Abanyamakuru bagobotse abari barabuze ubwishyu mu bitaro bya Muhima

Yanditswe na Uwishyaka Jean Louis
Kuya 2 Ugushyingo 2016 saa 07:22
Yasuwe : XX
0

Itsinda ry’abanyamakuru batandukanye b’Intore z’Impamyabigwi, bishyuriye umwenda wa miliyoni 1,010,880 abarwayi 14 bari barabuze ubwishyu barwariye mu Bitaro bya Muhima, biherereye mu Karere ka Nyarugenge.

Iki gikorwa cyo kwishyurira aba barwayi imyenda y’amafaranga bari babereyemo ibitaro bya Muhima cyabaye kuri uyu wa 2 Ugushyingo 2016, cyitabiriwe n’abanyamakuru n’abakuru b’ibinyamakuru bitandukanye bikorera mu Rwanda ndetse n’abari bahagarariye Ikigo cy’Igihugu gishinzwe Imiyoborere(RGB).

Havugimana Aldo, umuyobozi wa Radiyo Rwanda, yavuze ko iki gikorwa bakoze ari umugambi bihaye wo kwishakamo ibisubizo.

Yagize ati “ Biri muri gahunda twihaye yo kwishakamo ibisubizo kuko niba tugiye gutara amakuru tugasanga havutse ibibazo, ntabwo ari uko tuba twagiye gutara ibibazo ahubwo ni ukugira ngo ibyo bibazo bibonerwe ibisubizo. Natwe rero igihe tubonye uburyo bwo kuba byakemuka tugomba kugira uruhare mu gukemura ibibazo.”

Umuyobozi w’ibitaro bya Muhima, Dr Ndizeye Ntwali, yavuze ko bishimiye iki gikorwa, abasaba kuzagaruka.

Yagize ati “ Turishimye cyane kuba mwadusuye ikindi mukaba mwaje gufasha abarwayi bacu kuko ntabwo byari bisanzwe, rero kuba byabaye ni ibintu byadushimishije cyane ku buryo twabasabaga ko mwazagaruka n’indi minsi.”

Yakomeje avuga ko mu myaka ibiri ishize ibi bitaro biberewemo umwenda wa miliyoni 10 n’abarwayi bahivurije babura ubushobozi bwo kubishyura.

Umubyeyi wabyariye muri ibi bitaro akabura ubwishyu bw’amafaranga 77.410, yashimiye aba banyamukuru babashije kumwishyurira.

Yagize ati "Rwose nanjye nabyariye aha ariko kubera ko umugabo wanjye ari umukene utishoboye, nabuze ubwishyu ariko ndashimira aba bayobozi bandihiye umwenda nari mfite.”

Iki gikorwa cyo kwishyurira abarwayi babuze ubwishyu mu bitaro bitandukanye, biteganyijwe ko kizajya gikorwa buri kwezi.

Iki gikorwa ngo gikubiye mu mugambi abanyamakuru bihaye wo kwishakamo ibisubizo
Ubuyobozi bw'ibitaro bya Muhima bwishimiye iki gikorwa, busaba ko bazagaruka
Abari barabuze ubwishyu bashimiye abanyamakuru babagobotse bakabishyurira uwo mwenda
Iki gikorwa ngo ntikirangiriye kuri ibi bitaro gusa kuko kizajya gikorwa buri kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza