir’izina…

Itegeko rya nyuma ryo gutangira kubaga ritangwa n’ushinzwe gutera ikinya, ubundi bakanzika.

Muganga uyoboye igikorwa ari nawe ubaga, aratangira abandi bakajya bamuhereza udukoresho; ibi kandi baba banashobora kubirebera kuri écrans zabugenewe ziba ziri impande n’impande.

Iki gice ni nacyo gikangaranya abatabimenyereye nko kuba witegereza basatura mu nda h’umuntu, ukabona igifu, amara, rimwe na rimwe ukabona muganga abitandukanya ugakeka ko bitari busubirane.

Ibi bitera ubwoba abatabimenyereye kuko ubusanzwe n’ukaswe n’icyuma akata inyanya hari abo usanga induru bayiha umunwa.

Mu gihe njye numvaga ubwoba bwantashye, Dr Ntirenganya wari uyoboye iki gikorwa we ahamya ko ubu buzima babumenyereye, mu gihe hari uwakeka ko ajya abirota, akarara ashikagurika.

Yagize ati “Ni nk’uko umushoferi adatinya imodoka, iyo uzi gutwara uba uzi gutwara, natwe turabimenyera.”

Mu gusa n’utebya ngo we aho kurota abaga yarota ikipe ya Mukura VS na Real Madrid abereye umufana ukomeye.

Mu gihe abandi babaga, utera ikinya aba acungana n’imashini itanga ibipimo by’uko umurwayi ahumeka n’uko umutima we utera, acungana n’ikinya ngo kidashira umurwayi akababara.

Mu gihe kubaga birangiye, abaganga barashimirana ukabona ko banezerewe, icyo gihe ushinzwe gusinziriza no gukangura umurwayi (iyo bishoboka ko yakanguka ako kanya) niwe uba asigaranye akazi, hagakurikiraho kumujyana ahagenewe abamaze kubagwa.

Umurwayi umaze kubagwa nawe biba ngombwa ko bamuvugisha kugira ngo barebe ko yagaruye ubwenge nyuma yo guterwa ikinya.

Ababimenyereye bavuga ko ijambo rya mbere uwo gishizemo avuga riba ritangaje, bamwe bagasa n’abaganiriza abakunzi babo, abasubiza ibintu bidahuye n’ibyo babajijwe, abandi bagashaka gukomeza gufata ikiganza cy’umuforomo n’ibindi biba bidasanzwe.

Uwo munsi natunguwe n’ukuntu babaza umugore wari ufite ikibazo cy’ubusembwa ahagana ku munwa, bakamubaga ku buryo wabona ko igihugu cy’umunwa wo hasi cyagiye ukwacyo, bakuramo icyari kimeze nk’ikibyimba cyamuteraga ubusembwa.

Nyuma baramudoze aba mushya ku buryo uwo bahura yamuyoberwa.

Ni ubuzima busaba kwihangana

Dr Ntirenganya agaragaza ko nubwo umurimo wo kubaga abarwayi ari ingenzi ku rwego rw’ubuvuzi mu gihugu, abawukora ari bake ku buryo umuganga amara amasaha menshi mu kazi.

Ishami ry’Umuryango w’Abibumbye ryita ku buzima, OMS, riteganya ko abaganga 12 babarirwa abaturage 100.000 mu kubaga, ariko mu Rwanda no muri Afurika y’Uburasirazuba umubare w’ababaga ukiri hasi cyane, aho bakibarirwa kuri 0.3 ku baturage 100.000.

Ibyo ngo binatuma abarwayi bahabwa igihe kirekire bategereje kubagwa, bamwe bagakeka ko ari ugushaka kubaha serivisi mbi kandi ataribyo.

Ubusanzwe gahunda ihabwa umurwayi mbere yo kubagwa ngo ntiyakagombye kurenza amezi atatu, ariko iyo birenze atandatu biba bikabije.

Kutagira abaforomo b’inzobere mu mirimo ikorerwa muri Salle d’Op nabyo ngo ni ikibazo, kikiyongera ku batera ikinya nabo bakiri bake.

Dr Ntirenganya yakomeje agira ati “Urumva niba ndi umuganga w’inzobere, nkeneye n’umuforomo w’inzobere wo kumfasha. N’abo dutoza mu gahe gato usanga nyuma bigendera kandi wabonye ko dukora nk’ikipe, iyo havuyemo umwe uhugukiwe, hasigara icyuho.”

Dr Ntirenganya avuga uretse kubona serivisi z’ubuvuzi, hakwiye n’imbaraga mu kwita ku babazwe.

Yagize ati “Ibaze nawe ubaze umurwayi igifu, mu kanya umurwaza akamuha igaburo ritajyanye [n’ubwo burwayi] rwihishwa, cya gifu kikangirika kandi yakabaye ahabwa igaburo yandikiwe na muganga, akarihabwa n’abaganga […] ni ikibazo.”

Dr Mugiraneza Oswald utera ikinya, yavuze ko muri uyu mwuga hari ibintu byinshi bishobora kubabaza umuganga.

Yatanze urugero rwo kuba yatera nk’umurwayi ikinya, kigashira igikorwa cyo kumubaga kitararangira. Ni ibintu bitaramubaho ariko yirinda umunsi ku wundi.

Nk’uburyo burambye bwo kwirinda iyi mpanuka, ngo hari uburyo bwo gukoresha ibinya bibiri kimwe giterwa umuntu mu maraso n’ikindi giterwa gikoresha uburyo bw’umwuka.

Amateka yo kubaga ahera hagati ya 1200 na 600 mbere y’ivuka rya Yezu.

Nyuma y’icyo gihe, ubuvumbuzi ku Isi bwagendaga bufata indi ntera uhereye nk’igihe babagaga nta kinya kugeza igihe cyavumburiwe n’umunyamerika Crawford Williams Long mu 1842.

Izo mpinduka zagiye ziyongera kugeza ubwo mu 1895, Wilhelm Roentgen yavumbuye Radiographie, ku buryo uyu munsi umuganga abaga ahantu abasha kwitegereza neza mu ikoranabuhanga.

Ubu kubaga bimaze gufata indi ntera kugeza ubwo mu 1987 bwa mbere abaganga bateye umutima n’ibihaha mu muntu.

Mu 2008 umufaransa Laurent Lantieri yahinduye isura y’umuntu, mu 2012 ibitaro bya John Hopkins muri Amerika bitera amaboko ku muntu naho mu 2016 muri Kaminuza ya Massachusetts muri Amerika batera igitsina ku mugabo kandi kirakora.

Igenzura rikorerwa ibikoresho mbere ya byose. Aha abaganga bari kureba niba byuzuye neza nta na kimwe kiburamo
Iki cyuma bacyita Bistouri Electrique, nicyo cyifashishwa iyo babaga umuntu batiriwe bafungura umubiri
Iri tara ryitwa Lampe Scialitique, riba rifite na za camera zohereza amashusho muri ecrans zo ku mpande
Mu gihe igikorwa cyo kubaga kiba kirimbanije, banyuzamo bakanaga akajisho kuri Ecran ziba zikoreshwa na Camera iba iri hejuru y'umurwayi
Muganga ari gutegura ibyuma, kimwe ku kindi
Muganga Dr Faustin Ntirenganya, ukuriye serivisi zo kubaga muri CHUK
Muganga ubaga bamukenyeza ikanzu babagana
Nyuma ya Operation, barashimirana, bagakorana mu ntoki, bishimira igikorwa baba basoje
Uko Salle d'Op iba iteguye mbere yo kubaga
Umuforomokazi ari gusoma dosiye y'umurwayi anasobanura buri kamwe kose abandi bamuteze amatwi
Buri kibazo cyanditse hano kigomba kubonerwa igisubizo mbere yo kubaga. Haheruka ikibaza niba nta wumva afite ikibazo kuri operation igiye kuba
Dr Oswald Mugiraneza ari gufasha umurwayi guhumeka
Ibi byuma nibyo bipima uko umutima w'umurwayi utera, inshuro ahumeka, uko amaraso atembera ndetse bikanamuha umwuka
Abaganga babanza kwiga neza amafoto y'uburwayi bakanahanahana ibitekerezo by'uko bari bubigenze
Abatera ikinya bari mu kazi iruhande rw'umurwayi n'imashini bakoresha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza