00:00:00 IGIHE NETWORK KN KINYARWANDA EN ENGLISH FR FRANCAIS

Hagiye gutangira igerageza ku rukingo rushya rwa Ebola

Yanditswe na Uwiduhaye Theos
Kuya 11 Ugushyingo 2021 saa 03:11
Yasuwe :
0 0

Kaminuza ya Oxford yagize uruhare mu ikorwa ry’urukingo rwa COVID-19 rwa AstraZeneca, yakoze urushya rw’indwara ya Ebola rwatangiye kugeragezwa.

Uru rukingo rushya rwatangiye kugeragezwa mu bantu rwiswe ChAdOx1 biEBOV, rufite ikoranabuhanga rijya kumera nk’iryakoreshejwe ubwo hakorwaga urwa COVID-19 narwo itsinda ry’inzobere muri Oxford ryagize uruhare mu ikorwa ryarwo.

Igeregeza ry’uru rukingo biteganyijwe ko rizakorerwa ku bantu 26 b’abakorerabushake bari hagati y’imyaka 18 na 55 y’amavuko, kugira ngo hamenyekane ubuziranenge n’ubudahangarwa byarwo.

Ishami ry’Ubushakashatsi rya Kaminuza ya Oxford rya Jenner Institute, ryatangaje ko uru rukingo rwakozwe mu guhangana n’uturemangingo dutuma Ebola igira ubukana butera urupfu.

Jenner Institute iti “Turi gukora igerageza rijyanye n’ubuvuzi bw’urukingo rushya rwa Ebola rwiswe ‘’ChAdOx1 biEBOV’ rwakorewe guhangana n’uturemangingo twica twa Ebola dutera amavirusi yayo.”

Uru rukingo rushingiye ku ikoranabuhanga ry’urukingo rya ‘ChAdOx1’ ryifashishijwe mu gukora urwa Covid-19 rwa Oxford/AstraZeneca.

Abagiye gukorerwaho igerageza bazakurikiranwa mu gihe cy’amezi atandatu, ndetse ibisubizo bijyanye n’igerageza ryarwo bizaboneka mu mezi ane ya mbere y’umwaka utaha.

N’ubwo urukingo rwa rVSV-ZEBOV rwari rwaremewe nk’urwakwifashishwa mu guhangana na Ebola, iri tsinda ry’abashakashatsi ba Oxford ryavuze ko Isi ikeneye urundi rukingo rushya.

Repubulika Iharanira Demokarasi ya Congo [RDC] ikunze kuzahazwa na Ebola cyane, mu minsi yashize yongeye kugaragaramo iki cyorezo ndetse abantu umunani barayisanganywe. Batandatu bamaze guhitanwa nayo kuva mu Ukwakira uyu mwaka.

Hagiye gutangira gukorwa igerageza ku rukingo rushya rwa Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .