00:00:00 IGIHE NETWORK KN KINYARWANDA EN ENGLISH FR FRANCAIS

Huye: Ababyeyi n’abana bafite imirire mibi basigaye bashyirwa mu bitaro, umusaruro bimaze gutanga

Yanditswe na Prudence Kwizera
Kuya 26 Gicurasi 2021 saa 03:21
Yasuwe :
0 0

Nyuma yo kubona ko ikibazo cy’imirire mibi mu bana bato gikomeje kwiyongera kandi cyugarije umuryango Nyarwanda mu 2018, Ikigo Nderabuzima cya Sovu mu Karere ka Huye cyatangije gahunda yihariye yo kubavura no kubitaho ku buntu nta kiguzi batanze.

Icyo kigo nderabuzima giherereye mu Kagari ka Sovu mu Murenge wa Huye cyatangije iyo gahunda cyise ‘Huye kundwa kibondo’ aho buri mukozi mu bagera ku 34 bagikoraho yiyemeje gutanga 200 Frw buri kwezi ndetse n’abajyanama b’ubuzima 180 bakorana nabo mu tugari tune tugize uwo murenge biyemeza gutanga 100 Frw.

Ayo mafaranga yiyongera ku yo ikigo nderabuzima ubwacyo kiba cyashyize mu igenamigambi ryacyo ryo kwita ku bana barwaye imirire mibi ndetse n’izindi nkunga bashobora kubona.

Umukozi ushinzwe Imirire muri icyo Kigo Nderabuzima, Mukashyaka Elizabeth, yabwiye IGIHE ko bamaze kubona ko ababyeyi bafite abana barwaye imirire mibi iyo bahawe inkunga bazikoresha nabi, biyemeje kujya babazana mu Kigo Nderabuzima kugira ngo abe ari ho bafashirizwa.

Ati “Mu buryo bwo kurwanya imirire mibi twakira ababyeyi n’abana kuko ntabwo warwanya imirire mibi ku mwana gusa kandi mama we ashonje. Ubwo ni bwo twafashe gahunda yo gufata umwana na nyina tukabashyira mu bitaro, za nkunga babona kuko zakoreshwaga nabi, tukabakurikirana bari hafi yacu kugira ngo izo nkunga bazikoreshe neza, abana babashe gukira vuba.”

“Hari ikibazo cy’imirire mibi ku buryo inkunga y’ibiryo yatangwaga nta musaruro yatangaga kuko bajyaga mu rugo bakabisangira n’abandi cyangwa bakabigurisha. Bamaze kuza hano twabitagaho tukagaburira umwana na nyina twabashyize mu bitaro.”

Avuga ko nk’umubyeyi wabyaye indahekana bamuzana mu bitaro n’abana be bombi uko bakurikirana kugira ngo bose bitabweho kuko akenshi usanga bose bafite ikibazo cy’imirire mibi.

Mu 2018 batangiranye n’abana 68 hamwe n’ababyeyi babo batangira kubitaho byihariye.

Mu kumenya abana n’ababyeyi bafite imirire mibi, Ikigo Nderabuzima cya Sovu gikorana n’abajyanama b’ubuzima mu midugudu kuko ari bo babapima bakabazana kuvurwa.

Umwe mu babyeyi twasanze kuri icyo Kigo Nderabuzima ahamaze amezi abiri avurwa imirire mibi we n’abana be batatu. Avuga ko bahaje barembye kuko ntabyo kurya bagiraga mu rugo kubera ko umugabo we atamwitaho na we ntabashe guca inshuro ngo abonere abe ibyo kurya kubera imbaraga nke no kubyara indahekana.

Uyu mubyeyi w’imyaka 38 y’amavuko yinjiye mu Kigo Nderabuzima cya Sovu muri Werurwe 2021 yarananutse afite ibilo 54 ariko kuri ubu amaze kugira ibilo 68 kubera kwitabwaho agahabwa ibiryo n’imiti.

Ati “Imirire mibi njyewe n’abana banjye twayitewe no kubura ibiryo, umugabo ntabwo yatwitagaho, yaragendaga akagaruka yariye twebwe tukabwirirwa tukaburara kandi nta mbaraga zo gukorera abana nari mfite kubera inzara no gutwita kenshi.”

Uyu mubyeyi avuga ko Ikigo Nderabuzima cya Sovu cyamutabaye kuko abana bane yabyaye bose bahuye n’ikibazo cy’imirire mibi. Avuga ko we n’abana be nibamara kuvurwa bagataha azitabira umurimo kugira ngo ababonere ibiryo kandi yamaze no kuboneza urubyaro yirinda kongera kubyara indahekana.

Mu byo avuga yigishirijwe mu Kigo Nderabuzima cya Sovu harimo kumenya gutegura indyo yuzuye, kwita ku mwana no kumugirira isuku, kumugaburira no kumwonsa neza ndetse n’igihe bigomba gukorerwa.

Ni gahunda imaze gutanga umusaruro

Imibare itangwa n’Ikigo Nderabuzima cya Sovu yerekana ko gahunda ya ‘Huye kundwa kibondo’ igenda itanga umusaruro mwiza kuko abana barwaye imirire mibi bagabanutse.

Mu mwaka wa 2018 batangiranye n’abana 64 baravurwa barakira, mu 2019 hakurikiranwa 48, mu 2020 umwaka urangira hari kuvurwa 23. Muri aya mezi atanu ya 2021 hari kuvurwa abana batatu gusa.

Ibyo ahanini byatewe n’uko abamaze kuvurwa bakomeza gukurikiranwa kandi ababyeyi bakigishwa uko umwana itabwaho arindwa imirire mibi cyangwa kurwaragurika.

Abavurwa imirire mibi ni abo mu tugari tune two tugize Umurenge wa Huye ariko n’abaturutse ahandi bakagana ku Kigo Nderabuzima cya Sovu barakirwa.

Mukashyaka Elizabeth avuga ko umwana urwaye imirire mibi ku buryo bukabije ashobora kumara amezi atatu mu bitaro ari kumwe n’umubyeyi be bitabwaho, naho uyirwaye byoroheje ahamara igihe kigera ku kwezi kumwe.

Usibye kuvura abana no kubitaho bahabwa indyo yuzuye, ababyeyi babo bahabwa inyigisho zitandukanye zijyanye no gutegura indyo yuzuye no kugaburira abana ndetse no kubonsa. Bashyirwa no mu matsinda kugira ngo bajye bahererwamo inyigisho n’abajyanama b’ubuzima. Kugeza ubu mu tugari tune tugize Umurenge wa Sovu, muri buri kamwe haba itsinda.

Bimwe mu bikunze gutera imirire mibi

Abana n’ababyeyi bavurirwa imirire mibi ku Kigo Nderabuzima cya Sovu bakunze kuba barayitewe n’uko igihe umubyeyi yari atwite yabuze ubushake bwo kurya akabyihorera, hari kandi n’abarya indyo ituzuye ndetse hari n’ababura ibiryo.

Ikindi ni uko hari ababyeyi banga konsa abana babo bitwaje ko babuze amashereka, hakaba n’abatwita indahekana umwana bagahita bamukura ku ibere imburagihe.

Mukashyaka ati “Ababyeyi batwite hari igihe babura ubushake bwo kurya, tubigisha ko agomba kurya dukeya inshuro nyinshi. Iyo atonsa akavuga ngo nta mashereka agira, tumugira inama yo kurya neza no kunywa igikoma tukamwigisha no konsa neza amashereka akaboneka atarangaye cyangwa ngo abikore yibereye mu yindi mirimo.”

“Uwatwise kandi agifite umwana muto tumugira inama yo gukomeza kumwonsa ndetse no kwiyitaho kenshi kandi akitabira kwipimisha kwa muganga uko byagenwe, yagira ikibazo akihutira kujya kwa muganga.”

Umuyobozi w’Akarere ka Huye wungirije ushinzwe Imibereho Myiza y’Abaturage, Kankesha Annonciata, avuga ko gahunda ya ‘Huye kundwa kibondo’ yatanze umusaruro mwiza mu kuvura abana imirire mibi no kuyikumira.

Ati “Ni ikigo kiri ku isonga mu kurwanya imirire mibi mu Karere kacu ka Huye, kuko ni ikigo twigiraho twese. Kuri ubu ni ikigo kirwana n’uko nta muntu mushya wakwinjira mu mirire mibi, kikavura abayigiyemo.”

Yavuze ko bamaze kubona umusaruro uri gutangwa na gahunda ya ‘Huye kundwa kibondo’ yatangijwe n’ikigo Nderabuzima cya Sovu, bahise bayijyana no mu bindi bigo nderabuzima byose mu Karere ka Huye.

Ati “Iriya gahunda twahise tuyijyana mu bigo nderabuzima byose ihita ikwira no mu gihugu hose. Twahise tuyishyira hose kuko ni gahunda nziza idufasha ko nta mwana n’umwe twagira uri mu mirire mibi mu Karere ka Huye buri wese ayishyize mu ngiro akayikora uko ikwiye gukorwa.”

Ababyeyi bagirwa inama ko umwana wese agomba kwitabwaho kuva nyina amutwite kugeza igihe akuriye. Umwana agomba konka kenshi mu mezi atandatu ya mbere nta kindi avangiwe.

Iyo afite amezi atandatu atangira guhabwa imfashabere. Ku munsi iyo ari hagati y’amezi atandatu n’umunani aba akwiye kugaburirwa kabiri cyangwa gatatu; ku mezi icyenda kugeza kuri 12 agaburirwa inshuro zigera kuri enye naho umwana w’amezi 12 kugeza kuri 23 agaburirwa inshuro zigera kuri eshanu.

Ahabwa indyo yuzuye igizwe n’ibirinda indwara, ibyubaka umubiri n’ibitera imbaraga kandi akonka bihagije. Ibyo bijyana n’uko na nyina umubyara yiyitaho cyangwa yitabwaho bihagije.

Uyu mubyeyi amaze amezi abiri mu Kigo Nderabuzima cya Sovu n'abana be bavurwa imirire mibi ariko bamaze koroherwa
Mu Kigo Nderabuzima cya Sovu haba uturima tw'igikoni duhingwamo imboga zigaburirwa abana n'ababyeyi barwaye imirire mibi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .