Bwa mbere mu Rwanda abana bavutse bamaze amezi atanu basamwe, bitabwaho babaho

Yanditswe na Evariste Nsengimana
Kuya 18 Ugushyingo 2019 saa 09:00
Yasuwe :
0 0

Ibyishimo ni byose kuri Umutoni Peace na Ntaganira Felix, ababyeyi bo mu Murenge wa Kinyinya mu Karere ka Gasobo, baheruka kubyara impanga zitujuje amezi icyenda ubusanzwe umubyeyi amara atwite ariko zikitabwaho n’abaganga bo mu Rwanda ubu zikaba zimeze neza nta kibazo.

Ntabwo ari bishya ko abana bavuka batujuje amezi icyenda bakitabwaho bakabaho ariko ni ku nshuro ya mbere abaganga n’ibitaro byo mu Rwanda babashije gufasha abana bavutse bamaze amezi macye, nk’impanga z’aba babyeyi zavutse zimaze ibyumweru 24 gusa zisamwe.

Ubusanzwe abana barenga 70% bavutse bamaze hejuru y’ibyumweru 28 nibo babaho ariko ku bari munsi yabyo nk’aho bavukiye ibyumweru 24 bigoye ko babaho.

Ku wa 24 Nyakanga 2019 nibwo Umutoni yabyaye umuhungu n’umukobwa, umwe umwe afite amagarama asaga 600 bitewe n’indwara y’umuvuduko w’amaraso, bahabwa ubufasha burimo kubashyira mu byuma byabugenwe mu bitaro byitiriwe Umwami Faisal.

Ni ukuvuga ko hashize amezi atatu izi mpanga zivutse, aho ababyeyi bazo n’abaganga bazitayeho bavuga ko nta kibazo na kimwe zifite mu gihe abana bavutse babura igihe kinini baba bafite ibyago byinshi byo gupfa. Umuhungu yujuje ibiro 2.90 naho umukobwa 1.5.

Umutoni yagize ati “Nabyariye hano mu bitaro bya Faisal umwana w’amezi atanu. Mu by’ukuri ntabwo byari byoroshye ariko icyo nshima Imana yabanye natwe, ikoresha abaganga umunsi ku wundi, ndabashima cyane ko bakoze ibishoboka byose bita kuri aba bana. Baronka neza, baranywa, bameze neza nta kibazo.”

Yakomeje agira ati “Ntabwo nari nzi ko ibyo bibaho, byambereye nk’igitangaza kuko nkibabyara numvaga kubaho kwabo bidashoboka kuko nari nzi ko abana b’ibyumweru 24 batabaho ariko ubu ndashima Imana ko mbakikiye.”

Umufasha wa Umutoni, Ntaganira yavuze ko igikorwa abo baganga bakoze agifata nk’igitangaza. Ati “Nkurikije uko nabyumvaga mbere, ntabwo amahirwe yo kubaho kwabo yashobokaga ariko kugeza ubu nemeye ko bishoboka kuko mbareba.”

Ntaganira yavuze ko ibyo bigaragaza intambwe idasanzwe urwego rw’ubuvuzi mu Rwanda rumaze gutera.

Biterwa n’iki kugira ngo umwana avuke igihe kitageze?

Abahanga mu by’ubuzima bwa muntu n’ubushakashatsi bemeza ko umuntu abyarira amezi icyenda ariko ko ashobora no kubyara atarayuzuza bitewe n’impamvu zitandukanye.

Umuganga w’abana akaba n’inzobere mu kwita ku bana bavutse igihe kitageze ku bitaro bya Faisal, Dr Nkuranga John Baptiste, yavuze ko impamvu zikunze gutuma umubyeyi abyara umwana mbere y’amezi icyenda harimo imiterere y’umubiri we.

Ati “Kubera imiterere y’umubiri, nk’abakunda kugira umuvuduko w’amaraso ukagira aho uhurira n’imiterere y’inda ahanini usanga uzanwa no gutwita, iyo uri ku kigero kidashobora kugenzurwa, bikaba ngombwa ko umwana avuka kugira ngo haramirwe ubuzima bw’uwo mwana n’umubyeyi.”

Uretse umuvuduko w’amaraso hari kandi indwara zirimo nka Malaria, indwara zifata mu myanya y’imyororokere, imirire mibi, imiterere y’inda ibyara y’umubyeyi n’ibindi.

Bigenda bite iyo umwana avutse atujuje igihe?

Dr Nkuranga avuga ko by’umwihariko mu bitaro byitiriwe Umwami Faisal, iyo umwana avutse atarageza igihe, ahabwa ubufasha akeneye kugira ngo abashe kubaho nk’uko yabagaho mu mubiri kuko ibice by’umubiri we biba bitarakomera kuko bishobora guhita byangirika.

Ubwo bufasha burimo imiti imufasha n’imashini zishobora kumufasha kubaho nk’uko yakabayeho ari mu nda ya nyina kandi ibitaro bifite abakozi babifitiye ubushobozi kandi badahindagurika.

Ati “Nkatwe turishimira ko twabashije kwita ku mwana wavukiye amezi atanu ariko mu bindi bihugu bigera kuri ane ariko bijyana n’aho igihugu kigeze mu iterambere ry’ubuvuzi. Amezi atanu ni nk’ifatizo ariko ugasanga ababaho ni bacye.”

Yakomeke agira ati “Aba ni abana bavuka ingingo zabo guhera ku bwonko kugeza ku ino zitarakomera. Bifata rero akazi gakomeye kugira ngo zisange mu buzima busanzwe.”

Umwana wavutse igihe kitageze bisaba ko yitabwaho n’umuforomo umwe kandi umunsi wose kugira ngo akomeze gukura neza nk’uko yaba ari mu nda ya nyina.

Ibitaro bya Faisal bigaragaza ko kwita kuri uwo mwana bihenda cyane ku buryo impuzandengo igaragaza ko nibura umwana atangwaho amadolari 100$ ku munsi [arenga ihumbi 90 Frw’].

Dr Nkuranga yavuze ko muri izo mpanga zavutse zitujuje igihe, umwana umwe we yageze ku rwego ashobora kurererwa hanze ntagire icyo aba, umwe ariwe ukomeje kwitabwaho kandi nawe nta kibazo afite. Ubu ari kwigishwa konka adakoresheje agapira kabugenewe.

Umuyobozi w’agateganyo w’ibitaro bya Faisal, Dr Kalimba Edgar, yavuze ko amahirwe yo kubaho ku mwana wavutse atagejeje igihe ajyana n’igihe yavukiye.

Ati “Abana bavutse bamaze amezi arindwi, hafi ya bose babaho kuko ibibazo bagira biba ari bike ariko uko ugenda umanuka ku byumweru 28 kumanuka niko amahirwe yo kubaho agabanuka kuko urumva nta bushobozi bwo guhumeka, bagira ibibazo byo kuva mu bwonko, amara yabo agenda atoboka.”

Mu myaka 15 ishize ibitaro bya Faisal bitanga ubuvuzi ku bana bavutse igihe kitageze, mu barenga 2000 byakiriye bafite ibibazo nyuma yo kuvuka, 70% bari abavutse igihe kitageze aho abarenga 90% bakira bagataha. Buri kwezi mu Rwanda abana hafi 3000 bavuka batagejeje igihe. Muri abo, 20/1000 ntibabasha kubaho.

Igenzura ryakozwe ku rwego rw’ubuzima bw’abaturage mu Rwanda mu 2015 (DHS), ryerekanye ko abana bapfa bataruzuza umwaka bavuye kuri 86/1000 mu 2005 bagera kuri 50/1000 mu 2010 naho mu 2015 bari 32/1000.

Uyu muryango uvuga ko utiyumvishaga ko abana bavukiye amezi atanu babasha kubaho
Dr Nkuranga John Baptiste yavuze ko impamvu zikunze gutuma umubyeyi abyara umwana mbere y’amezi icyenda harimo imiterere y’umubiri we
Umwe mu baganga arimo kwita ku bana bavutse igihe kitageze
Umwe mu baganga arimo kwita ku bana bavutse igihe kitageze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza