Gatagara: Abajyanama b’ubuzima bahawe ubumenyi bwo kwita ku bafite ubumuga

Yanditswe na Kanamugire Emmanuel
Kuya 14 Nzeri 2016 saa 03:19
Yasuwe : XX
0

Nyuma yo kubona ko abajyanama b’ubuzima hirya no hino mu gihugu bita ku barwaye indwara zisanzwe ariko bagasa n’abirengagiza abafite ubumuga, ikigo cya Gatagara cyabageneye amahugurwa azabafasha muri uru rwego.

Ubusanzwe ikigo HVP Gataragara (Home de la Vierge des Pauvres) gitanga serivisi zitandukanye ku bafite ubumuga zirimo ubuvuzi, uburezi, kubakorera inyunganirangingo ndetse no kubagira inama z’ubuzima.

Umukozi ushinzwe ireme ry’ibikorwa n’amahugurwa muri HVP Gatagara, Gaspard Mbonigaba, avuga ko nubwo bafite umwihariko wo kwita ku bafite ubumuga basanze hakiri icyuho cy’uko abana bavukana ubumuga batitabwaho ngo bavuzwe hakiri kare, bityo biyemeza guhugura abajyanama b’ubuzima n’abayobozi ku nzego z’ibanze ngo bafatanye gushaka umuti w’icyo kibazo.

Mbonigaba avuga ko abajyanama b’ubuzima n’abayobozi ku nzego z’ibanze bagera ku 100 baturutse mu murenge wa Mukingo ari bo bahuguwe ariko ari igikorwa kizakomereza n’ahandi.

Ati “Intego nyamukuru y’amahugurwa ni ukugira ngo abajyanama b’ubuzima n’abayobozi ku nzego z’ibanze badufashe kwita ku bafite ubumuga, niba babonye umwana wavukanye ubumuga badufashe kumuzana kwivuza hakiri kare kuko byagaragaye ko bene abo bana babazana kubavuza bakuze ugasanga batakaje amahirwe yo gukira ubwo bumuga burundu”.

Bamwe mu bajyanama b’ubuzima bahuguwe bavuga ko bari basanzwe bita ku bagore batwite ndetse n’abana bato bavutse ndetse no kuvura Malariya bakumva ko kwita ku bafite ubumuga bitabareba.

Nyuma yo kongererwa ubumenyi no gusabwa umusanzu wabo, aba bajyanama b’ubuzima bemeza ko bagiye gutanga umusanzu wabo mu gukurikirana abafite ubumuga by’umwihariko abana bato.

Rebecca Mukamurezi ati “Kwita ku bafite ubumuga ni ibintu tutinjiragamo cyane, kereka wenda igihe twabonaga umuntu arwaye ni bwo twinjiraga mu byo kumujyana kwa muganga. Ubu rero ubwo tumenye ko hano bitabwaho by’umwihariko, tugiye kujya dushishikariza ababyeyi bafite abana bafite ubumuga kubavuza hakiri kare”.

Christine Muhawenase na we avuga ko yumvaga icyo ashinzwe ari ubuzima bw’umubyeyi n’umwana gusa, ariko ngo agiye kongeraho no kwita ku bafite ubumuga abafasha kugana ivuriro by’umwihariko ikigo cya Gatagara.

Dr. Marcel Ntagengwa ukora muri serivisi zo kubaga mu kigo cya HVP Gatagara akaba n’umwe mu batanze amahugurwa,yavuze ko umwana wavukanye ubumuga iyo avujwe hakiri kare ashobora gukira burundu.

Yemeza kandi ko umuntu ufite ubumuga uwo ari we wese iyo adahawe ubuvuzi hakiri kare ashobora guhura n’izindi ngaruka azahazwa na bwo.

Ubuyobozi bwa HVP Gatagara buvuga ko kugeza ubu muri serivisi batanga ku bafite ubumuga hakirimo imbogamizi yuko bataremererwa gukorana na Mituweri, bikaba bituma abaza babagana batishoboye bitaborohera kwivuza.

Ikigo HVP Gatagara cyubatswe na Padiri Joseph Julien Adrien Fraipont Ndagijimana, mu mwaka wa 1960, ku gasozi kitiriwe Amizero, aho cyaranzwe no kwita ku buzima bw’abafite ubumuga.

Abajyanama b'ubuzima bavuga ko bari bazi ko kwita ku bafite ubumuga bitabareba
Abajyanama b'ubuzima biyemeje gutanga umusanzu wabo mu kwita ku bafite ubumuga
Dr Marcel Ntagengwa ukora muri serivisi zo kubaga mu kigo cya HVP Gatagara

prudence@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza