Bugesera: Abaturage basobanuriwe iby’indwara yo kuvura kw’amaraso bitiranyaga n’amarozi

Yanditswe na Jean Pierre Tuyisenge
Kuya 1 Mata 2018 saa 07:04
Yasuwe :
3 2

Abaturage bo mu Karere ka Bugesera, batangaje ko basobanukiwe ibijyanye n’indwara yo kuvura kw’amaraso gukabije izwi nka ‘Thrombosis’, bajyaga barwara bakayitiranya n’amarozi.

Abahanga mu by’ubuzima bavuga ko ubusanzwe kuvura kw’amaraso biba ikibazo iyo byabayeho mu buryo bukabije kuko bishobora kugira ingaruka mu mubiri zirimo no gutakaza ubuzima.

Ni indwara ivugwaho kwica abantu batayizi kuko ifata umuntu agatangira yumva igice kimwe cy’umubiri kimurya, agatangira gukorora ku buryo iyo atinze kubona ubuvuzi ashobora guhera umwuka.

Ibyo biterwa no kuba amaraso agera hagati mu mutsi agahinduka ikibumbe, bigatuma adatembera uko bikwiye.

Kuri uyu wa 31 Werurwe 2018, Ihuriro ry’abigeze kurwara iyo ndwara bakayikira, ‘Rwanda Clot Awareness Network’, ryasanze abaturage bo mu Karere ka Bugesera mu muganda kugira ngo babasobanurire uko iyo ndwara ifata, ibimenyetso byayo n’uko ivurwa.

Bamwe mu baturage bavuze ko batari bayizi ko hari ubwo yabafataga ndetse hakaba abo yica bayitiranya n’amarozi.

Bimenyimana Alexandre utuye mu Murenge wa Nyamata mu Karere ka Bugesera, yavuze ko kuri we ari bwo bwa mbere yumvise iyo ndwara ahamya ko akurikije ibimenyetso byayo yajyaga ayitiranya n’amarozi.

Yagize ati “ Mvugishije ukuri ni ubwa mbere nyumvise, kuko kuvura kw’amaraso ntabyo nari nzi, sinarinzi uko ifata n’uko tugize Imana bakabidusobanurira, si njye gusa kuko hari abakekaga ko hari ibintu babateze bigatuma banga kujya kwa muganga.”

Furaha Jeanne we yarayirwaye abanza kwanga kujya kwa muganga akeka ko bamuroze gusa nyuma ngo yaje kugerayo bamubwira ko ariyo arwaye, anywa imiti arakira.

Umuyobozi Mukuru wa Rwanda Clot Awareness Network, Christine Ashimwe, yavuze ko nyuma y’uko ayirwaye akayikira, yiyemeje ko hamwe n’abandi bayikize nkawe ko bazajya bayimenyekanisha kugira ngo abantu bayimenye kandi bayirinde.

Yagize ati “ Iyi ndwara ifata abantu batandukanye ntabwo igira abantu runaka yiharira ngo abantu ibareke, twasanze rero guhura n’Abanyarwanda batandukanye ingeri zose bifasha mu gukora ubukangurambaga, aho tugiye tujyana n’umuganga w’inzobere agasobanurira abantu uko ifata, ibimenyetso byayo n’uko ivurwa abantu bakarushaho kuyirinda.”

Nubwo iyo ndwara ishobora gufata abantu bose ngo by’umwihariko yibasira abageze mu zabukuru n’abagore batwite.

Umuganga w’inzobere ku ndwara z’abagore mu Bitaro bya Kaminuza bya Kigali (CHUK), Dr Kenneth Ruzindana, yavuze ko nubwo iyo ndwara isa n’ihangayikishije, ngo ishobora kuvurwa igakira mu gihe uwo yafashe yaba ayivuje hakiri kare.

Yagize ati “ Iyi ni indwara mbi cyane kuko irica, hafi 40% by’abayirwara irabahitana iyo batabonye ubuvuzi bwihuse, gusa irakira iyo umurwayi yihutiye kuza kwa muganga, kandi dufite imiti haba mu mavuriro ya Leta n’ayigenga, uje kwivuza wese turamuvura kandi agakira.”

Nubwo mu Rwanda nta bushakashatsi bwari bwakorwa kuri iyo ndwara, ngo mu bitaro byitiriwe Umwami Faisal bashobora kwakira abarwayi bari hagati y’umwe na bane mu cyumweru.

Abaturage bo mu Karere ka Bugesera mu gikorwa cy'umuganda
Abagize 'Rwanda Clot Awareness Network' bifatanyije n'abaturage mu muganda
Umuganga w’inzobere ku ndwara z’abagore mu Bitaro bya Kaminuza bya Kigali (CHUK), Dr Kenneth Ruzindana
Umuyobozi Mukuru wa Rwanda Clot Awareness Network, Christine Ashimwe
Abagize Rwanda Clot Awareness Network, bifatanyije n'abaturage mu muganda usoza ukwezi banabasobanurira ibijyanye n'indwara bitiranyaga n'amarozi
Umuyobozi w’Akarere ka Bugesera wungirije ushinzwe imibereho myiza y’abaturage, Uwiragiye Priscille

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza