Kwamamaza

Ese koko abagore batwite bahurwa abagabo babo?

Yanditswe kuya 14-11-2016 saa 04:46' na Emma-Marie Umurerwa


Ibiribwa byiganjemo isukari, ibirimo umunyu cyangwa ibiryoha nkawo, ni bimwe mu byo abagore basamye bakunze guhurwa, byiyongera no ku mibonano mpuzabitsina kuri bamwe ku buryo abagabo babo babegera bakagira iseseme.

Hari abagore baganiriye na IGIHE, bemera ko bijya bibabaho ko bahurwa imibonano mpuzabitsina. Umwe muri bo yagize ati “Njye iyo ntwite mpurwa umugabo, mba numva ntamushaka rwose (ntaba ashaka gukora imibonano mpuzabitsina) ndetse n’icyuya cye mba numva kinukira ku buryo mpita mokorwa.”

‘Guhurwa cyangwa kudahurwa ni amarangamutima y’umugore ubana n’umugabo’

Uwamaliya Grace agira ati “Umusore twiganaga yanteye inda, ndayihisha ntihagira urabukwa kugeza mbyaye, sinigeze mpurwa na gato ahubwo nakoreshaga imbaraga zidasanzwe kugira ngo hatagira ubona impinduka mu mirire yanjye ndetse no mu myifatire.”

Akomeza avuga ko aho amariye gushaka umugabo, ari bwo yatangiye kujya ahurwa igihe atwite. Ati “Igihe cyarageze nza gushaka umugabo, inda ya mbere yanteye natangiye kuruka no guhurwa ibiryo bimwe na bimwe. Nahamya ko guhurwa bijyana n’amarangamutima y’umuntu ndetse n’ubuzima abayemo.”

Kanakuze Diane we ahamya ko guhurwa k’umugore biterwa n’uko abanye n’umugabo. Ati “Inda ya mbere nari mbanye neza n’umugabo, nahuzwe ibintu byose kugeza no ku mazi yo kunywa, numvaga nshaka amazi ya Nil gusa, nkarya inyama z’inkoko zitogosheje, nkarya imbuto z’imizabibu, ubundi nkumva icyuya cy’umugabo kiranukira.”

Akomeza avuga ko no ku nda ya kabiri ari uko byamugendekeye, ariko ku nda ya gatatu ngo byarahindutse. Ati “Inda ya gatatu nari mfitanye ibibazo bikomeye n’umugabo sinigeze mpurwa, ibintu byose narabiryaga nta na kimwe nasubizaga inyuma. Navuga rero ko guhurwa cyangwa kudahurwa biterwa n’uko umugore abanye n’umugabo.”

‘Guhurwa ni uburwayi nk’ubundi’

Musabyimana Rose ni umugore utemeranya nibyo bagenzi be bavuga, agasanga nta wakwanga ibiryo ngo ni uko atwite. Ati “Abavuga ko ari ukwigiza nkana ntibarahurwa ngo bumve uko bimera. Icyo nakubwira ni uko ari uburwayi nk’ubundi.”

Muganga ati ’guhurwa si ko bose bibabaho

Dr Stephen Rulisa, umuganga w’inzobere mu kuvura abagore (gynécologue), yatangarije IGIHE ko impinduka ziba ku mugore utwite zo guhurwa no kurarikira ibintu bitandukanye biterwa n’uko imisemburo y’umuntu imeze.

Ati “Impinduka ziterwa n’imisemburo (hormone); ariko na none si zimwe ku bagore bose kimwe n’uko atari ihame ko abagore bose batwite bahurwa. Ikindi kandi niba umugore yarahuzwe ku nda ya mbere, ntibivuze ko no ku nda ya kabiri azahurwa. Umukobwa utwaye inda atabana n’umugabo nawe agira ziriya mpinduka ahubwo ni uko agerageza kuzihisha.”

Dr Rulisa yakomeje avuga ko impinduka ziba mu mubiri w’umugore utwite ari nk’iziba ku bagore bakoresha imiti mu kuboneza urubyaro, aho umwe ashobora kubyibuha, undi akananuka cyangwa se umwe akabura imihango undi akagira imihango ihoraho.

N’ubwo hari ibyo abagore batwite bahurwa, hari n’abagira ibyo bararikira cyane kurusha ibindi, bamara kubyara bagasubira kubaho uko byari bisanzwe.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved