Burera: Hatangiye kubakwa kaminuza y’ubuvuzi izatwara asaga miliyoni 150$

Yanditswe na Uwishyaka Jean Louis
Kuya 7 Nzeri 2016 saa 01:15
Yasuwe : XX
0

Guverineri w’Intara y’Amajyaruguru, Bosenibamwe Aimé yavuze ko ibikorwa byo kubaka kaminuza mpuzamahanga y’Ubuvuzi (University of Global Health Equity,UGHE) byatangiye mu karere ka Burera.

Ibi yabivugiye mu mu muhango wo kwita izina abana 22 b’ingagi, wabaye ku itariki 2 Nzeri 2016 mu Karere ka Musanze.

Guverineri Bosenibamwe yagaragaje ko ibyo Perezida wa Repubulika Paul Kagame yijeje abaturage bikomeje gushyirwa mu bikorwa.

Yagize ati “ Kaminuza Perezida wa Repubulika yemereye abaturage yatangiye kubakwa mu Murenge wa Butaro, mu Karere ka Burera.”

Guverineri Bosenibamwe Aimé yongeyeho ko ibikorwa byo kwagura ibitaro bya Ruhengeri kugira ngo bibe ibitaro by’icyitegererezo byoherezwaho abarwayi na byo bikomeje kugenda neza, ndetse ngo bikaba byaratangiye gutanga serivisi z’indashyikirwa.

Iyi kaminuza iri kubakwa ku bufatanye na Leta y’u Rwanda, Kaminuza y’iby’ubuvuzi ya Havard yo muri Leta Zunze Ubumwe za Amerika ndetse n’Ishami rya Loni ryita ku buzima, OMS.

Ibikorwa byo gutegura ikibanza kizubakwaho byaratangiye bikazamara amezi ane, na ho umushinga wose wo kubaka iyi kaminuza ukazarangira mu myaka ibiri iri imbere, ukazatwara miliyoni 150 z’amadolari ya Amerika.

Biteganyijwe ko uyu mushinga uzubakwa mu bice bitatu kuri Hegitari 100, aho igice cya mbere cy’iyi nyubako kizubakwa ku buso bwa hegitari 35, hakazubakwaho ibiro by’ishuri, inyubako zo kwigiramo, inzu zo kuraramo ndetse n’ibindi byinshi.

Ibikorwa byo kubaka igice cya mbere byatumye himurwa imiryango 99, yishuwe amafaranga y’u Rwanda angana na Miliyari 1.3.

Igice cya kabiri kizaba kigizwe n’andi mazu, kizubakwa kuri hegitari 35, biteganyijwe ko abahatuye bazimurwa bishyuwe miliyari 1.5 z’amafaranga y’u Rwanda, mu gihe igice cya gatatu ari na cyo cya nyuma kizubakwa ku buso bwa hegitari 30.

Umuyobozi w’akarere ka Burera, Florence Uwambajemariya yabwiye Rwanda Focus ko abaturage bazimurwa mu cyiciro cya gatatu cy’uyu mushinga, bazafashwa mu kwigishwa uburyo amafaranga bazahabwa bayabyaza umusaruro.

Ni mu gihe kandi abaturage batangiye gushishikarizwa kwibumbira mu makoperative, no gutangira imishinga imwe n’imwe nko kubaka amazu akodeshwa, ndetse n’aho gucururiza ibiribwa n’ibindi bizakenerwa n’abanyeshuri ndetse n’abayobozi babo bazaza kwiga muri iryo shuri.

Intara y’amajyaruguru kandi ni yo ifite ibitaro bya Butaro byihariye mu kuvura indwara ya kanseri mu Rwanda hose.

Guverineri w'Intara y'Amajyaruguru, Bosenibamwe Aimé

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza