Hamuritswe ifu izazahura ibibazo by’imirire mibi ku bana bato n’abagore batwite

Yanditswe na Evariste Nsengimana
Kuya 3 Gashyantare 2017 saa 01:24
Yasuwe :
0 0

Nubwo hirya no hino hagaragara abana bafite ibibazo byo kugwingira n’ibindi biterwa n’imirire mibi, Guverinoma y’u Rwanda yashyizeho uburyo bwo guhangana nabyo binyuze mu kugenera abari munsi y’imyaka ibiri n’abagore batwite bose bo mu cyiciro cya mbere cy’ubudehe ifu y’igikoma, ibigori, soya n’ibindi.

Kuri uyu wa 2 Gashyantare 2017 nibwo uruganda Africa Improved Foods (AIF) rukora ifu y’imvange rwerekanye amoko atanu arimo aya Minisiteri y’Ubuzima, yitwa “Shisha Kibondo, iy’abagore n’iy’abana.”

Umuyobozi w’uru ruganda, Ishami rikorera mu Rwanda, Prosper Ndayiragije avuga ko ifu uruganda rukora yuzuyemo intungamubiri zizafasha abana mu mikurire by’umwihariko mu minsi 1000 ya mbere.

Ati “Twatangiye gukora ibiribwa byo guhangana n’imirire mibi cyane ku bagore batwite, abonsa n’abana. Ibi bizafasha kubona intungamubiri mu minsi 1000 ya mbere y’umwana.”

Muri ayo moko y’ifu uruganda rwakoze, bumwe ni Shisha Kibondo, ruri muri gahunda ya Minisante yo gufasha abana n’abagore batwite, Super rwakoreye Ishami rya Loni rishinzwe ibiribwa (PAM) n’iyitwa Nootri Mama na Nootri Toto zizashyirwa ku isoko zikagurwa na buri wese ku giciro kizumvikanwaho.

Umuvugizi wa Minisiteri y’Ubuzima, Malick Kayumba, yabwiye IGIHE ko iyo fu izahabwa abana bari munsi y’imyaka ibiri n’abagore batwite mu gushyigikira imikurire y’umwana mu minsi 1000 ya mbere no kurwanya imirire mibi.

Yagize ati “Impamvu izahabwa abana n’abagore batwite ni uko iminsi 1000 ya mbere y’umwana ariyo ngirakamaro mu kurinda umwana kugwingira. Bitangira umugore agitwara inda kugeza umwana afite imyaka ibiri.”

Yakomeje avuga ko bitewe n’uko nta bushobozi bwo guha buri mwana n’umugore batwite, abo mu cyiciro cya mbere bazayihabwa ku buntu naho abandi hari iyo bazashyirirwa ku isoko ku giciro gito ku buryo nabo bayigura.

Iyi fu izatangira guhabwa abo igenewe mu minsi iri imbere, biteganyijwe ko mu kwezi gutaha izatangira koherezwa mu mahanga.

Uru ruganda byitezwe ko ruzajya rutanga toni 45,000 z’ifu ku mwaka, mu rwego rwo kurwanya imirire mibi mu bakiri bato mu gihugu hose. Ibigera kuri 60 % by’ibizajya bisohorwa bizajya byoherezwa hanze y’igihugu, mu Karere ndetse no ku yandi masoko mpuzamahanga.

Mu 2013, nibwo u Rwanda rwatangije ku mugaragaro gahunda y’iminsi 1000 yo kurwanya imirire mibi mu bana, hagamijwe gusigasira ubuzima bakivuka kuko bigira uruhare mu mibereho myiza y’umwana, bigatuma akura, akiga, akanabaho neza.

Biteganyijwe ko ifu uru ruganda rukora izagera ku bantu miliyoni muri uyu mwaka, ndetse rukazaha akazi abagera kuri 300, rukanakorana n’abahinzi bagera ku 9000.

Imibare itangwa na Minisiteri y’Ubuzima yavuye mu cyegeranyo cy’ubwiyongere bw’abaturage n’Imibereho (Rwanda Demographic Health Survey 2010 ) igaragaza ko 38% by’abana bari munsi y’imyaka itanu bafite ibibazo byo kugwingira.

Umuyobozi wa Africa Improved Foods , Ishami ry'u Rwanda, Prosper Ndayiragije avuga ko ifu uruganda rukora yuzuyemo intungamubiri zizafasha abana mu mikurire
Imbere mu ruganda ahatunganyirizwa ifu
Uru ruganda ruteganya kuzajya rukora nibura toni ibihumbi 45 by'ifu ku mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza