00:00:00 IGIHE NETWORK KN KINYARWANDA EN ENGLISH FR FRANCAIS

Abana batatu barimo uw’umwaka umwe, boherejwe muri Israel kubagwa umutima

Yanditswe na Mukahirwa Diane
Kuya 5 Ukwakira 2021 saa 04:15
Yasuwe :
0 0

Ambasade ya Israel mu Rwanda, kuri uyu wa Mbere tariki ya 4 Ukwakira 2021, yohereje abana batatu bafite uburwayi bw’umutima aho bagiye kubagwa ubu burwayi muri Israel.

Aba bana boherejwe binyuze mu masezerano Misiteri y’Ubuzima yagiranye na Save a Child’s Heart, Umuryango uvura ndetse ukita ku bana bafite indwara zitandukanye z’umutima muri Afurika.

Uyu muryango washinzwe n’abanya-Israel mu 1995, aba bana bakaba bazavurirwa ku bitaro by’uyu muryango bya Sylvan Adams Children’s Hospital.

Umuyobozi wa Save a Children Heart, Simon Fisher, yavuze ko hashize igihe bashyize imbaraga mu gufasha abana bo muri Afurika kubona ubuzima bwiza kandi bateganya gukomeza.

Yagize ati “Hashize imyaka dukorera muri Afurika, twafashije abana benshi kugira ubuzima bwiza. Nshimishwa n’uko twagiye dukorana neza na guverinoma uyu mushinga ukaba warateye imbere.”

Yakomeje avuga ko aba bana boherejwe muri Israel binyuze mu masezerano basinyanye na Minisante kandi ko bafite gahunda yo kuzatanga amahugurwa ku bijyanye no kuvura abana umutima.

Ambasaderi wa Israel mu Rwanda, Dr. Ron Adam, yaherekeje aba bana ubwo bajyaga gutega indege ibajyana, yavuze ko bagiye guhabwa ubuvuzi kubera imikoranire myiza y’igihugu cye n’u Rwanda.

Ku ruhande rw’abagenerwabikorwa bashimiye iki kigo na Leta y’u Rwanda kuba barabafashije bakaba bagiye guhabwa ubuvuzi.

Ngendahayo Mariam n’umwana w’imyaka 14 wajyanye kuvuzwa, yavuze ko anejejwe no kuba agiye guhabwa ubuvuzi kuko yahoraga arwaye ntashobore gukurikirana amasomo ye neza.

Yagize ati “Kubera uburwayi bwanjye nasibaga ishuri bishobora kugira ingaruka ku myigire yanjye, ndishimye ko bitazongera kubaho kuko ngiye kubagwa.”

Umubyeyi w’umwana w’umwaka umwe, Uwineza Olive, yavuze ko ashimishijwe n’iki gikorwa kuko yahoraga ahangayikishijwe n’ejo hazaza h’umwana we.

Yagize ati “Ndanezerewe cyane ko umwana wanjye agiye guhabwa ubuvuzi, nahoraga mpangayikishijwe n’ejo hazaza he. Ndashimira Leta y’u Rwanda na Save a Child’s Heart batumye ibi bibaho.”

Kugeza ubu hamazwe koherezwa abana 22 kuvuzwa muri Israel binyuze muri Save Child’s Heart.

Ambasaderi wa Israel mu Rwanda, Dr. Ron Adam, yaherekeje aba bana ubwo bajyaga gutega indege ibajyana, yavuze ko bagiye guhabwa ubuvuzi kubera imikoranire myiza y’igihugu cye n’u Rwanda
Ubwo aba bana berekezaga gufata indege ibajyana muri Israel kwitabwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .