00:00:00 IGIHE NETWORK KN KINYARWANDA EN ENGLISH FR FRANCAIS

Gukingira COVID-19 muri Kigali byegereye 100%

Yanditswe na Dufitumukiza Salathiel
Kuya 25 Nzeri 2021 saa 02:40
Yasuwe :
0 0

Minisiteri y’Ubuzima yatangaje ko 90% by’abatuye mu Mujyi wa Kigali barengeje imyaka 18 bamaze guhabwa urukingo rwa COVID-19.

Muri rusange u Rwanda rumaze guha doze ya mbere abarenga miliyoni ebyiri, na ho abakingiwe byuzuye barakababaka miliyoni 1,5.

Umuyobozi Mukuru w’Ikigo cy’Igihugu gishinzwe Ubuzima (RDC), Dr Nsanzimana Sabin, yabwiye Radio Rwanda ko iyo ari intambwe nziza igihugu kimaze kugeraho ariko “ni bwo akazi gatangiye”.

Ati “Twihaye intego yo gukingira nibura miliyoni 7,8 bitarenze 2022 ariko siho tuzahagarukira dukingira. Uyu mubare urasa nk’aho ufatika ariko abo gukingira baracyari miliyoni nyinshi. Twavuga ko ari intangiriro nziza ziduha imbaraga zo gukomeza.”

Dr Nsanzimana yavuze ko izo miliyoni 7,8 zifuzwa gukingirwa zingana na 60% by’Abaturarwanda bagejeje ku myaka isabwa, ubu abahawe doze ya mbere mu gihugu cyose bakaba bageze kuri 25% naho 18% bakaba bamaze gukingirwa byuzuye.

Yakomeje agira ati “Bigenda bitandukana agace ku kandi kuko nko mu Mujyi wa Kigali abamaze gukingirwa byuzuye bararenga 75% mu barengeje imyaka 18, naho ababonye nibura doze imwe bararenga 90%.”

Inama y’Abaminisitiri iheruka yoroheje ingamba n’amabwiriza byo kwirinda COVID-19 maze utubari twemererwa bwa mbere kongera gufungura imiryango nyuma y’amezi 18.

Ni umwanzuro washingiye ku kuba abakingiwe bamaze kuba benshi n’imibare y’abandura ikagabanuka cyane ko muri Kigali hakundaga kwibasirwa abenshi mu bahatuye bamaze guhabwa urukingo.

Dr Nsanzimana yavuze ko nyuma ya Kigali ubu ingufu zishyizwe cyane mu ntara kugira ngo hakomeze kuzamurwa imibare y’abakingiwe bityo intego izagerweho. Hari kwibandwa ku bice byugarijwe kurusha ibindi.

Ati “Mu mujyi wa Kigali uretse abantu bake bagiye bacikanwa ari nabo twari turi guha ayo mahirwe kugira ngo nabo babone urukingo, ubundi inkingo ziri kwinjira mu gihugu zose zirashyirwa cyane cyane mu turere twari tutarazamura imibare, aho ubwandu bwa COVID-19 buri hejuru.”

Yasabye abatuye mu turere kwitabira icyo gikorwa, yemeza ko bizagenda bimanuka ku myaka mike mu byiciro kugeza igihe uturere twose tuzaba turi ku rwego rumwe.
Dr Nsanzimana yavuze kandi ko nta kwirara gukwiye kubaho kuko urukingo rwonyine rudahagije mu kwirinda COVID-19.

Ati “Ntitwirare kuko ibikorwa twabonaga bishobora kunyuramo ubwo burwayi bigenda bifungurwa. N’iyo waba warikingije ugire ayo makenga kugira ngo tutongera gusubira inyuma.[…] Ni ukuba maso twarabibonye ko akenshi iyo COVID-19 iduciye mu rihumye [bigenda nabi].Ni ukuguma twitwararitse nubwo uru rukingo ruri kudufasha.”

Kugeza ku wa 20 Nzeri 2021, u Rwanda rwari rumaze kwesa umuhigo washyizweho n’Ishami ry’Umuryango w’Abibumbye ryita ku Buzima (OMS) wo kugera muri Nzeri 2021 nibura buri gihugu kimaze gukingira 10% by’abaturage bacyo. Rwari rumaze gukingira miliyoni 1,3 muri 13 zirutuye.

Mu batuye i Kigali bagejeje ku myaka yo gukingirwa COVID-19, 90% bamaze kubona urukingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .