Kwamamaza

Abize ubuvuzi 387 batsinzwe ikizamini cyagombaga kubemerera kuba abaganga

Yanditswe kuya 19-11-2016 saa 08:11' na Cyprien Niyomwungeri


Urugaga rw’Abakora imirimo ishamikiye ku buvuzi, RAHPC (Rwanda Allied Health Professional Council), rwashyize ahagaragara umusaruro w’ibyavuye mu kizamini cyemerera abize ubuvuzi gukora uwo mwuga, aho abagera kuri 387 muri 557 bagikoze batsinzwe.

Uru rugaga rumaze imyaka itatu rufite inshingano yo kureba ko abaturage bavurwa n’abanyamwuga bafite ibyangombwa kandi banabyigiye mu buryo bukwiriye. Ibi bizamini rukaba rubikoresha abarangije kwiga ubuvuzi mu mashuri makuru na za Kaminuza zitandukanye kugira ngo bahabwe icyangombwa kibemerera gukora uwo mwuga.

Umwanditsi w’uru rugaga, Ndahiriwe Jean Baptiste, yabwiye IGIHE ko ari ku nshuro ya mbere bakoresheje abize muri Kaminuza zigenga n’iza Leta, ariko icyagaragaye ari uko muri Kaminuza zigenga hari byinshi bikibura.

Yagize ati “Abakandida benshi cyane cyane mu mashuri yigenga batsinzwe kuko nta barimu bafite, nta labotarwari n’ibitabo. Abandi byatewe n’uko bagiye bahuzagurika ugasanga batangiye biga porogaramu runaka bagera hagati bakazihindura iz’ubuvuzi mu rwego rwo gushaka isoko.”

Yagarutse ku mpamvu y’ibi bizamini, avuga ko byatewe n’uko hari ubugenzuzi bwagiye bukorwa bukagaragaza ko amashuri menshi cyane cyane ayigenga akora ibintu bidakwiriye. Ikindi ngo ni uko n’ahandi ibizamini nk’ibi bikorwa mu rwego rwo kurengera ubuzima bw’abaturage.

Ibyo umusaruro ugaragaza

Abize amasomo ya Laboratwari ‘Medical Laboratory’

Abize amasomo ya Laboratwari bafite impamyabumenyi y’amashuri yisumbuye, bakuye i Gatagara na Repubulika Iharanira Demokarasi ya Congo (RDC), bakoze ari 24, abagera kuri batandatu gusa baba aribo batsindira icyangombwa cy’urugaga.

Mu cyiciro cy’abafite impamyabumenyi y’icyiciro cya mbere cya Kaminuza muri Laboratwari bakuye muri Uganda, hakoze abagera ku 156 hatsinda batandatu gusa, naho abo muri iki cyiciro 17 bigiye muri RDC bakoze bose baratsinzwe.

Abize laboratwari muri INES Ruhengeri, bafite impamyabumenyi y’icyiciro cya kabiri cya Kaminuza, hakoze abagera kuri 90 hatsinda bane gusa. Muri Mount Kenya hakoze 95 hatsinda 24, mu gihe muri Kaminuza y’u Rwanda hakoze 31 hatsinda 26.

Abize kugorora ingingo ‘Physiotherapy’

Muri iki cyiciro hakoze abo muri Kaminuza y’u Rwanda bafite impamyabumenyi y’icyiciro cya kabiri cya Kaminuza gusa, aho muri 13 bakoze hatsinze 11.

Abize ubuvuzi bw’amaso ‘Ophtalmic Clinical’

Muri iki cyiciro hakoze abakandida 15 bafite impamyabumenyi y’icyiciro cya mbere cya Kaminuza bakuye muri Kaminuza y’u Rwanda, bose bakaba barabashije gutsinda neza.

Abize imirire ‘Nutrition and Dietetics’

Muri iki cyiciro hakoze abanyeshuri bafite impamyabumenyi y’icyiciro cya kabiri cya Kaminuza. Abakandida icyenda bize muri Kaminuza y’u Rwanda bakoze bose baratsinze n’abandi batandatu bo muri Kaminuza Gatolika y’u Rwanda baratsinda.

Abize gucisha abantu mu cyuma ‘Medical imaging’

Aha ho hakoze abakandida barindwi bo muri Kaminuza y’u Rwanda bafite impamyabumenyi y’icyiciro cya mbere, bose bakaba baratsinze.

Abize ubuvuzi bw’amenyo ‘Dental Therapy’

Hakoze abakandida 27 bafite impamyabumenyi y’icyiciro cya kabiri cya Kaminuza bahawe na Kaminuza y’u Rwanda, abagera kuri 21 nibo babashije gutsinda.

Abize gufasha abaganga ‘Clinical Medicine’

Muri iki cyiciro hakoze abakandida 37 bafite impamyabumenyi y’icyiciro cya kabiri cya Kaminuza bakuye muri Kaminuza y’u Rwanda, abagera kuri 27 nibo babashije gutsinda abandi 10 baratsindwa.

Mu bize mu ishami rya Environmental Health bafite impamyabumenyi y’icyiciro cya Kabiri cya Kaminuza bakuye muri Kaminuza y’u Rwanda, hakoze abakandida babiri bombi bakaba baratsinze.

Abize ibijyanye n’ikinya ‘Anaesthesia’

Muri iri shami hakoze abakandida 23 bafite impamyabumenyi y’icyiciro cya mbere cya Kaminuza bahawe na Kaminuza y’u Rwanda, umwe wenyine niwe wabashije gutsinda.

Ibizamini nk’ibi urugaga rw’abakora imirimo ishamikiye ku buvuzi ruvuga ko bizazamura ireme ry’uburezi muri uyu mwuga kandi n’abawiga bakamenya ko bagomba gushyiramo imbaraga kugira ngo bazavure abantu. Ibi bizamini abize mu mashami y’Ubuforomo n’Ububyaza ndetse na Farumasi basanzwe babikora.

Umwanditsi w’Urugaga rw’Abakora imirimo ishamikiye ku buvuzi mu Rwanda, Ndahiriwe Jean Baptiste atangaza ko basanze muri Kaminuza zigenga hari ibitaranozwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved