EALA izaganirira i Kigali ku mushinga w’itegeko rirengera abagore ku buzima bw’imyororokere

Yanditswe na IGIHE
Kuya 27 Gashyantare 2017 saa 08:27
Yasuwe :
0 0

Inteko Ishinga Amategeko y’Umuryango wa Afurika y’Iburasirazuba, EALA, yiteguye kuganira ku mushinga w’itegeko witezweho kugabanya byihuse umubare w’abagore bapfa babyara, kugeza serivisi zo kuboneza urubyaro kuri bose n’ibindi.

Mu cyumweru gishize nibwo abadepite muri EALA bari i Kigali mu biganiro nyunguranabitekerezo ku mushinga w’itegeko rirebana n’ubuzima bw’imyororokere, uzamurikirwa inteko rusange izateranira i Kigali mu kwezi gutaha ngo iwuganireho.

Ni ibiganiro byitabiriwe na Minisiteri y’Ubutabera, Minisiteri y’Uburinganire n’Iterambere ry’Umuryango, Polisi y’u Rwanda n’Umuryango uteza imbere ubuzima, HDI, hatangwa ibitekerezo ku ngingo ijyanye no gukuramo inda n’ubu igikomeje guteza impaka muri benshi.

Nkuko The New Times yabyanditse, uyu mushinga w’itegeko ugamije guteza imbere ubuzima bw’abagore no kurengera ababyeyi mu karere ukaba unateganya uburenganzira bw’ingimbi n’abangavu ku buzima bw’imyororokere.

Ingingo yawo ya 15 igira iti “Ibihugu binyamuryango bigomba guharanira uburenganzira bw’umugore ku buzima bw’imyororokere, akemererwa kutabyara mu gihe umukozi wo mu rwego rw’ubuzima ubifitiye ubushobozi yagaragaje ko bishobora kugira ingaruka mbi ku buzima bwe.”

Ku ruhande rw’ishyirahamwe mpuzamahanga ry’ababyeyi, IPPF, ritanga serivisi z’ubuzima bw’imyororokere no kuboneza urubyaro, rigaragaza ko izi ngamba zo kurengera abagore n’abangavu ari ingenzi kugira ngo bagire ubwigenge ku burenganzira bwabo bw’ibanze bwo kumenyeshwa no gufata imyanzuro ku bijyanye n’ubuzima bw’imyororokere nta busumbane, kudahohoterwa kandi byose bikajyana n’amasezerano mpuzamahanga atandukanye.

Bibiane Mbaye Gahamanyi, Umujyanama muri IPPF-Africa, yagize ati “Dukeneye guhuza intego z’umushinga w’itegeko n’ubuzima kugira ngo twizere ko hari uburyo buboneye bwo gukora ubugenzuzi bwawo. Tugomba kugira ibipimo mu karere ku bijyanye n’ubuzima bw’imyororokere.”

Yakomeje agira ati “Turifuza kandi ko serivisi z’ubuzima bw’imyororokere zishorwamo imari na leta kugira ngo tugabanye inzitizi abantu ku giti cyabo bahura nazo biyishyurira izo serivisi.”

Uwo muryango wasabye ibihugu bigize EAC kuzirikana akamaro k’ubuzima bw’imyororokere kuri bose, hakitabwa ku masezerano mpuzamahanga nk’aya Maputo.

Ayo masezerano yo mu 2003 aha uburenganzira bwuzuye abagore burimo ubwo kugira uruhare mu bikorwa bya politiki, uburinganire n’abagabo, kugira ubwigenge mu bijyanye no gufata ibyemezo ku buzima bw’imyororokere no guca burundu gukata bimwe mu bice byo ku myanya myibarukiro y’abagore.

Ku iyi ngingo ngo hakitabwa ku kugera kuri serivisi zo kuboneza urubyaro, kurandura ihohoterwa ririmo gushyingira abana bakiri bato, koroshya uburyo bwo gukuramo inda bwizewe no gukuraho inzitizi zituma hakomeza kubaho impfu z’ababyeyi mu karere.

Umuyobozi wa HDI-Rwanda, Jean d’Amour Mutoni, yavuze ko aho kugira ngo umushinga w’itegeko utange urubuga rwo gukuramo inda, wagakwiye no kwita ku ngingo zirimo kwemererwa kuyikuramo wafashwe ku ngufu, wayitewe n’uwo mufitanye isano cyangwa habayeho gushyingirwa ku ngufu nkuko mu Rwanda bimeze.

Yagize ati “Ndumva mwatekereza ku kongeramo ibindi bintu by’ingenzi, mugerageze gutekereza ku nzira yo kubikora kuko mu Rwanda hari ibintu bine bikenerwa, birimo n’icyemezo cy’urukiko.”

Depite Ndahiro James yavuze ko nubwo hatakirengagizwa ko hari igihugu cyaba kibikora neza mu karere, bikwiye ko hatagenderwa ku mategeko cyangwa amabwiriza yacyo cyane cyane ku kibazo nk’icyo gukuramo inda.

Yagize ati “Ibihugu binyamuryango biri ku rwego rutandukanye rwo kubishyira mu bikorwa cyangwa bikoresha uburyo butandukanye, gusa dushobora gutekereza ku hantu bakora neza, aho ibindi bihugu bibireberaho.”

Abadepite ba EALA bazakora raporo yihariye ya buri gihugu ku bijyanye n’uyu mushinga w’itegeko bagaragaze aho buri gihugu gihagaze kuri wo.

Abadepite ba EALA barakusanya ibitekerezo mu bafatanyabikorwa bose bo mu bihugu binyamuryango kugira ngo buzuze uwo mushinga w’itegeko mbere yo kuwumurikira inteko rusange ya EALA izateranira i Kigali mu kwezi gutaha ngo iwuganireho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza