Abarangije mu cyiciro cya mbere cy’abafasha b’abaganga mu ngo bahawe inyemezabumenyi

Yanditswe na Evariste Nsengimana
Kuya 13 Werurwe 2017 saa 02:47
Yasuwe :
0 0

Minisiteri y’Ubuzima ku bufatanye n’Ikigo cy’Igihugu cy’Ubuzima (RBC), yatanze inyemezabumenyi ku bafasha b’abaganga mu ngo 211, bitezweho kuzagira uruhare mu gukurikirana mu buryo buhoraho abantu barwaye indwara zidakira.

Uyu muhango wahuriranye no gutangiza ku mugaragaro icyumweru cy’ubuzima gifite insanganyamatsiko igira iti “Kwirinda biruta kwivuza” wabaye kuri uyu wa Mbere, tariki ya 13 Werurwe mu Karere ka Rwamagana mu Ntara y’Iburasirazuba.

Hatangijwe kandi ku mugaragaro gahunda ya “Shisha Kibondo”, yo guha abana bari munsi y’imyaka ibiri bo mu cyiciro cya mbere cy’ubudehe, ifu y’igikoma ikungahaye ku ntungamubiri hagamijwe kurwanya imirire mibi mu bana.

Abafasha b’abaganga bafite inshingano zitandukanye n’iz’abajyanama b’ubuzima basanzwe bakorana n’abaturage. Izabo zirimo gufasha abarwayi b’indwara zidakira basezerewe n’ibitaro babaha imiti ibagabanyiriza ububabare, kubaremamo icyizere, ubukangurambaga ku barwayi, abarwaza n’abazima kuri izo ndwara n’ibindi.

Indi nshingano y’umwihariko bahawe, ni ugukurikirana no gutanga amakuru y’impfu zibera mu miryango aho bazajya batanga amakuru hagamijwe kumenya imibare yabo ndetse n’ikibahitana n’uburyo bwo kubikumira.

Guverineri w’Intara y’Iburasirazuba, Kazayire Judith yasabye aba bafasha b’abaganga mu ngo kunoza serivisi no gufasha abarwayi kubona imiti ku gihe ndetse no kuba hafi y’imiryango yabo babaha inama.

Yagize ati “Mu byo nsaba ko twanoza, ni serivisi haba ku bitaro n’ahandi hakirirwa abarwayi, serivisi duha abaturage tukayinoza tukabasobanurira ntidutume bajya ku mirongo.”

Yakomeje asaba abaturage kurangwa n’isuku no kugana ibigo nderabuzima mu gihe bagize ibyago byo kurwara.

Umunyamabanga wa Leta muri Minisiteri y’Ubuzima, Dr Patrick Ndimubanzi yasabye abahawe inyemezabumenyi kwita no kwitanga mu byo bakora, kurangwa n’umurava no kubera abandi icyitegererezo.

Yagize ati “Aba bafasha b’abaganga turabasaba ubwitange, ubudakemwa, umurava n’urukundo bakegera abarwayi barembye bakabafasha kandi icyizere babagiriye bakagikomeza tukabasha kwagura iyi gahunda mu gihugu hose.”

Umugwaneza Nicole, umwe mu bahawe inyemezabumenyi avuga ko bahawe amahugurwa azabafasha kwita ku barwayi kandi ko bazakorana umurava bakanazirikana n’inama bahawe n’abayobozi.

Dr. Muhimpundu Marie Aime, ushinzwe ishami ryo kurwanya indwara zitandura muri RBC yasabye abaturage kwisuzumisha n’abazirwaye bakivuza hakiri kare.

Yagize ati “Uko iminsi igenda ishira ikibazo tugenda tukigaho cyane kuko kimwe mu bitera izi ndwara harimo uko abantu bagenda bakura n’iterambere. Niyo mpamvu twafashe ingamba zo gufatirana izi ndwara hakiri kare dutangira kuzivugaho, kuzirinda n’ubukangurambaga ku bazirwaye bakivuza hakiri kare.”

Ibikorwa by’icyumweru cy’ubuzima byatangijwe uyu munsi, biteganyijwe ko bizasozwa kuwa Gatandatu, tariki ya 18 Werurwe 2017. Ni icyumweru kizarangwa no kwita ku bagore batwite, umwana umaze kuvuka, kwita ku mirire ku bana bari munsi y’imyaka itanu, kwitabira gahunda y’ikingira, kurwanya ingaruka zo kubura vitamin A, kuboneza urubyaro, kwirinda inda zitateganirijwe, kurwanya inzoka zo mu nda n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza