00:00:00 IGIHE NETWORK KN KINYARWANDA EN ENGLISH FR FRANCAIS

Amayobera ku ndwara y’ibicurane idasobanutse yibasiye abaturarwanda

Yanditswe na Muhonzire Sylvine
Kuya 25 Gicurasi 2021 saa 12:57
Yasuwe :
0 0

Muri iyi minsi hari kugaragara umubare munini w’abantu bibasiwe n’indwara y’ibicurane n’inkorora bitandukanye n’ibyari bisanzwe, ku buryo utayirwaye, azi uwayirwaye cyangwa uwayikize mu byumweru bike bishize.

Abantu benshi bagaragaje impungenge batewe n’iy’indwara bifashishije urubuga rwa Twitter, ndetse bamwe basaba Ikigo cy’Igihugu Gishinzwe Ubuzima, RBC ndetse na Ministeri y’Ubuzima gukora ubushakashasti kugira ngo harebwe niba atari ari ikindi cyorezo cyadutse.

Nathalie Munyampenda usanzwe ari Umuyobozi wa Kepler niwe yatanze igitekerezo avuga ko kuva umwaka watangira nta muntu babana wigeze urwara ibicurane ariko muri iki gihe buri wese mu muryango we yayirwaye.

Yasubijwe n’abantu benshi bavuga ko bafite ikibazo kimwe, ndetse banagaragaraza ko iyi ndwara iri gufata abana cyane.

Uwitwa Dollars Kalimba yagize ati “Nari naraketse ko ari umuryango wanjye wonyine ufite ikibazo cy’inkorora n’ibicurane, iyi ndwara ni njye yatangiriyeho nyuma yo gufata urukingo rwa kabiri rwa Covid-19, ndakorora hafi ukwezi, nyuma bifata n’umwana wanjye ufite amezi atandatu, ibi bintu birakomeye, RBC na Minisante nibadufashe rwose.”

Undi witwa Mrs Be yagize ati “Abana nibo iri gufata cyane, ujya kuvuza umwana yakira, akajya ku ishuri akayigarura.”
Bahati Ngarambe we yavuze ko yari agiye gukura umwana mu ishuri kubera iyi ndwara y’ibicurane n’inkorora. Ati “Habuze gato ngo umwana mukure mu ishuri, ibimenyetso ni nk’ibya Malaria, umuriro mwinshi, kuruka, n’ibindi.”

Umuyobozi w’ibitaro bya Polyclinique de l’Etoile bihereye i Remera, Dr Birahira William, yabwiye IGIHE ko iyi ndwara y’ibicurane n’inkorora yiyongereye cyane muri iki gihe ndetse ko mu barwayi barenga 150 bakira ku munsi, kimwe cya gatatu cyabo baba baje kwivuza ibicurane.

Yagize ati “Abarwayi babaye benshi cyane baza bafite ibimenyetso by’ibicurane ndetse n’umuriro, tukikanga ko ari Covid-19, tukabapima tugasanga ntayo.”

“Ni ikintu kimeze nk’icyorezo abarwayi benshi ni uko barwaye, hari n’ababa biyongereyeho gukorora. Ariko turabapima tugasanga hari abafite ibicurane bisanzwe, abafite ibivanze na infection yo mu maraso cyangwa se ibiri kumwe n’umusonga, bose turabavura nyuma y’iminsi itatu itarenze itanu baba bamaze gukira.”

Uyu muganga yakomeje avuga ko nubwo ibi bicurane byiyongereye nta gikuba cyacitse kuko ari ibisanzwe bibaho buri mwaka muri aya mezi.

Umuyobozi w’Ishami Rishinzwe Kurwanya Indwara z’Ibyorezo muri RBC, Dr Rwagasore Edson, yavuze ko bafashe ibipimo binyuranye bagasanga ibi ibicurane bisanzwe ndetse ko bimenyerewe muri iki gihe ko iyi ndwara yiyongera.

Ati “Kuva mu kwezi kwa Kane kugera mu kwezi kwa Gatanu, ibicurane bigenda byiyongera, ariko kugira ngo tumenye neza yuko nta kibazo atari icyorezo turapima tukareba niba harimo virusi y’ubundi bwoko ishobora kuvamo ikindi cyorezo […] twarapimye ngo turebe ko atari ukwihinduranya kwa virusi dusanga ntabwo kwabayeho, iriho ni virus isanzwe.”

Yahumurije abantu ababwira ko nta kibazo cy’ibi bicurane n’inkorora biri kuba byinshi muri iki gihe abasaba gukomeza kwirinda. Ati “Abantu bakomeze birinde ibicurane, cyane cyane muri iki gihe cya Covid-19, wambaye agapfukamunwa neza ntabwo wakwandura.”

Dr Birahira yagiriye inama abantu ko bagomba gukora siporo muri iki gihe kugira ngo imyanda yo mu mubiri isohoke, ubundi banywe amazi menshi kuko byatuma ibicurane bikira batiriwe bajya kwa muganga.

Yabasabye kandi kujya kwivuza igihe bafashwe nayo kugira ngo batayitiranya na Covid-19 kuko bifite ibimenyetso bimwe.

Indwara y'ibicurane n'inkorora ikunda kwiyongera hagati ya Mata na Kamena kubera ko aba ari ibihe by'imvura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .