Agakingirizo: Igikoresho nkenerwa cyabaye ingume mu mahoteli

Yanditswe na Deus Ntakirutimana
Kuya 13 Ugushyingo 2016 saa 07:59
Yasuwe :
0 0

Icyumba kizwi nko ‘muri kane’ cyo mu bitaro bya kaminuza i Kigali (CHUK) havurirwa abagana mu marembera kubera indwara ya Sida, gishobora kuburamo umurwayi hitawe ku gakingirizo, ubudahemuka no kwifata.

Leta y’u Rwanda yaravuze, yarigishije ntako itagize ikangurira Abanyarwanda kwirinda indwara ya Sida yishe benshi mu myaka yashize, ndetse n’ubu mu Rwanda yisasira abasaga ibihumbi bitanu ku mwaka.

- Ibyuma bitanga udukingirizo mu Rwanda byarapfuye

- Abanyarwanda baracyatinya kuvuga agakingirizo

- Bamwe bagahimbye amazina kubera isoni

- Abaducuruza mu bifurumba ni uruhuri

- Ibyuma bizasimburwa n’ahacururizwa udukingirizo

Agakingirizo!

Agakingirizo ni imwe mu ntwaro ya nyuma mu gihe ibindi byose byananiranye. Aho kabonetse karakoreshwa, ak’umugore umwe ufite hoteli mu Rwanda wambwiye ati ‘Abanyarwanda basigaye barakataje mu guhuza ibitsina, nabibonaga ahandi ariko n’inaha barakabije.”

Muri kaminuza y’u Rwanda ishami rya Huye, kitabirwa n’abasaga 65%, uwo mubare ufite icyo uvuze mu banyeshuri ubusanzwe bajyanywe ku ishuri no kwiga akenshi biba binabahugije.

Muri Kigali udukingirizo dusigaye ari imari ibonwa na bake, abagabo ntabwo bakitwitwaza mu makofi, amadini atandukanye aratubuzanya, ugasanga hari benshi bacuruza ariko ntibatwibuke, yewe no mu tubari bacuruza inzoga ariko ahari ntibakwishingira udukingirizo.

Leta yerebye kure, kuba uri umuyoboke w’idini runaka ntibihagije ko wanga ko udukingirizo tukugerera muri hoteli, yagiye idushyiramo yifashishije ibyuma bidutanga, gusa sinzi niba mu maduka na ‘alimentation’ z’abavutse ubwa kabiri naho yaradushyizemo.

Hari abatugendana mu mufuka

Agakingirizo gateye isoni!

Ahagana mu mwaka wa 2008, hirya no hino mu Rwanda hashyizwe ibyuma bitanga udukingirizo, bitewe n’igiciro cyatwo ugashyiramo ibiceri maze kikaguha utwo ukwiriye.

Muri icyo gihe ibyo byuma byaragaburiwe, amafaranga n’udukingirizo bikisuka. Nyuma yaho bipfiriye ababikoreshaga twaganiriye bataka igihombo. Byarapfuye mu Mujyi wa Kigali, Musanze, Muhanga, Huye, Karongi na Rubavu nta na hamwe nabonye hari icyuma kizima mu hasaga 50 nasuye.

Uratwara agakingirizo mu ikofi se, nugera muri hoteli bakagusaka kagatakara hasi ko udakira abantu!! Nukicarira se bwo karasigara ari kazima?

Abakagura bagashakiye amazina, mituweli, ibinini, umutaka, paracetamol. “Ndashaka mituweli na supaneti”.

Kuri bamwe kugura agakingirizo biteye isoni

Abazamu n’abana b’ikarito babaye intumwa

Muri ‘Lodge’ (icumbi) abashaka kugura udukingirizo ntibatubona, usanga batabarwa n’abaducuruza ku ruhande barimo abacuruza uduconsho n’abazamu.

Nyabugogo mu gice kiri haruguru ya gare werekeza i Muhanga, narahageze nganira n’abana bavuga ko nta kabuza bazavanwa mu bukene n’udukingirizo.

Umwe muri bo udutanga mu ibanga twaganiriye, yanansabye kudakoresha amazina ye, yarambwiye ati “Ubundi urebye ko mba naranguye kugurisha agapaki kamwe amafaranga 100 nta guhendwa kurimo ariko menyereye kukagurisha 300 kugera kuri 500.

Ku munsi hari igihe agurirwa n’abantu basaga 15, nabwo ngo akenshi ni nijoro, ayo mafaranga yavuze ko amwungura cyane ku buryo mu myaka ibiri cyangwa itatu abona azaba ageze ku gikorwa kigaragara.

Mugenzi we ucuruza utwo dukingirizo ariko we ku karubanda kuko duteretse ahabonwa na buri wese mu ikarito ye, yavuze ko tumwungura kandi abakozi b’amcumbi ari i Nyabugogo bahora bamuhamagara ngo atuzane.

Mubajije impamvu abo bakozi bataducuruza yavuze ko niba ubuyobozi bw’icumbi budashyizeho iguriro ryatwo aho rikorera, umukozi wafatanwa udukingirizo yaba yadukiriye ibikorwa by’ishoramari mu kazi kandi bitemewe, ibyo abihurizaho n’uwagize ati “ Bosi ambonye nducuruza yanyirukana.”

Mu tubari burya hari n’abakora imibonano mpuzabitsina mu bwiherero no mu bwogero (douches et toilettes), batabonye udukingirizo, sinzi niba babireka, ariko se ko nta duhari!

Mu mahoteli, si henshi hagaragara ibyuma bitanga udukingirizo

Hoteli ntizaba ari ubwiyahuriro?

Mu minsi yashize, ubwo mu Nteko Ishinga Amategeko y’u Rwanda havugirwaga iby’ikoreshwa ry’agakingirizo, Kaminuza ishami rya Huye rigashimwa ko ryitabira, umwe mu badepite yabajije impamvu utwo dukingirizo tudashyirwa muri buri cyumba cya hoteli nk’uko bihutira gusasa iyo hari umuntu uvuyemo.

Ibyo nabiganirije umwe mu bafite hoteli muri Kigali, ansubiza atya “Disi natwe hano icyuma cyarapfuye, ariko guhera uyu munsi ngiye kujya ntegeka ko dushyirwa muri buri cyumba” nti ‘Ese uzajya wishyuza angahe?’ ati “Ntabwo nzajya nishyuza kuko ni ukurengera ubuzima bwa muntu.”

Nubwo kabura muri Hoteli, mu nyubako za Leta ugasangamo, hirya no hino ku dusanteri hari udusanduku badushyiramo, ko ari uruhare rwa Leta abikorera bite?

Leta y’u Rwanda n’ingamba nshya

IGIHE yashatse kumenya niba Leta y’u Rwanda izi iby’icyo kibazo ku nubwo ibyuma byarapfuye, ariko ubuzima bw’abantu bukeneye kurindwa

Dr Umugwaneza Placidie, ufite ibyuma bitanga udukingirizo mu nshingano ze, ukora mu kigo cy’igihugu gishinzwe ubuzima (RBC) yavuze ko babizi ko ibyo byuma byapfuye ariko barimo kureba uburyo byasimburwa n’ahacururizwa udukingirizo (Condom Shop) hazwi mu Mujyi wa Kigali. Icyo gikorwa kikaba gishobora gutangira muri Gashyantare 2016.

Muri Gashyantare 2016, Leta iraza gukorana bya hafi n'amaduka acuruza udukingirizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza