Butaro: Imiryango 60 yananiwe n’ubuzima muri Uganda niyo igaragaza ibibazo by’imirire mibi

Yanditswe na Evariste Nsengimana
Kuya 18 Werurwe 2017 saa 07:18
Yasuwe :
0 0

Imiryango isaga 60 yo murenge wa Butaro mu Karere ka Burera yagiye kuba muri Uganda ikaza gutahuka nyuma yo kubura ubushobozi bwo kwitunga no gutegurira indyo yuzuye abana babo n’iyo igaragaza ibibazo by’imirire mibi muri aka gace.

Iyi mibare yashyizwe hanze n’Umuyobozi ushinzwe imibereho myiza y’abaturage mu murenge wa Butaro, Ndayambaje Léonard, kuri uyu wa Gatanu ubwo bari mu bikorwa byahariwe icyumweru cy’ubuzima aho abaturage baho bapimwe indwara zitandura, bakangurirwa kurwanya imirire mibi n’ibindi.

Ndayambaje yabwiye IGIHE ko mu mibare yabaruwe kugeza muri Gashyantare 2017, igaragaza ko imiryango 60 yavuye Uganda ariyo iza imbere mu kugaragaza imirire mibi.

Yagize ati “Hano abaturage bakunda kujya Uganda bagiye gushaka ubuzima. Iyo urebye nka raporo twari dufite kuva mu ntangiriro za 2016 kugeza muri Gashyantare, twari dufite imiryango 60. Baba bavuga ko bagiye gushakayo imibereho. Iyo urebye, ibiryo birahari (Uganda) ariko serivisi z’ubuzima ni nke, abantu bakibyarira n’indwara zituruka ku mirire mibi zikabibasira.”

Yakomeje avuga ko hari gukorwa ubukangurambaga ku baturage babasobanurira ko kugira ubutunzi ntaho bihuriye no kugira isambu ngari nk’iyo baba bagiye gushaka, ahubwo ko bakwiye gukora Leta ikabafasha mu gihe bigaragara ko byanze nkuko abari mu cyiciro cya mbere n’icya kabiri basanzwe bagenerwa inkunga.

Ndayambaje avuga ko abantu baturiye Uganda basanzwe bifitemo imyumvire yo kujya muri iki gihugu gushakayo ubuzima ariko bagerayo bakabaho ubuzima bukarishye.

Ndamukunda Gervais utuye muri uyu murenge yemeza ko hari imiryango yavuye Uganda yiganjemo abagiye ari abakobwa bakagaruka bafite abana, ibayeho nabi.

Yagize ati “Ibyo nibyo barahari. Abenshi iyo bagiye bagaruka bafite abana bikabagora. Twumva ko baba bananiwe n’ubuzima bwaho bagaruka na hano kuko nta kintu baba bazanye bikabavuna cyane. Muri make babaho nabi bikanagera no ku bana babo.”

Muri uyu murenge wa Butaro uherereye ku mupaka w’u Rwanda na Uganda, ubuyobozi bwaho bwafashe ingamba zitandukanye zo kuzamura imirire zirimo ubukangurambaga n’inkono y’umwana, gahunda yo gufasha umubyeyi gutegurira umwana we indyo yuzuye.

Nubwo bimeze gutya ariko hari intambwe yatewe mu kurwanya imirire mibi muri uyu murenge kuko mu bana batandatu aribo bari gukurikiranwa n’abaganga ku kigo nderabuzima cyaho mu gihe mu 2012 hakurikiranwaga 24.

Umuyobozi ushinzwe imibereho myiza y’abaturage mu murenge wa Butaro, Ndayambaje Léonard aganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza